Ira Satua Sokubaloi​—Miʼoʼö Duma-Duma Gideono

1. Moloʼö 1 Fetero 5:2, hadia döi si sökhi niʼokhögö ndra satua sokubaloi?

NO MUFADUHUSI tödö ndra satua sokubaloi ba wondrorogö biri-biri Yehowa sebua böli. Laʼameʼegö tödö sibai döi si sökhi andrö ba wondrorogö ira talifusöra, ba laforege sibai enaʼö tobali ira kubalo si sökhi. (Yer. 23:4; baso 1 Fetero 5:2.) Taʼandrö sibai saohagölö me taʼokhögö ndra talifusö simane daʼö ba mbanua niha Keriso si so yaʼita!

2. Hadia manö waʼabasaki nitaögö ndra satua sokubaloi?

² Asese lataögö waʼabasaki ira satua sokubaloi ba wamalua noro dödöra. Hadia mbörö? Börö me oya zinangea lafalua ba wondrorogö banua niha Keriso. Samösa zatua sokubaloi sotöi Tony moroi ba Amerika Serikat, lö tola löʼö ifahaʼö ia enaʼö böi so khönia wayawasa börö me oya noro dödö nitemania. Imane, ”Ba wamobörö pandemi COVID-19, oya sibai halöwögu ba wamaʼanö gangowuloa hegöi fanuriaigö. Hizaʼi, gofu hawaʼoya zi no uʼohalöwögöigö, hulö lö hadöi alö halöwögu andrö lua-luania lö hadöi inötögu ba wombaso Sura Niʼamoniʼö, ba wamalua famahaʼö samösa, hegöi ba wangandrö.” Samösa zatua sokubaloi sotöi Ilir moroi ba Kosovo, itaögö göi gabula dödö tanö böʼö. Me alua wasuwöta ba mbanua si toröi yaʼia, abua khönia ba woloʼö fanuturu lala moroi ba organisasi. Imane, ”Tetandraigö waʼabaranigu me ibeʼe khögu noro dödö gödo ndraha ba wanolo ira talifusöda si toröi ba mbanua safönu teʼala. Ataʼu sibai ndraʼo ba urasoi wa ambö tefaudu wanuturu lala andrö.” Samösa utusan injil sotöi Tim moroi ba Asia, irasoi wa abua khönia enaʼö lö faröi ba wamalua halöwönia ero maʼökhö. Imane, ”Itaria urasoi marase sibai wangera-ngeragu.” Hadia zanolo ira satua sokubaloi ba wanaögö faʼabasaki simane daʼö?

3. Hadia wamahaʼö nihalöda moroi ba duma-duma zanguhuku sotöi Gideono?

³ Tola lahalö wamahaʼö ira satua sokubaloi moroi ba duma-duma zanguhuku sotöi Gideono. (Heb. 6:12; 11:32) Labeʼe khönia noro dödö ba wondrorogö hegöi ba wokubaloi ono mbanua Lowalangi. (Sangu. 2:16; 1 Ng. 17:6) Simane Gideono, lafataro göi ndra satua sokubaloi ba wondrorogö ono mbanua Lowalangi ba mbaŵa sabua fanaögö andre. (Hal. 20:28; 2 Ti. 3:1) Tola tafahaʼö ita ba duma-duma Gideono si lö fayawa, sangokhögö fangide-ngideʼö ba lö tebulö moloʼö. Lö faröi ia ba halöwönia hewaʼae na abua daʼö. He na satua sokubaloi ita mazui tenga, moguna itugu tafosumange ndra satua sokubaloi. Tatuhini ira börö me no labeʼe khöra noro dödö ba wondrorogö yaʼita.—Heb. 13:17.

BÖI FAYAWA BA OKHÖGÖ WANGIDE-NGIDEʼÖ

4. Hewisa wangoromaʼö Gideono wa lö fayawa ia ba iʼokhögö wangide-ngideʼö?

⁴ Gideono andre niha si lö fayawa ba sangokhögö fangide-ngideʼö.b Samuza maʼökhö, ifatunö khönia malaʼika Yehowa wa yaʼia nifili ba wangefaʼö Izaraʼeli moroi ba soi Midiano sabölö. Hizaʼi, imane Gideono, ”Moroi ba mado Manase fefu, ha ösi nomo namagu wondrege zide-ide. Ba zi sambua ösi nomoma, ha yaʼo zi lö guna.” (Sangu. 6:15) Irasoi wa tebai ifalua halöwönia andrö, hizaʼi aboto ba dödö Yehowa wa hasambalö tola ifalua daʼö. Börö wanolo Yehowa tola mofozu Gideono ba wangasiwai halöwönia.

