FAMAHAʼÖ 8
Ogunaʼö Duma-Duma ba Wamahaʼö
Mataiʼo 13:34, 35
RAHU-RAHU: Enaʼö tedou lala wamahaʼömö, ogunaʼö duma-duma irege adöni dödö zamondrongo ba tola lahalö wamahaʼö sabölö moguna.
LALA WAMALUA YAʼIA:
Fili duma-duma salio laʼila niha. Simane Yesu, ogunaʼö ngawalö zide-ide ba wanutunö ngawalö zegebua hegöi ngawalö zaoha ba wanutunö sagabua. Böi nönö wanutunö si lö moguna irege abua khöra wangila eluahania. Tatugöi enaʼö tefaudu duma-duma niʼogunaʼömö ba wanutunö famahaʼö nifaʼemamö irege lö afökhö högö zamondrongo ba wangalui amakhaitania.
Angeragö hadia zoguna ba niha samondrongo. Fili duma-duma soʼamakhaita ba halöwöra ba sadöni dödöra. Haogö tatugöi enaʼö böi tobali fangailara daʼö mazui tetutu dödöra.
Fatunö hadia duho siföföna. Osambuaʼö dödömö ba wameʼe duma-duma sanandrösa ba duho siföföna, tenga sanandrösa ba ngawua wehede si lö moguna. Tatugöi enaʼö böi ha latörö tödöra duma-duma nibeʼemö, hizaʼi laʼila göi hadia wamahaʼö nihalöra moroi ba daʼö.