ULIDANÖ SAFÖNU ABULA DÖDÖ

1 | Rorogö Mbotomö Faböi Mofökhö

HANA WA MOGUNA

Na alua gabula dödö, moguna örorogö mbotomö faböi mofökhö ndraʼugö enaʼö tola ötaögö zalua andrö.

Na alua gabula dödö tola manö fawuka gera-era niha, ba na lö tebulö fawuka gera-erara tola manö laʼofökhöi.
Na alua bencana alam, pandemi mazui tanö böʼönia tola manö afönu rumah sakit ba ahori dalu-dalu.
Na alua gabula dödö sebua tola manö aekhu niha ba waʼatosasa. Abua khöra wombönökhi soguna ba nomo hegöi dalu-dalu.

Sinangea Öʼila

Na alua wökhö sabölö-bölö ba fawuka wangera-ngeramö, tola manö öhalö gangetula si fasala. Duma-dumania lö saʼae tödöu ba wondrorogö botomö ba lua-luania mofökhö ndraʼugö.
Na lö öʼameʼegö tödö, luania-luania itugu abölö-bölö wökhöu ba tola manö teʼala waʼauriu.
Na lö mofökhö ndraʼugö, tola öhalö gangetula si sökhi na alua khöu gabula dödö.
He niha si kayo ndraʼugö mazui niha si tosasa, tola örorogö mbotomö faböi mofökhö ndraʼugö.

Si Tola Öfalua

Niha satua-tua, iforege enaʼö lö göna ia na so deʼala. Duma-dumania, ba wondrorogö boto. Tola örorogö mbotomö hegöi omomö faböi taʼunö. Na öfalua daʼö, no öʼaröuʼö ndraʼugö ba wökhö, ba hewaʼae na göna ndraʼugö, lö abölö-bölö sibai. Abölö sökhi wanimbagö moroi ba wodalu-daluni.

”Maforege enaʼö lö taʼunö nomoma hegöi botoma. Me mafalua daʼö, lö oya ahori gefema ba wowöli dalu-dalu hegöi ba wamalukhaisi doto.”—Andreas.a

a So ösa zi no mufaböʼöni töi ba majalah daʼa.

LALA BA WANAÖGÖ—Fanuturu Lala

Hewaʼae na ötaögö gabula dödö, tola möi fanolomö wanuturu lala andre enaʼö lö mofökhö ndraʼugö

ROROGÖ FABÖI TAʼUNÖ

Rorogö faböi taʼunö

Imane Sura Niʼamoniʼö: ”Niha satua-tua ibiniʼö ia na so deʼala.” (Amaedola 22:3) Tandraigö angeragö hadia manö zi tola tobali börö wökhöu ba timbagö daʼö.

Aseseʼö sasai dangau ba fake sabu, mendrua manö fatua lö manga mazui muʼotarai ba WC.
Haogö nomomö ero inötö enaʼö böi taʼunö. Tola göi öʼogunaʼö disinfektan, mendrua manö ba gama-gama sasese mubabaya.
Na tola, böi fahatö-hatö ndraʼugö ba niha sofökhö.

A GÖ SI SÖKHI

A gö si sökhi

Imane Sura Niʼamoniʼö: ”Lö hadöi niha si fatuwu ba mbotonia, hizaʼi iʼomasiʼö ba ibeʼe mbalazo.” (Efeso 5:29) Na taʼomasiʼö mbotoda, mangelama ita ba niʼa mazui ba nibadu.

Oyaʼö wamadu idanö.
A ngawalö sayu hegöi bua zinanö.
Alösi wemanga sofanikha, asio hegöi gulo.
Böi oroko, böi ogunaʼö narkoba ba böi kila wamadu tuo.

”Lö ebua zinöndrama. Börö daʼö enaʼö lö asese möiga ba rumah sakit, maʼodödögö wemanga gö si sökhi. Abölö sökhi maʼogunaʼö gefema ba mböli göma.”—Carlos.

BÖI AMBÖ FEMÖRÖ HEGÖI OLAHRAGA

Olahraga

Imane Sura Niʼamoniʼö: ”Sökhi zi sagokhö faʼahono dödö moroi na dua gokhö waʼerege dödö ba famorege ba wolohi angi.” (Sangombakha 4:6) Sindruhu wa moguna khöda halöwö, hizaʼi moguna göi khöda wolombase.

Böi förö-förö manö. Tandraigö törö tanö. Na asese öfageha mbotomö, lö alio mofökhö ndraʼugö hewaʼae na no alawa ndröfimö mazui so zoʼamböta ba mbotomö.
Böi ambö femörö

Bönökhi ginötö wemöröu. Na ambö femöröu, alio sibai fawuka gera-eramö ba lö öʼila öʼosambuaʼö dödöu. Na asese ambö femöröu, tola manö göna ndraʼugö fökhö sabölö-bölö.
Tatugöi ginötö wemöröu ba falua daʼö. Tandraigö förö ba faoso ba ginötö si fagölö ero maʼökhö.
Böi faigi TV mazui perangkat elektronik fatua lö mörö.
Böi kila wemanga, mamadu kofi hegöi tuo fatua lö mörö.

”Aboto ba dödögu wa moguna sibai khögu wemörö enaʼö lö mofökhö ndraʼo. Na ambö femörögu, itaria afökhö högögu ba agafökhö nösigu. Hizaʼi, na obönö wemörögu terou dödögu wohalöwö. Ha fataria na mofökhö ndraʼo.”—Justin.