Lö aröu moroi ba Mbabeli, so mbanua sotöi Uri. Niha sato ba daʼö, lafosumange lowalangi faya tenga Yehowa. Hizaʼi, so ndra matua ba Guri, ha Yehowa nifosumangenia. Töinia Aberahamo.

Imane Yehowa khö Gaberahamo, ’Röi nomomö awö dalifusöu, ba aeʼe ba danö niʼoromaʼögu khöu.’ Aefa daʼö, fawuʼu li Lowalangi, ’Ba tobali ndraʼugö soi sebua dania, ba börö me lö faröi ndraʼugö, andrö wa oya ufalua zi sökhi ba niha gulidanö.’

Lö iʼila Aberahamo hezo ifatenge ia Yehowa, hizaʼi faduhu manö dödönia khö Yehowa. Börö daʼö, Aberahamo hegöi foʼomonia Sara, amania Tera, ba ono mbeneʼönia sotöi Loti, lafaʼanö gama-gamara ba labörögö wofanö simane niwaʼö Yehowa.

No 75 fakhe ndröfi Gaberahamo me irugi danö somasi iforomaʼö khönia Yehowa si fao ösi nomonia. Töinia Kanaʼana. Ba daʼö fahuhuo Lowalangi khö Gaberahamo ba ilau fawuʼu li, ’Fefu danö niʼilamö andre, ba ubeʼe ba ndraonou.’ Hizaʼi, no atua Gaberahamo hegöi Sara ba lö hadöi onora. Börö daʼö, hewisa wamalua Yehowa zi no ifabuʼu?

No ara saʼae mangowalu ira Gaberahamo faoma Sara. No laröi nomo sohahau dödöra ba Guri ba toröi ira ba tendra. Hizaʼi, lö mukökö-kökö Zara, börö me faduhu dödönia khö Yehowa.

Omasi sibai Zara na so nononia. Börö daʼö, imane khö Gaberahamo, ’Na so nono zawuyugu andrö sotöi Hagara, ba ubaliʼö hulö nonogu samösa daʼö.’ Samuza inötö, tumbu nono Hagara ono matua, töinia Simaʼeli.

Hauga fakhe aefa daʼö, me 99 fakhe ndröfi Gaberahamo ba 89 fakhe ndröfi Zara, tohare datölu domera. Iʼandrö khöra Aberahamo enaʼö molombase ira ba mbörö geu ba lalau manga. Öʼila haniha dome si datölu andrö? Yaʼira malaʼika! Lamane khö Gaberahamo, ’Ba ndröfi fönada, ba ginötö simane daʼa, yaʼugö faoma foʼomou so khömi nono matua.’ Irongo-rongo daʼö Sara moroi bakha ba tendra. Maʼiki ia ba imane, ’No atua ndraʼo, hewisa wa tola moʼonodo.’

Ba ndröfi aefa daʼö, moʼono Zara ono matua, simane niwaʼö malaʼika Yehowa. Ifotöi Aberahamo nononia andrö Izaʼaki, eluahania ”Famaʼiki”.

Me no irugi mato lima fakhe ndröfi Gizaʼaki, oroma khö Zara wa asese iʼoʼaya ia Simaʼeli. Omasi Zara ba wolumöʼö ononia, börö daʼö iʼandrö khö Gaberahamo enaʼö ifofanö Hagara faoma Simaʼeli. Ba wamobörö, lö omasi Gaberahamo. Hizaʼi, imane Yehowa khö Gaberahamo, ’Fondrondrongo niwaʼö Zara. Hasambalö urorogö Zimaʼeli. Börö me ba khö Gizaʼaki ufalua mbuʼusa ligu.’

Toröi Loti khö zibayania Aberahamo ba danö Ganaʼana. Börö me oya gurifö Gaberahamo hegöi Loti, lua-luania ambö danö tana khöra. Imane Aberahamo khö Loti, ’Lö tola fao-fao manö ita ba zi sambua nahia. Fili iadaʼa hezo numalö ndraʼugö, ba lö möi ndraʼo ba daʼö.’ Tenga ha tana khönia iʼera-era Aberahamo lö?

Iʼila Loti danö si sökhi sahatö ba mbanua Zodoma. Atabö ndruʼu ba daʼö ba oya nidanö. Ifili gamaudu daʼö ba findra ia awö nosi nomonia.

Lö sökhi niha ba Zodoma, simanö göi niha ba Gomora, banua sahatö ba daʼö. Börö daʼö, omasi Yehowa idudugö mbanua si dombua andrö. Hizaʼi, omasi ia iʼorifi Loti hegöi ösi nomonia. Andrö, ifatenge darua malaʼika ba wamatunö khöra, ’Aliokö! Miheta ami ba mbanua daʼa! Lö ara tö ifakiko Yehowa.’

Lö iʼanemaiʼö mofanö Loti. Itaha-taha ia nasa. Tobali, lasöbi danga Loti ira malaʼika andrö, foʼomonia, ba darua nononia alawe, laʼohe ira baero mbanua andrö lamane, ’Fagohi! Miʼoloi faböi mate ami, ba böi mifaigi furi. Na mifaigi furi ba mate ami!’

Me larugi mbanua Zoara, itorugö Yehowa deu alitö faoma balera ba Zodoma hegöi ba Gomora. Adudu mbanua si dombua andrö. Me lö iʼoʼö foʼomo Loti niwaʼö Yehowa ba ifaigi furi, tobali ia kara moʼasio! Hizaʼi, teʼorifi Loti hegöi ononia alawe si darua börö me laʼoʼö niwaʼö Yehowa. Tatu abu sibai dödöra me lö moloʼö woʼomo Loti. Hewaʼae simanö, omuso dödöra börö me lafondrondrongo wanuturu lala moroi khö Yehowa.