5. Ba ginötö hadia manö abua khö ndra satua sokubaloi ba wangoromaʼö wa lö khöra fayawasa ba laʼokhögö wangide-ngideʼö?

⁵ Laforege sibai ira satua sokubaloi enaʼö lö khöra fayawasa ba laʼokhögö wangide-ngideʼö. (Mi. 6:8; Hal. 20:18, 19) Lö lahöni-höni waʼabölöra mazui faʼamofozu si no lakhamö. Ba lö göi ide-ide dödöra börö zoʼamböta mazui sala si no lafalua. Hizaʼi, tenga saoha khö zi samösa satua sokubaloi ba wangoromaʼö wa lö khönia fayawasa ba iʼokhögö wangide-ngideʼö. Duma-dumania, tola manö oya noro dödö nitemania, hizaʼi ba gafuriata lö sagu khönia wamalua yaʼia. Mazui, abua khönia ba wangoromaʼö fangide-ngideʼö ba ginötö laʼamenesi ia mazui ba ginötö lasuno. Na alua zimane daʼö, hewisa ndra satua sokubaloi ba woloʼö duma-duma Gideono?

6. Moroi ba duma-duma Gideono, hadia wamahaʼö nihalö ndra satua sokubaloi sanandrösa ba wa lö fayawa? (Faigi göi gambara.)

⁶ Andrö wanolo. Niha si lö fayawa, aboto ba dödönia wa so zi tebai ifalua. Lö fayawa Gideono, oroma daʼö me iʼandrö wanolo ba niha böʼö. (Sangu. 6:27, 35; 7:24) Lafalua göi zimane daʼö ira satua sokubaloi satua-tua. Imane Tony si no mutötöi moroi yawa, ”Börö lala wangebuaʼö yaʼo, lö utimbagö na labeʼe khögu noro dödö soya, hewaʼae na dali zindruhunia tebai ufalua fefu daʼö. Börö daʼö, uhalö gangetula ba wanutunö sanandrösa ba gamuata si lö fayawa ba wamahaʼö ba zi sambua omo khöma, ba uʼandrö mbua gera-era woʼomogu. Ufuli göi ufaigi video Fahaʼö Ira, Faduhusi Tödö Ira, ba Beʼe Khöra Halöwö Simane Yesu ba jw.org.” Ibörögö iʼandrö Tony wanolo moroi ba niha böʼö. Hadia mbuania? Imane Tony, ”Lö tebulö mufalua fefu halöwö ba mbanua niha Keriso, ba so nasa ginötögu ba wondrouʼö famatigu.”

7. Hewisa ndra satua sokubaloi ba woloʼö Gideono ba ginötö laʼamenesi ira? (Yakobo 3:13)

⁷ Böi ofönu na labeʼe khöu mene-mene. Tola manö alio mofönu ndra satua sokubaloi na laʼamenesi ira. Hizaʼi, duma-duma Gideono tola möi fanolora. Aboto ba dödö Gideono wa lö moʼahonoa ia, daʼö mbörö wa lö ilau mofönu me laʼamenesi ia niha Geferai. (Sangu. 8:1-3) Lö mofönu ia wanema lira. Iforomaʼö wangide-ngideʼö me ihaogö ifondrondrongo niwaʼöra ba ihaogö wahuhuosa khöra. Buania, lö mofönu niha Geferai andrö. Simane Gideono, ira satua sokubaloi satua-tua moguna lahaogö lafondrondrongo ba ginötö laʼamenesi ira ba labeʼe wanema li si fao faʼasökhi. (Baso Yakobo 3:13.) Na lafalua daʼö, no larorogö waʼatulö ba mbanua niha Keriso.

