Faböʼö Zalua Na No Tumbu Ndraono

Omuso dödö zi no mongambatö na tumbu khöra ndraono, ba monönö göi waʼoya halöwöra. Na awena tobali ami satua, te lö midöna-döna wa oya ginötö, faʼabölö sahori ba wondrorogö ono sawuyu. Börö na ambö femörö, itaria alio mofönu, irege lö fahede ami khö nawömi. Yaʼami si darua zamaigi hadia zinangea mifalua ba wondrorogö ono sawuyu ba ba wondrorogö fongambatömi. Hewisa goi-goi Zura Niʼamoniʼö wanolo yaʼami?

1 BOTOKHI BA DÖDÖU ZALUA

HADIA NIWAʼÖ ZURA NIʼAMONIʼÖ: ”Faʼomasi andrö ba no sebolo tödö, no sebua tödö.” Aefa daʼö, faʼomasi andrö ”lö iʼalui dana khönia, lö mofönu ia.” (I Korindro 13:4, 5) Na awena tumbu ndraono, sinangea na foʼomo ira alawe abölö iʼosinangegö nononia sawena tumbu. Ibörögö tumbu ba dödö woʼomo ira matua wa iʼosiwawöi ia foʼomonia ira alawe. Böi olifu ndraʼugö wa sinangea öʼosinangegö göi woʼomou ira matua. Alui lala enaʼö iʼila wa öʼosinangegö ia, faogö ia ba wondrorogö iraonomi sawena tumbu.

”Simanö göi ndra matua . . . mihaogö waʼorudu ba ndra alawemi, me no öna-öna waʼabölöra.” (I Fetero 3:7) Moguna aboto ba dödöu waʼerege dödö woʼomo ira alawe ba wondrorogö onomi sawena tumbu. Monönö waʼoya halöwönia irege alangu dödönia, marase ia, ba itaria iʼofökhöi waʼerege dödönia. Tola manö itaria abao dödönia khöu. Tobali, böi busi dödöu, börö me ”yawa zabölö zebolo tödö”. (Gamaedola 16:32) Oromaʼö waʼahakhö dödö ba ötolo ia.—Gamaedola 14:29.

SI TOLA ÖFALUA:

• Ama: Tolo woʼomou ira alawe ba wondrorogö onomi sawena tumbu, he na ba zi bongi. Alösi ginötöu ba halöwöu tanö böʼö enaʼö oya ginötö sitola öbeʼe khö woʼomou ba khö nonomi

• Ina: Böi timbagö na itolo ndraʼugö foʼomou ira matua ba wondrorogö onomi sawena tumbu. Na lö fao ba dödöu nifaluania, böi fatahi-tahi, haogö wangumaʼö khönia hezo zi sökhi

2 AʼAROʼÖ WAHUWUSAMI

HADIA NIWAʼÖ ZURA NIʼAMONIʼÖ: ”Ha sambua boto ira.” (I Moze 2:24) Hewaʼae no so nonomi, törö tödöu wa ”ha sambua boto” ami ngambatöu. Odödögö wangaʼaroʼö fahuwusami.

Foʼomo ira alawe, andrö saohagölö me no itolo ndraʼugö ngambatöu. Na öfosumange ia, daʼö zi tobali ”dalu-dalu”, eluahania si tola mangaʼaroʼö fahuwusami ba zalua andre. (Gamaedola 12:18) Foʼomo ira matua, fatunö khö ngambatöu wa öʼomasiʼö ba öfosumange ia. Suno halöwö si no ifalua yomo ba nomo.—Gamaedola 31:10, 28.

”Böi ya muʼalui zoguna khönia zamösana, soguna khö nawönia ya muʼalui.” (I Korindro 10:24) Böi bato wamalua si sökhi khö ngambatöu. Mibeʼe ginötömi ba zi ha darua ami ba wahuhuosa, ba wosuno si no mifalua zamösana, ba faoma mifondro-ndrongo wehede nawömi. Ba waʼorudu, böi ha somasi ndraʼugö öfalua. Angeraigö hadia zomasi ngambatöu göi. Imane Sura Niʼamoniʼö, ”böi mifabali ami khö nawömi, hatö na lö ara na ha sara limi.” (I Korindro 7:3-5) Mifatunösi daʼa ba zi ha darua ami, si lö fawini tödö. Faʼaboto ba dödö ba faʼebolo dödö zangaʼaroʼö fahuwusami.

SI TOLA ÖFALUA:

• Böi olifu ndraʼugö wameʼe inötö ba zi ha darua ami

• Beʼe mbuala side-ide khö ngambatöu si tobali tandra wa öʼomasiʼö ia, faʼoheʼö khönia mbunga mazui boneka

3 FAHAʼÖ NONOU SAWENA TUMBU

HADIA NIWAʼÖ ZURA NIʼAMONIʼÖ: ”Awö wa no öʼila Zura Niʼamoniʼö andrö, iʼotarai iraono ndraʼugö, sangila mangatua-tuaʼö yaʼugö ba wangalui fangorifi.” (II Timoteo 3:15) Henaigö miʼangeraigö hewisa wamahaʼö iraonomi. Tola itema wamahaʼö iraono si so ba dalu, tola irongo limi ba tola irasoi hadia zalua khömi. Baso-baso mbuku ba ndraono sawena tumbu. Hewaʼae lö iʼila geluaha nasa, tola omasi ia wombaso-mbaso dania na no ebua ia.

Böi öwaʼö tödöu lö iʼila geluaha nasa iraono sawuyu na ufatunö khönia sanandrösa khö Lowalangi. Faogö ia na mangandrö ndraʼugö khö Yehowa. (V Moze 11:19) Ba ginötö famai-mai ndraʼugö khönia, fatunö nifazökhi Lowalangi. (Zinunö 78:3, 4) Itugu tedou waʼebuania, iʼila hewisa waʼomasimi khö Yehowa, ba ifomaha ia wangomasiʼö Yehowa göi.

SI TOLA ÖFALUA:

• Andrö wanuturu lala khö Lowalangi ba wamahaʼö onou

• Aseseʼö wanötöi tuho nifahaʼömö yaʼia enaʼö tola tefamaha ia iʼotarai waʼide-idenia