Itolo Ndraʼugö Yehowa ba Wanaögö Abula Dödö si Lö Mudöna-döna

1. Hadia zi tola faduhu dödöda?

YAʼITA ono mbanua Yehowa, faduhu dödöda wa iʼomasiʼö ita Yehowa ba omasi ia na tasöndra waʼowua-wua dödö. (Rom. 8:35-39) Faduhu göi dödöda wa hasambalö tatema mbua na taʼoʼö goi-goi Zura Niʼamoniʼö. (Yes. 48:17, 18) Hizaʼi, hewisa na alua khöda gabula dödö si lö tadöna-döna?

2. Hadia manö gabula dödö si tola manö alua khöda, ba hadia zi so ba wangera-ngerada?

² Fefu zamosumange Yehowa, lataögö gabula dödö. Duma-dumania, tola manö afatö dödöda ba nifalua nösi nomoda. Göna ita fökhö sabölö-bölö irege lö oya zi tola tafalua ba halöwö fanuriaigö. Göna ita bencana alam, mazui lafakao ita börö nifaduhusida tödö. Na alua khöda fefu daʼö, tola manö so ba wangera-ngerada, ’Hana wa tola alua khögu daʼa? Hadia zala si no ufalua? Hadia lö ifahowuʼö ndraʼo Yehowa?’ Hadia no irai örasoi zimane daʼö? Na noa, böi so khöu waʼide-ide dödö. Ato nono mbanua Lowalangi si lö faröi, no irai larasoi zimane daʼö.—Si. 22:1, 2; Hab. 1:2, 3.

3. Hadia wamahaʼö si tola tahalö moroi ba Zinunö 34:19?

³ Baso Zinunö 34:19. Nehegö so dombua zi tohude niforomaʼö ba ayati daʼa: (1) Tola manö alua gabula dödö ba niha satulö tödö. (2) Tola iʼefaʼö ita Yehowa moroi ba gabula dödö. Hewisa wamalua Yehowa daʼö? Sambua lalania yaʼia daʼö itolo ita enaʼö taʼokhögö lala wangera-ngera si tefaudu sanandrösa ba waʼaurida ba gulidanö iadaʼa. Sindruhu sa, no ifabuʼu Yehowa wa hasambalö tasöndra waʼomuso dödö na tafosumange ia. Hizaʼi, lö niwaʼönia wa lö alua gabula dödö ba waʼaurida iadaʼa. (Yes. 66:14) No ibeʼe khöda dötönafö enaʼö auri ita sagötö faʼara ba zi so miföna, ba omasi ia na taʼosambuaʼö dödöda ba dötönafö andrö. (2 Ko. 4:16-18) Hizaʼi, fatua lö alua dötönafö andrö, itolo ita enaʼö lö tebulö anau gölöda ba wamosumange yaʼia ero maʼökhö.—Nge. 3:22-24.

4. Hadia nitutunöda ba artikel daʼa?

⁴ Datatutunö ösa zi no irai alua khö genoni Yehowa si lö faröi ba götö Zura Niʼamoniʼö hegöi ba götöda iadaʼa. Simane nitutunöda dania, tola manö alua khöda gabula dödö si lö tadöna-döna. Hizaʼi, na taʼodaligö Yehowa, hasambalö ituhini ita. (Si. 55:22) Ba ginötö tatutunö waö-waö salua andrö, angeragö wanofu-nofu daʼa: ’Hadia zi tola ufalua na alua khögu zimane daʼö? Hewisa waö-waö salua andrö möi fanologu enaʼö itugu faduhu dödögu khö Yehowa? Hadia wamahaʼönia ba waʼaurigu samösa?’