8. Hewisa zinangeania ndra satua sokubaloi ba ginötö lasuno ira? Beʼe duma-duma.

⁸ Beʼe wanuno khö Yehowa. Me lasuno Gideono börö me no mofozu ia ba wokalaisi niha Midiano, ibeʼe wanuno andrö khö Yehowa. (Sangu. 8:22, 23) Hewisa ndra satua sokubaloi ba woloʼö duma-duma Gideono? Tola laforomaʼö wa börö Yehowa wa tola mofozu ira. (1 Ko. 4:6, 7) Duma-dumania, na so ndra talifusöda zanuno zi samösa satua sokubaloi börö me onekhe ia wamahaʼö, tola imane wangumaʼö wa börö wamomaha moroi ba organisasi Yehowa wa tola ifalua daʼö. Mazui, tola itolo niha böʼö ba wangosambuaʼö dödöra ba dane-dane wamahaʼö nifaʼemania yaʼia daʼö Taromali Lowalangi. Moguna laʼangeragö ira satua sokubaloi, hadia lalara ba wamahaʼö andrö tedönisi wangera-ngera niha ba khöra samösa mazui löʼö. Nehegö zi no irai alua khö zi samösa satua sokubaloi sotöi Timothy. Me awena sibai mufataro ia, omasi sibai Timothy ba wamaʼema huhuo sebua. Imane wangumaʼö, ”Uforege sibai ba wamaʼema fehede famasao hegöi duma-duma saganau si toröi-röi ba dödö. Daʼö mbörö wa asese lasuno ndraʼo niha. Hizaʼi lua-luania, khögu laʼosambuaʼö dödöra, tenga ba Zura Niʼamoniʼö mazui khö Yehowa.” Ba gafuriata, aboto ba dödö Timothy wa moguna ibulöʼö lalania ba wamahaʼö enaʼö lö tedönisi dödö niha ba khönia samösa. (Amd. 27:21) Hadia mbuania? Imane, ”Lafatunö khögu ira talifusöda, wa huhuo nifaʼemagu tola möi fanolora ba wanaögö abula dödö, anau gölöra ba wanaögö faʼabasaki, mazui itugu ahatö ira khö Yehowa. Abölö omuso dödögu iadaʼa ba wehedera andrö, moroi ba wehede nitemagu ba zi hauga fakhe silalö.”

BÖI TEBULÖ MOLOʼÖ BA BARANI

9. Hewisa wa tetandraigö woloʼö hegöi faʼabarani Gideono? (Faigi gambara ba guli majalah.)

⁹ Me no aefa mufataro Gideono tobali sanguhuku, tetandraigö woloʼö hegöi faʼabaraninia. Itema halöwö si möi famaʼalania yaʼia daʼö ba wanudugö naha wanunu sumange Mbaʼali khö namania. (Sangu. 6:25, 26) Aefa daʼö, me no iʼowuloi zaradadunia, dua kali mufaretakö Gideono ba wangalösi saradadunia andrö. (Sangu. 7:2-7) Ba gafuriata, mufaretakö ia ba wanuwö nose nudunia ba zi talu mbongi.—Sangu. 7:9-11.

10. Hewisa wa tetandraigö woloʼö ndra satua sokubaloi?

¹⁰ Moguna laforomaʼö gamuata ’foloʼö’ ira satua sokubaloi. (Yak. 3:17) Ira satua sokubaloi soloʼö, lö tebulö laʼoʼö wanuturu lala moroi ba Zura Niʼamoniʼö hegöi ba organisasi. Na ifalua daʼö, tola tobali ia duma-duma si sökhi khö ndra talifusöda. Hewaʼae simanö, tola manö tetandraigö woloʼönia. Duma-dumania, te oya wanuturu lala nitemania mazui asese tebulö wanuturu lala andrö irege abua khönia ba woloʼö yaʼia. Ba itaria irasoi wa fanuturu lala daʼö ambö tefaudu ba lö baga, mazui laʼandrö khönia ba wamalua halöwö si tola mameʼe yaʼia ba gurunga. Ba zalua simane daʼö, hewisa ndra satua sokubaloi ba woloʼö duma-duma Gideono?

11. Hadia zinangea lafalua ira satua sokubaloi na latema wanuturu lala?

¹¹ Haogö fondrondrongo wanuturu lala nibeʼe khöu ba falua daʼö. Ifatunö Lowalangi khö Gideono hewisa ia ba wanudugö naha wanunu sumange khö namania, hezo so ifazökhi naha wanunu sumange khö Yehowa, ba hadia manö gurifö sinangea iʼohe tobali sumange. Lö isofu-sofu wanuturu lala daʼö Gideono, hizaʼi ifalua simane sibai si no muwaʼö khönia. Iadaʼa, ira satua sokubaloi göi latema wanuturu lala moroi ba organisasi Yehowa na labaso ngawalö zura hegöi angombakhata. Fefu wanuturu lala daʼö möi fanoloda enaʼö taʼokhögö waʼahono dödö ba ahatö ita khö Yehowa. Tatu taʼomasiʼö sibai ndra satua sokubaloi. Lö faröi ira ba woloʼö fanuturu lala moroi ba organisasi, irege latema mbuania banua niha Keriso.—Si. 119:112.

