FAMAHAʼÖ 14

Haogö Faʼema zi Tobali Famahaʼö

Heberaiʼo 8:1

RAHU-RAHU: Tolo zamondrongo enaʼö lahaogö laʼosisiʼö huhuo nifaʼemamö ba haogö wanutunö hadia gamakhaita wamahaʼö daʼö ba duho nifaʼemamö hegöi ba gohitö dödönia.

LALA WAMALUA YAʼIA:

Moguna so zi tobali ohitö dödö. Angeragö enaʼö huhuo nifaʼemamö andrö hulö zawena larongo, tola mufaduhusi tödö mazui möi famarou dödö zamondrongo ba tutunö ia soroi ba dödö. Tatugöi enaʼö fefu wamahaʼö daʼö tobali fanolo khöu ba wogamö ohitö dödö moroi ba huhuo nifaʼemamö.

Sofu khöu samösa: ’Hadia manö wanofu si so ba wangera-ngera zamondrongo sanandrösa ba duho daʼa mazui si lö fatema ba dödöra? Hewisa enaʼö sökhi wamaʼoligu irege terou dödöra wamondrongo yaʼia?’ Aefa daʼö, haogö faʼanö wameʼe fanema li irege tola laʼosisiʼö, aboto ba dödöra ba fatema khöra nifatunömö andrö.
Abakhaiʼö wangombakha tuho huhuo. Aseseʼö tötöi ngawua wehede si tohude mazui ogunaʼö ngawua wehede si fagölö eluaha ba duho huhuo nifaʼemamö.
Haogö tutunö wamahaʼönia ba enaʼö alio muʼila geluaha. Fili wamahaʼö soʼamakhaita ba duho nifaʼemamö ba moguna öfaudugö wamaʼema yaʼia moloʼö inötö si no mutatugöi. Tatugöi hawaʼoya wamahaʼö sinangea ötutunö, haogö wanutunö ero sambua famahaʼö, batogö sabata, aefa daʼö faʼoli wanutunö yaʼia.

Tola öfatunö hadia zi tobali famahaʼö ba wamobörö huhuomö enaʼö laʼila laʼosisiʼö ira samondrongo mazui fuli tötöi wamahaʼönia ba gafuriata huhuomö enaʼö tola latörö tödöra.