BA GÖTÖ ZURA NIʼAMONIʼÖ

5. Hadia gabula dödö salua khö Yakobo? (Faigi gambara ba guli majalah.)

⁵ So ösa genoni Yehowa ba götö Zura Niʼamoniʼö, no irai alua khöra gabula dödö si lö ladöna-döna. Samösa ba gotaluania yaʼia daʼö Yakobo. Ifarou ia amania Izaʼaki enaʼö mangowalu ia khö nono Labano, si fahatö khöra ba si sara lala wamati. Ifaduhuʼö ba dödö Yakobo Izaʼaki, wa hasambalö ifahowuʼö ia Yehowa. (1 Mo. 28:1-4) Iʼoʼö wehedenia andrö Yakobo. Iröi Ganaʼana ba möi ia ba nomo Labano. So darua nono alawe khö Labano—Lea faoma Rakhela. Omasi Yakobo khö Rakhela, ba ilau mohalöwö khö Labano fitu fakhe waʼara enaʼö tola mangowalu ia khö Rakhela. (1 Mo. 29:18) Hizaʼi ba gafuriata, tenga simane nidöna-döna Yakobo zalua khönia. Ilimo ia Labano enaʼö mangowalu ia khö gaʼa Rakhela sotöi Lea. Itehegö Labano khö Yakobo enaʼö mangowalu ia khö Rakhela samigu aefa daʼö, hizaʼi moguna mohalöwö khönia Yakobo fitu fakhe tö. (1 Mo. 29:25-27) Lö tebulö ifalua zi lö atulö Labano khö Yakobo sagötö mohalöwö ia ba zi 20 fakhe faʼara!—1 Mo. 31:41, 42.

6. Hadia nasa gabula dödö tanö böʼö salua khö Yakobo?

⁶ Alua gabula dödö tanö böʼö khö Yakobo. Ato sibai nösi nomonia, hizaʼi lö faʼatulö ba gotalua ndraononia. Lafamawa nakhira sotöi Yosefo tobali sawuyu. Darua nono Yakobo sotöi Simeoni ba Lewi, lafalua horö sebua irege teʼobousi döi nösi nomora hegöi töi Yehowa. Baero daʼö, mate woʼomonia niʼomasiʼönia sotöi Rakhela me moʼono ia numero dua. Ba göna ira lofo sabölö-bölö irege möi Yakobo ba danö Miserai hewaʼae no atua ia.—1 Mo. 34:30; 35:16-19; 37:28; 45:9-11, 28.

7. Hewisa wangoromaʼö Yehowa wa iʼomasiʼö Yakobo?

⁷ Hewaʼae na alua gabula dödö khö Yakobo, lö tebulö mamati ia khö Yehowa hegöi ba mbuʼusa linia. Ba iforomaʼö göi Yehowa wa iʼomasiʼö Yakobo. Duma-dumania, hewaʼae na no ifalua zi lö atulö Labano khö Yakobo, lö tebulö ifahowuʼö gokhöta Yakobo Yehowa. Ba khalaigö hadia nirasoi Yakobo me ifuli falukha ia khö Yosefo si no mate ba wamaiginia! Tatu iʼandrö sibai saohagölö Yakobo khö Yehowa. Tola anau gölö Yakobo ba wanaögö abula dödö salua khönia börö me fahuwu ia khö Yehowa. (1 Mo. 30:43; 32:9, 10; 46:28-30) Na fahuwu göi ita khö Yehowa, tola anau gölöda ba wanaögö abula dödö salua si lö mudöna-döna.

8. Hadia zomasi ifalua Razo Dawido?

⁸ So ösa zi tebai ifalua Razo Dawido somasi ia ifalua khö Yehowa. Duma-dumania, omasi ia wamazökhi osali khö Lowalanginia, ba ifatunö daʼö khö zamaʼeleʼö sotöi Natano. Ba imane khönia Natano, ”Falua hadia manö zomasi dödöu, börö me fao khöu Lowalangi sindruhu.” (1 Ng. 17:1, 2) Tatu tefarou sibai dödö Dawido ba wehede daʼö. Tola manö iʼanemaiʼö ihenaigö zoguna ba domosa andrö.

9. Hadia nifalua Dawido me itema duria sangaʼasogö khönia faʼafatö dödö?

⁹ Lö ara aefa daʼö, ifuli möi zamaʼeleʼö khö Yehowa ba wamalukhaisi Dawido, ba ifaʼema duria sangaʼasogö khönia faʼafatö dödö. ”Bongi daʼö”, ifatunö Yehowa khö Natano wa tenga Dawido zamazökhi osali andrö. Hizaʼi, so dania fazamösa ba gotalua nononia zamalua daʼö. (1 Ng. 17:3, 4, 11, 12) Hadia nifalua Dawido me irongo daʼö? Ifaudugö wangera-ngerania. Iʼosambuaʼö dödönia Dawido ba wangowuloi kefe hegöi gama-gama niʼogunaʼö nononia Selomo ba wamazökhi osali.—1 Ng. 29:1-5.

