Onönöta
1. Enaʼö Aboto ba Dödöda Haniha Mbabilona Sebua
Hezo taʼila wa ”Babilona Sebua” eluahania angorudua agama sofaya? (Famaʼeleʼö 17:5) Nehegö hadia niwaʼö Zura Niʼamoniʼö sanandrösa ba Mbabilona Sebua:
Tehöngö waʼabölönia ba zi sagörö ulidanö. Imane Sura Niʼamoniʼö wa no modadao Mbabilona Sebua ba ”ngawalö soi [hegöi] mado”. Yaʼia ’zamatörö fefu razo ba gulidanö’.—Famaʼeleʼö 17:15, 18.
Yaʼia andrö tenga politik mazui fogale. Me no aefa tedudugö Mbabilona Sebua, so nasa ”razo ba gulidanö” hegöi ’ira sogale’.—Famaʼeleʼö 18:9, 15.
Iʼobousi döi Lowalangi. Lafotöi ia ira alawe sohorö-horö börö me ifakhai wahuwusa saro khö ndra samatörö ba politik enaʼö isöndra gefe mazui enaʼö so zotuhini yaʼia. (Famaʼeleʼö 17:1, 2) Ifaelungu niha moroi ba ngawalö soi, ba khönia tezofu-zofu waʼamate niha sato.—Famaʼeleʼö 18:23, 24.
Mangawuli ba wamahaʼö 13 numero 6
2. Hawaʼara Tohare Mesia?
No ifaʼeleʼö Sura Niʼamoniʼö wa tohare Mesia ba gangohorita zi 69 migu.—Baso Danieli 9:25.
Hawaʼara tebörögö zi 69 migu? Me döfi 455 SM. Me luo daʼö, ofeta Gubernur Nehemia ba Yeruzalema ba ”wangehao hegöi ba wangaʼazökhi mangawuli” banua daʼö.—Danieli 9:25; Nehemia 2:1, 5-8.
Hawaʼara zi 69 migu andrö? Ba zi hauga wamaʼeleʼö Zura Niʼamoniʼö, si sahari fagölö ira zi döfi. (4 Moze 14:34; Hezekieli 4:6) Eluahania, si samigu fagölö ira zi fitu fakhe. Tobali, ba wamaʼeleʼö daʼö, si 69 migu fagölö ira zi 483 fakhe (69 x 7).
Hawaʼara teʼasiwai zi 69 migu? Na taʼerai zi 483 fakhe andrö iʼotarai 455 SM, aekhu ia ba ndröfi 29 M.a Tefaudu daʼö börö me ba ndröfi daʼö göi tebayagö idanö Yesu ba tobali ia Mesia!—Luka 3:1, 2, 21, 22.
Mangawuli ba wamahaʼö 15 numero 5
3. Lala Wameʼe Dalu-Dalu Sangogunaʼö Do
So lala wameʼe dalu-dalu nifalua ndra doto iadaʼa yaʼia daʼö laʼogunaʼö ndro niha sofökhö andrö. So ösa zi tebai mazui si lö latema ira niha Keriso, duma-dumania labeʼe ndrora ba niha mazui laʼiröʼö ndrora andrö enaʼö tola muʼogunaʼö na laʼoperasi ia ba zi so miföna.—5 Moze 15:23.
Hizaʼi, te so lala wameʼe dalu-dalu si fatema ba dödö ndra niha Keriso. Duma-dumania, tes darah, cuci darah (hemodialisis), pengenceran darah (hemodilusi), fangogunaʼö mesin fangorifi sel, mazui fangogunaʼö mesin jantung-paru.b Lala wameʼe dalu-dalu simane daʼö mazui lala tanö böʼö si lö mangogunaʼö donia samösa hewaʼae no lahaogö wangiröʼö, dozi niha Keriso yaʼira samösa zangai angetula hadia manö nifalua ba ndronia andrö sagötö laʼoperasi ia, na ifafaresoʼö ia khö ndra doto, mazui na itema dalu-dalu. Te faböʼö-böʼö lala nifalua ndra doto ba wameʼe dalu-dalu. Börö daʼö, fatua lö lahalö gangetula ira niha Keriso hadia lala wamareso fökhö somasi ira, operasi mazui lala tanö böʼö ba wamadöhö fökhö, moguna ihaogö wanofu enaʼö aboto ba dödönia hadia dania nifalua ndra doto ba ndronia andrö. Haogö angeragö wanofu-nofu daʼa:
Hewisa dania na ba lala wameʼe dalu-dalu andrö, labeʼe ösa baero ndrogu moroi ba mbotogu ba tebato sabata wofanönia? Hadia umane tödögu wa föfö ndro bakha ba mbotogu nasa ndro daʼö, mazui hadia iwaʼö tödögu side-ide wa lö tola löʼö muduwagö ia tou ”ba danö”?—5 Moze 12:23, 24.
