Enaʼö Onekhe Ita ba Wanuriaigö​—Böhöli Wamahaʼö Niha ba Zura Niʼamoniʼö Na Lö Tedou Ia ba Wamati

HANA WA MOGUNA: Enaʼö tola teʼorifi niha, moguna laʼangaröfili döi Yehowa. (Rom 10:13, 14) Hizaʼi, lö dozi niha omasi ira woloʼö goi-goi Yehowa hewaʼae no lafahaʼö ira ba Zura Niʼamoniʼö. Sindruhunia, tenga zaya-zaya gölö ginötö si no taʼogunaʼö ba wanuriaigö. Daʼö mbörö wa omasi ita taʼogunaʼö ginötöda andrö ba wanolo niha somasi mamalalini era-era enaʼö laʼomusoiʼö dödö Yehowa. Na lö tedou ba wamati niha nifahaʼöda ba Zura Niʼamoniʼö hewaʼae no ara ifahaʼö ia, sökhi na taböhöli manö wamahaʼö yaʼia. Taʼogunaʼö ginötöda ba wanolo niha böʼö nidöni Yehowa khönia hegöi ba organisasinia. (Yoh 6:44) Samuza inötö dania, tola manö tebulö gera-era niha nifahaʼöda no mege ba iforomaʼö wa yaʼia andrö ”niha si sökhi amuata somasi manöndra faʼauri si lö aetu”.​—Hal 13:48.

LALA WAMALUA YAʼIA:

• Suno niha nifahaʼömö börö me omasi ia isöndra waʼaboto ba dödö si tefaudu.​—1Tim 2:4

• Abakhaiʼö wangombakha khönia wa moguna ifalua hadia zi no ifahaʼö ia.​—Luk 6:46-49

• Haogö wanutunö khönia gamaedola Yesu sanandrösa khö zohalöwö ba danö, ba andrö khönia woʼangeragö hana wa lö nasa ifalua zi no ifahaʼö ia. Hizaʼi, böi faso ia.​—Mat 13:18-23

• Si fao faʼatua-tua, tutunö khönia hana wa moguna öböhöli wamahaʼö yaʼia

• Fatunö khönia wa öfalukhaisi dania ia fasasakali ba wamarou tödönia ba wamati. Waʼö khönia wa omasiʼö ötohugö wamahaʼö yaʼia dania na no tebulö gera-erania

FAIGI VIDEO, BA BEʼE WANEMA LI BA WANOFU-NOFU DAʼA:

• Ba huo-huora andrö, hezo taʼila wa lö tedou ba wamati niha nifahaʼönia ba Zura Niʼamoniʼö?

• Hewisa zi samösa sanuriaigö wanolonia niha nifahaʼönia andrö enaʼö iʼila wa moguna ibulöʼö gera-erania?

• Hewisa wangoromaʼönia zi samösa sanuriaigö wa omasi ia itohugö wamahaʼö niha daʼö na no tebulö gera-erania?