10. Hewisa wamahowuʼö Yehowa Dawido?

¹⁰ Me no aefa ifatunö khö Dawido wa tenga yaʼia zangehaogö osali, so sambua mbuʼusa li Yehowa khö Dawido. Ifabuʼu khönia wa so samösa moroi ba ngaʼötönia dania zamatörö irugi zi lö aetu. (2 Sa. 7:16) Ba gulidanö si bohou dania, sagötö Wamatörö si Saribu Fakhe, tatu omuso dödö Dawido me iʼila haniha Razo ba wamatörö andrö yaʼia daʼö Yesu, samösa moroi ba ngaʼötönia! Hadia wamahaʼönia? Hewaʼae na tebai tafalua hadia zomasi ita tafalua khö Yehowa, hasambalö ifahowuʼö ita ba lala tanö böʼö ba zi lö tadöna-döna.

11. Hewisa wamahowuʼö Yehowa famorege nifalua niha Keriso me abad siföföna? (Halöwö Zinenge 6:7)

¹¹ Niha Keriso me abad siföföna, alua göi khöra gabula dödö si lö ladöna-döna. Duma-dumania, labalo-baloi sibai waʼatohare Wamatörö Lowalangi, hizaʼi lö laʼila hawaʼara alua daʼö. (Hal. 1:6, 7) Hadia nifaluara? Lö tebulö lafatunö duria somuso dödö. Me manuriaigö ira ba zi hauga nahia, tola laʼila wa ifahowuʼö wamorege nifaluara Yehowa.—Baso Halöwö Zinenge 6:7.

12. Hadia nifalua niha Keriso me abad siföföna me alua mbaŵa lofo?

¹² Samuza inötö, alua mbaŵa lofo sabölö-bölö ”ba zi sagörö ulidanö”. (Hal. 11:28) No göi irai alua daʼö ba niha Keriso me abad siföföna. Khalaigö hawaʼabasaki zalua khöra me luo daʼö. Tatu aombö dödö högö yomo ba nomo woʼangeragö hewisa wamönökhi soguna ba nösi nomora. Hewisa göi zi bohou ebua si no motatugöi ohitö dödönia enaʼö oya zi tola ifalua ba halöwö fanuriaigö? Tola manö tetaha sabata ba wamalua si no laʼera-era andrö. Gofu hadia zalua ba niha Keriso me luo daʼö, lö tebulö lafaudugö waʼaurira. Lö aetu lafalua halöwö fanuriaigö, ba omuso dödöra ba wameʼe haratora ba wanolo ira talifusöra ba wamati si so ba Yudea.—Hal. 11:29, 30.

13. Hadia manö howu-howu nitema niha Keriso sagötö alua mbaŵa lofo?

¹³ Sagötö alua mbaŵa lofo, hadia manö howu-howu nitema niha Keriso? Yaʼira sanema dolo-tolo, tola laʼila samösa hewisa wanolo Yehowa yaʼira. (Mat. 6:31-33) Daʼö zamarou tödöra enaʼö itugu fahuwu ira khö dalifusöra si sara lala wamati si no manolo yaʼira. Ba yaʼira si no mameʼe dolo-tolo, mazui si fao ba wameʼe dolo-tolo ba waʼaniha, lasöndra göi waʼomuso dödö börö me no mamuala ira. (Hal. 20:35) Ifahowuʼö ira Yehowa börö me omasi ira wamaudugö faʼaurira ba ginötö alua waʼatebulö.

14. Hadia zalua khö Mbaranaba hegöi Faulo, ba hadia mbuania? (Halöwö Zinenge 14:21, 22)

¹⁴ Asese lataögö wamakao niha Keriso me abad siföföna. Itaria, lafakao ira ba zi lö ladöna-döna. Nehegö zalua khö Mbaranaba hegöi Faulo me manuriaigö ira ba mbanua Lisitera. Ba wamobörö, omasi niha ba wanemaʼö yaʼira ba lafondrondrongo hadia niwaʼöra. Hizaʼi ba gafuriata, ira si faʼudu khöra ”lafaweʼe niha sato” irege latebu kara Waulo ba laröi ia saʼae me lawalinga no mate. (Hal. 14:19) Hizaʼi, Baranaba hegöi Faulo, lö tebulö manuriaigö ira ba nahia tanö böʼö. Buania, ”ato niha nitolora tobali nifahaʼö”, ba tefarou göi dödö ndra talifusö börö wehedera hegöi duma-duma nibeʼera. (Baso Halöwö Zinenge 14:21, 22.) Ato niha zanema bua börö me lö awuwu Mbaranaba hegöi Faulo me alua khöra wamakao si lö ladöna-döna. Na lö tebulö tafalua halöwö nibeʼe Yehowa ba lö awuwu ita, hasambalö ifahowuʼö ita Yehowa.