12. Na so waʼatebulö ba organisasi, hewisa ndra satua sokubaloi ba woloʼö goi-goi ba Heberaiʼo 13:17?

¹² Oʼö waʼatebulö nifalua organisasi. Mböröta, ifaretakö Gideono Yehowa ba wangalösi saradadunia töra moroi ba zi 99 persen. (Sangu. 7:8) Tola manö so ba wangera-ngera Gideono: ’Hadia moguna ufalua daʼö? Na simane daʼö, hadia tola mofozu dania?’ Hewaʼae simanö, lö tebulö moloʼö Gideono. Iadaʼa, ira satua sokubaloi göi tola laʼoʼö duma-duma Gideono na so waʼatebulö nifalua ba organisasi. (Baso Heberaiʼo 13:17.) Duma-dumania, me döfi 2014, labulöʼö ira Boto Solohe lala ba wameʼe biaya ba wangehaogö tomosa Nahia Gangowuloa hegöi Nahia Gangowuloa Sebua. (2 Ko. 8:12-14) Lö moguna saʼae ba mbanua niha Keriso ba wamuʼa biaya niʼogunaʼö ba wamazökhi Nahia Gangowuloa. Hizaʼi, muʼowuloi fefu dolo-tolo nibeʼe mbanua niha Keriso ba zi sagörö ulidanö ba wangehaogö Nahia Gangowuloa gofu hezo so moguna. Börö daʼö, hewaʼae na no ide-ide dolo-tolo nibeʼe zi sambua banua niha Keriso, hizaʼi tola laʼokhögö Nahia Gangowuloa. No irai aombö dödö José me irongo waʼatebulö andrö. Imane tödönia, ’Na simane daʼa lalania, lö hadöi Nahia Gangowuloa si tola muʼotomosi. Lö tefaudu lala simane daʼö ba daʼa.’ Hadia zanolo José ba wotuhini faʼatebulö andrö? Imane, ”Fehede ba Gamaedola 3:5, 6 zamasugi ba dödögu enaʼö ufaduhusi tödö Yehowa. Ba sindruhu sa, no sahöli-höli dödö mbuania! Oya sibai Nahia Gangowuloa niʼotomosi. Börö wanuturu lala si bohou andre, faʼatöra ba nahia si sambua tola möi fonönö ba nahia tanö böʼö.”

13. (a) Hadia zi faduhu dödö Gideono? (b) Hewisa ndra satua sokubaloi ba woloʼö Gideono?

¹³ Falua zomasi Yehowa si fao faʼabarani. Lö tebulö moloʼö Gideono khö Yehowa hewaʼae na lö tola löʼö ifalua halöwö si möi famaʼalania ba irasoi waʼataʼu. (Sangu. 9:17) Me no aefa ifaduhuʼö khönia Yehowa, maʼifu lö faʼataʼu khö Gideono ba hasambalö itolo ia Lowalangi ba wolumöʼö ono mbanuania. Ira satua sokubaloi si toröi ba mbanua si lö manehegö halöwö nifaluada göi, moguna barani ira simane Gideono. Ladöniaʼö gangowuloa hegöi halöwö fanuriaigö hewaʼae na tola manö laraʼu ira, lazofu-zofu, laheta ira ba halöwöra mazui lafakao.c Sagötö alua wamakao sabölö-bölö dania, moguna barani ndra satua sokubaloi ba woloʼö fanuturu lala ba organisasi hewaʼae na fanuturu lala andrö tola manö möi famaʼalara. Te so wanuturu lala sanandrösa ba wamaʼema turia fanguhuku hegöi lala enaʼö tola teʼefaʼö ita na isuwö ita Gogi moroi ba Magogi.—Hez. 38:18; Fam. 16:21.

