Lala ba Wamahaʼö Iraono

Yehowa, sangaʼasogö fongambatö, no ibeʼe halöwö zatua ba wamahaʼö iraonora. (Kolose 3:20) Yaʼami satua, sinangea mifahaʼö nonomi ba wangomasiʼö Yehowa ba enaʼö tobali ira niha sangonorogö tödö halöwö nibeʼe khöra na no ebua ira. (II Timoteo 1:5; 3:15) Mifaigi hewisa lala enaʼö miʼila nösi dödö ndraonomi. Moguna mibeʼe ami duma-duma si sökhi khöra. Tola mifahaʼö nonomi ba Daromali Yehowa, na no oföna so Daromali andrö ba dödömi.—Zinunö 40:9.

1 BÖI TOBALI LABINIʼÖ ZI SO BA DÖDÖRA IRAONO

HADIA NIWAʼÖ ZURA NIʼAMONIʼÖ: ”Ndra muʼalioʼö wamondrongo, böi ndra mufahulö wehede.” (Yakobo 1:19) Tatu omasi ami na lafatunö khömi hadia ia iraonomi. Andrö, moguna laʼila wa omasi ami mifondro-ndrongo na fahuhuo ira. Aʼasogö waʼowua-wua dödö ba nomo enaʼö aoha ba ndraono wamatunö ösi dödöra. (Yakobo 3:18) Na laʼila mofönu ami ba mihuku ira, tola manö labiniʼö zi so ba dödöra. Andrö, mibologö dödömi ba ndraonomi. Aseseʼö foromaʼö wa si ndruhu-druhu öʼomasiʼö ira.—Mataiʼo 3:17; I Korindro 8:1.

SI TOLA ÖFALUA:

• Haogö wamondro-ndrongo na fahuhuo ndraonomi

• Miʼaseseʼö fahuhuo ba ndraonomi, böi ha ba ginötö so gabula dödöra

2 BOTOKHI BA DÖDÖU HADIA GELUAHA WEHEDERA

HADIA NIWAʼÖ ZURA NIʼAMONIʼÖ: ”Sanöngöni taromali andrö ba isöndra waʼohahau dödö.” (Gamaedola 16:20) Itaria, na ha asala örongo wehedera, lö abönö ba wangiʼila hadia zi ndruhunia nösi dödöra. Sasesenia ndraono lawaʼö zi tenga yaʼia ba wombiniʼö ösi dödöra. ”Na so zanema li, na lö nifondro-ndrongonia, ba tebeʼe fa lö tödö ba fangaila khönia.” (Gamaedola 18:13) Böi alio abao dödöu.—Gamaedola 19:11.

SI TOLA ÖFALUA:

• Gofu hadia niwaʼö ndraonomi, böi miʼetuʼö dalu huhuora mazui mifetaʼu ira

• Törö tödöu hewisa ndraʼugö me iraono, hadia zi so ba dödöu, ba hadia zabölö öʼofönaiʼö ba waʼauriu

3 FOROMAʼÖ WA FAGÖLÖ GERA-ERAMI

HADIA NIWAʼÖ ZURA NIʼAMONIʼÖ: ”Fondro-ndrongo onogu wamangelama namau, ba böi ositengagö wamahaʼö ninau andrö.” (Gamaedola 1:8) No ibeʼe Yehowa kuaso ba zatua ba wamatörö iraonora. Mifahaʼö ndraonomi enaʼö lafosumange ba laʼoʼö limi. (Efeso 6:1-3) Laʼila iraono na lö ’fahasara dödö’ ba zatuara. (I Korindro 1:10) Na itaria lö fahasara dödö khömi yaʼami satua, böi miforomaʼö ba ndraono, tola dania lö lafosumange ami.

SI TOLA ÖFALUA:

• Mihaogö wamatunö hewisa wameʼemi fotu ba ndraonomi

• Na faböʼö zinöndra dödömi foʼomou sanandrösa ba wameʼe fotu ba ndraono, mitandraigö miʼangeraigö hadia zi so ba wangera-ngera ngambatömi

4 HENAIGÖ ERA-ERA

HADIA NIWAʼÖ ZURA NIʼAMONIʼÖ: ”Fahaʼö nono matua fatua so ginötö.” (Gamaedola 22:6) Lö iʼanemaiʼö mowua mene-meneda ba ndraono. Moguna muʼangeraigö hewisa wamahaʼö yaʼira awö wameʼe fotu khöra. (Zinunö 127:4; Gamaedola 29:17) Fameʼe fotu tenga ha fao bözi-bözi, tobali labotokhi ba dödönia hana wa lafotu ia. (Gamaedola 28:7) Fahaʼö ira ba wangomasiʼö Taromali Yehowa awö goi-goinia. (Zinunö 1:2) Na mufalua daʼö, tola so khöra dödö side-ide sohau-hau.—Heberaiʼo 5:14.

SI TOLA ÖFALUA:

• Faigi lala enaʼö laʼila iraonou wa so Lowalangi ba enaʼö lafaduhusi tödö

• Tolo ira enaʼö laʼila hadia manö gamuata wohorö ba enaʼö laʼaröuʼö ira ba daʼö, simane si so ba internet. Fahaʼö ira enaʼö laʼangelamaisi na so zondrönisi yaʼira ba wamalua amuata wohorö