BA GÖTÖDA ANDRE

15. Hadia wamahaʼö nihalömö moroi ba duma-duma dalifusöda A. H. Macmillan?

¹⁵ Fatua lö döfi 1914, labalo-baloi ono mbanua Yehowa zalua si tohude. Duma-dumania, nehegö zi no irai alua khö dalifusöda A. H. Macmillan. Simane ira talifusöda tanö böʼö me luo daʼö, so ba wangera-ngera dalifusöda Macmillan wa lö ara tö möi ia ba zorugo. Ba huhuo nifaʼemania ba mbaŵa si Siwa 1914, imane wangumaʼö, ”Te daʼa huhuo safuria nifaʼemagu.” Hizaʼi sindruhunia, tenga huhuonia safuria daʼö. Ba gafuriata, imane ba zurania talifusöda Macmillan, ”Te so ösa ba gotaluada salio wangai angetula ba wangumaʼö wa ba zi lö ara tö möi ita ba zorugo.” Inönö nasa wangumaʼö, ”Halöwö si lö tola löʼö tafalua yaʼia daʼö taforege ba wangai halöwö khö Zoʼaya.” Owölö-ölö dalifusöda Macmillan ba wamalua halöwö fanuriaigö. Labeʼe khönia halöwö ba wamarou tödö ndra talifusöda nikuru me luo daʼö börö me lö fao ira ba dinas militer. Ba lö göi iröi weʼamöi ba gangowuloa hewaʼae no atua ia. Hadia mbua nirasoi dalifusöda Macmillan börö me lö tebulö ifalua halöwö ba wamosumange Yehowa? Lö ara fatua lö mate ia me döfi 1966, imane ba zurania, ”Irugi maʼökhö andre, lö tebulö aro wamatigu.” Tobali duma-duma si sökhi khöda gamuata dalifusöda Macmillan, mendrua manö na ara sibai tataögö gabula dödö!—Heb. 13:7.

16. Hadia gabula dödö nitaögö dalifusöda Herbert Jennings hegöi foʼomonia? (Yakobo 4:14)

¹⁶ Ato nono mbanua Yehowa zamorege ba wanaögö fökhö si lö ladöna-döna. Duma-dumania, nehegö zalua khö dalifusöda Herbert Jennings.b Itutunö ba waö-waö waʼaurinia wa yaʼia hegöi foʼomonia ira alawe, omuso sibai dödöra wamalua halöwö fanuriaigö tobali utusan injil ba Ghana. Hizaʼi, lö ara aefa daʼö, göna ia fökhö wangera-ngera. Me itutunö zalua khönia andrö talifusöda Jennings, itötöi nisura ba Yakobo 4:14, ifotöi daʼö ”’ngaluo mahemolu’ si lö tadöna-döna.” (Baso.) Imane, ”Si fao faʼebolo dödö, mafaʼanö ndraʼaga ba wondröi Ghana hegöi ira si fahuwu khöma, ba mangawuliga ba Kanada [ba wangalui dalu-dalu].” Lö tebulö ibeʼe wanolo Yehowa khö dalifusöda Jennings hegöi foʼomonia enaʼö lö laböhöli wamosumange yaʼia ba lö faröi ira hewaʼae alua khöra gabula dödö.

17. Hewisa duma-duma dalifusöda Jennings möi fanolo khö ndra talifusöda tanö böʼö?

¹⁷ Fehede nifaʼema dalifusöda Jennings ba waö-waö waʼaurinia, möi fanolo ba niha böʼö. Samösa dalifusöda ira alawe imane ba zurania, ”Lö irai asöndru sibai dödögu ba zilalö simane me ubaso artikel daʼa. . . . Me no aefa ubaso hewisa dalifusöda Jennings me irongo wa hasambalö iröi halöwönia börö wangalui dalu-dalunia, tola möi fanologu daʼö ba wamaigi salua khögu ba lala wangera-ngera si tefaudu.” Imane talifusöda tanö böʼö, ”Me no aefa tebeʼe khögu noro dödö tobali satua sokubaloi ba zi fulu fakhe, lö tola löʼö uheta khögu halöwö daʼö börö wökhö wangera-ngeragu. Hulö lö mofozu ndraʼo ba wamaigigu, irege asese depresi ndraʼo na ubaso artikel waö-waö waʼauri. . . . Hizaʼi, faʼanau gölö dalifusöda Jennings möi fondrara dödögu.” Bua gera-erara andre zamasugi ba dödöda, wa tola möi fangabölö niha böʼö waʼanau gölöda ba wanaögö abula dödö si lö tadöna-döna. Börö daʼö, hewaʼae na faʼaurida andre lö tefaudu ba zi no tadöna-döna, hizaʼi famati ba faʼanau gölöda tola tobali duma-duma daʼö ba niha böʼö.—1 Fe. 5:9.