BÖI TEBULÖ ANAU GÖLÖU

14. Hewisa wa tetandraigö waʼanau gölö Gideono?

¹⁴ Iforege sibai Gideono ba wamalua halöwönia tobali sanguhuku. Me fasuwö ia ba niha Midiano ba zi bongi, moloi niha Midiano andrö. Aefa daʼö, Gideono hegöi saradadunia si 300 faʼato, lagohi nudura moroi ba mbawa danö Yezereʼeli ofeta ba nungo nidanö Yoridano safönu duʼu sodoi. (Sangu. 7:22) Hadia molombase Gideono ba nungo nidanö Yoridano? Löʼö! Hewaʼae na no marase Gideono hegöi si fao khönia, laʼötö nungo nidanö andrö ba wolohi udura. Ba gafuriata, tola lakhamö niha Midiano ba lakalaisi.—Sangu. 8:4-12.

15. Hewisa wa tola tetandraigö waʼanau gölö ndra satua sokubaloi?

¹⁵ Itaria, larasoi waʼamarase ira satua sokubaloi börö wondrorogö banua niha Keriso hegöi ösi nomora. Tola manö marase sibai wangera-ngerara. Na simane daʼö zalua, hewisa ndra satua sokubaloi ba woloʼö Gideono?

16-17. (a) Hadia zanolo Gideono enaʼö lö tebulö anau gölönia? (b) Hadia zi tola lafaduhusi tödö ira satua sokubaloi? (Yesaya 40:28-31) (Faigi göi gambara.)

¹⁶ Faduhusi tödö wa hasambalö iʼabölöʼö ndraʼugö Yehowa. Faduhu dödö Gideono wa hasambalö iʼabölöʼö ia Yehowa, ba daʼö göi nifalua Yehowa khönia. (Sangu. 6:14, 34) Samuza maʼökhö, Gideono hegöi saradadu Gizaraʼeli, lagohi darua razo Midiano sanörö gondra. (Sangu. 8:12, 21) Hewaʼae simanö, börö wanolo moroi khö Lowalangi, mofozu zaradadu Gizaraʼeli ba wogamö razo si darua andrö ba lakalaisi. Iadaʼa göi, ira satua sokubaloi tola laʼodaligö Yehowa börö me ”lö irai marase mazui tebai ia”. Hasambalö ibeʼe khöra waʼabölö ba ginötö moguna khöra.—Baso Yesaya 40:28-31.

¹⁷ Nehegö zi no irai alua khö Matthew, samorege ba wamalua halöwönia tobali anggota Panitia Penghubung Rumah Sakit. Hadia zanolo yaʼia enaʼö anau gölönia? Imane Matthew, ”No urasoi wa sindruhu wehede nisura ba Wilifi 4:13. Sasesenia, ba ginötö atage mazui ahori waʼabölögu, ulau mangandrö soroi ba dödö. Uʼandrö khö Yehowa enaʼö ibeʼe khögu waʼabölö ba faʼaro dödö enaʼö tola utolo ndra talifusöda. Ba ginötö simane daʼö, urasoi waʼabölö geheha Yehowa sanolo ba sangabölöʼö yaʼo enaʼö anau gölögu.” Simane Gideono, ira satua sokubaloi latehegö lataögö waʼabasaki ba ginötö lakubaloi nono mbanua Lowalangi. Sindruhu sa, moguna aboto ba dödöra wa so zoʼamböta ira, ba itaria tebai lafalua simane somasi dödöra. Hizaʼi, tola lafaduhusi tödö wa ifondrondrongo ngarö-ngarö dödöra Yehowa, ba ibeʼe khöra waʼabölö enaʼö anau gölöra.—Si. 116:1; Fil. 2:13.

18. Si tobali rahu-rahu, hewisa ndra satua sokubaloi ba woloʼö Gideono?

¹⁸ Oya wamahaʼö si tola lahalö ira satua sokubaloi moroi ba duma-duma Gideono. Moguna böi fayawa ira ba laforomaʼö wangide-ngideʼö ba wamatimbaisi hawaʼoya noro dödö si tola latema. Moguna göi laʼokhögö wangide-ngideʼö ba ginötö laʼamenesi mazui lasuno ira. Moguna moloʼö ba barani ndra satua sokubaloi, mendrua manö me no ahatö gamozua götö danö andre. Moguna faduhu dödöra wa gofu hadia ia waʼabasaki nitaögöra, hasambalö iʼabölöʼö ira Yehowa. Tatu taʼomasiʼö ba tafosumange ndra kubalo si lö tebulö mohalöwö ba wondrorogö yaʼita.—Fil. 2:29.