18. Simane niʼilamö ba gambara, hadia wamahaʼö nihalömö khö dalifusöda lakha mbanua ba Nigeria?

¹⁸ Molua-lua ba waʼauri nono mbanua Yehowa COVID-19. Duma-dumania, samösa dalifusöda lakha mbanua ba Nigeria, ha maʼifu gefe hegöi ö niʼokhögönia. Samuza maʼökhö me sihulö wongi, irino göra safuria sibai. Isofu khönia ononia hadia niʼara na no aefa daʼö. Ifatunö talifusöda ira alawe andrö khö nononia wa lö hadöi saʼae kefera hegöi ö si tola laʼogunaʼö. Hizaʼi, iwaʼö göi wa moguna laʼoʼö duma-duma lakha mbanua moroi ba Zarefa. Lafaʼanö gö safuria niʼogunaʼöra, ba mamati ira khö Yehowa. (1 Ra. 17:8-16) Fatua lö laʼera-era hadia niʼara ba zi laluo, so paket sofeta khöra nifaʼoheʼö ndra talifusöra ba wamati. Bakha ba paket daʼö, so gö si tola laʼa sagötö zi dua migu faʼara. Iwaʼö talifusöda ira alawe andrö wa lö itötöna wa irongo Yehowa wehede nifaʼemania khö nononia. Na taʼodaligö Yehowa, tola möi famahatöda khönia gabula dödö si lö tadöna-döna.—1 Fe. 5:6, 7.

19. Hadia gabula dödö nitaögö dalifusöda Aleksey Yershov?

¹⁹ Barö zi hauga fakhe silalö, ato ndra talifusöda sanaögö famakao si lö ladöna-döna. Nehegö duma-duma dalifusöda Aleksey Yershov, si toröi ba Rusia. Me tebayagö idanö dalifusöda Yershov me döfi 1994, lö taha-taha ba nono mbanua Yehowa ba wamalua famosumange. Hizaʼi, hauga fakhe aefa daʼö, tebulö zalua ba Rusia. Me döfi 2020, lafareso nomo dalifusöda Yershov, ba oya gama-gamania nihalö. Hauga waŵa aefa daʼö, lafobahulu ia ira samatörö wa no tobali ia niha samalua si lö sökhi. Ba sabölö-bölönia, lahalö dane-dane wamobahulura andrö ba rekaman video nihaogö zi samösa niha si falimo ba wamahaʼö yaʼia ba Zura Niʼamoniʼö ba zi töra döfi faʼara. Sindruhu-ndruhu wa si manga mböli daʼö!

20. Hadia mbörö wa itugu fahuwu dalifusöda Yershov khö Yehowa?

²⁰ Hadia so mbua si sökhi moroi ba wamakao salua khö dalifusöda Yershov? So. Itugu aro wahuwusania khö Yehowa. Imane wangumaʼö, ”Yaʼo hegöi foʼomogu ira alawe, itugu asese malau mangandrö. Aboto ba dödögu wa tola anau gölögu ha börö wanolo moroi khö Yehowa.” Inönö nasa wangumaʼö, ”Tola möi fanologu wamahaʼö samösa. Uʼangerönusi duma-duma ndra enoni Lowalangi ba götö föna. Oya waö-waö salua nisura ba Zura Niʼamoniʼö sangoromaʼö wa moguna so khöda waʼahono dödö ba lö tebulö tafaduhusi tödö Yehowa.”

21. Hadia zi no tafahaʼö yaʼita ba artikel daʼa?

²¹ Hadia zi no tafahaʼö yaʼita ba artikel daʼa? Itaria, alua khöda gabula dödö si lö tadöna-döna. Hewaʼae simanö, lö tebulö itolo nono mbanuania Yehowa na laʼodaligö ia. Imane wangumaʼö ba ayati duho artikel andre, ”Oya gabula dödö niha satulö, hizaʼi iʼefaʼö ia Yehowa moroi ba daʼö fefu.” (Si. 34:19) Börö daʼö, böi taʼosambuaʼö dödöda ba gabula dödö salua khöda, hizaʼi taʼosambuaʼö dödöda ba wanolo nibeʼe Yehowa. Na tafalua daʼö, tola tamane wangumaʼö simane niwaʼö sinenge sotöi Faulo, ”Tola utaögö fefu hadia ia börö waʼabölö nitemagu moroi khö Lowalangi.”—Fil. 4:13.