Hewisa dania na ba lala wameʼe dalu-dalu andrö, lahalö ösa ndrogu, muʼehaogö, aefa daʼö lafuli bakha ba mbotogu? Hadia lö itegudo tödögu side-ide si no tefahaʼö ba Zura Niʼamoniʼö, mazui hadia tola utemaʼö lala wameʼe dalu-dalu simane daʼö?
Mangawuli ba wamahaʼö 39 numero 3
4. Fabalisa zi No Mongambatö
No iwaʼö Sura Niʼamoniʼö wa tebai fabali zi no mongambatö. Hewaʼae na fabali ira, ba tebai mangowalu ira ba niha böʼö. (1 Korindro 7:10, 11) Hizaʼi, so ösa zalua si tola möi börö wa ihalö gangetula si samösa niha Keriso enaʼö fabali.
Iʼodödögö lö iʼasogö zoguna ba nösi nomonia: Lö omasi woʼomo ira matua wameʼe soguna ba nösi nomonia, irege tefakao nösi nomonia ba zoguna khöra.—1 Timoteo 5:8.
Iduhugö wamöbözi: Ifakao ba iduhugö wamöbözi irege irasoi ngambatönia wa möi famaʼala nosonia daʼö ba iʼofökhöi.—Galatia 5:19-21.
Arakhagö aetu wahuwusania khö Yehowa: Iforege foʼomo ira matua mazui ira alawe enaʼö lö saʼae ifosumange Yehowa ngambatönia.—Halöwö Zinenge 5:29.
5. Fangowasaini Ngaluo Sebua
Lö fao ndra niha Keriso ba wangowasaini ngaluo sebua si fatuwu khö Yehowa. Hizaʼi, so göi zinangea itatugöi si samösa niha Keriso moloʼö tödönia side-ide si no tefahaʼö ba Zura Niʼamoniʼö. Datafaigi duma-dumania.
Na so zangumaʼö khöu yaʼahowu wanunu fandru, döfi si bohou mazui owasa tanö böʼö. Tola manö öwaʼö khönia, ”Saohagölö.” Na omasi niha daʼö iʼila hadia mbörö wa lö öʼowasaini ngaluo sebua andrö, haogö wamatunö khönia.
Iʼandrö khöu foʼomomö si tenga Samaduhuʼö Yehowa enaʼö fao ami wemanga ba nösi nomo sato na laʼowasaini ngaluo sebua. Na itehegö tödöu side-ide wamalua daʼö, sökhi na no öhenaigö öfatunö khö woʼomomö wa lö dania fao ndraʼugö wamalua si toʼölö mazui soʼamakhaita ba agama sofaya ba luo daʼö.
Mamuala khöu gafalomö ba ngaluo sebua. Hadia ötema mazui löʼö? Haogö wamatimbaisi. Hadia ibeʼe khöu mbuala daʼö kafalomö börö me moʼamakhaita daʼö ba wangowasaini ngaluo sebua? Mazui ifalua daʼö börö me iʼandrö saohagölö ba waʼerege dödömö?
So zameʼe khöu buala ba ginötö muʼowasaini ngaluo sebua. Te imane khöu niha daʼö, ”Aboto ba dödögu wa lö öʼowasaini ngaluo sebua andre, hizaʼi omasido ubeʼe khömö mbuala daʼa.” Ba ginötö simane daʼö, haogö angeragö: Hadia faʼasökhi dödönia khöu daʼö? Mazui, hadia omasi ia itandraigö wamatimö ba iʼalui lala enaʼö fao ndraʼugö ba wangowasaini ngaluo sebua? Na no öhaogö woʼangeragö, tola öhalö gangetula hadia ötema mazui löʼö. Ba ginötö tahalö gangetula, moguna taforomaʼö wa lö faröi ita khö Yehowa ba taʼokhögö dödö side-ide si lö sinegu.—Halöwö Zinenge 23:1.
Mangawuli ba wamahaʼö 44 numero 1
6. Fökhö Salio Fatöfa
Tola manö no göna ita fökhö salio fatöfa ba niha mazui tamane tödöda wa no fatöfa khöda wökhö andrö. Börö me taʼomasiʼö niha böʼö, moguna mangelama ita enaʼö böi fatöfa wökhöda andrö ba niha böʼö. Moguna taʼoʼö goroisa daʼa: ”Omasiʼö nawöu simane faʼomasiu ndraʼugö.”—Roma 13:8-10.
Hewisa wa tola ifalua goroisa daʼa si samösa niha na no göna khönia wökhö salio fatöfa ba niha böʼö? Tebai ifatöfa ia ba niha böʼö simane faraʼu tanga, fatalagu bagi mazui faʼuma. Tebai abao dödönia na so niha si lö mogaoni yaʼia ba nomora börö me lalumöʼö nösi nomora. Fatua lö tebayagö ia idanö, moguna ifatunö khö koordinator satua sokubaloi sanandrösa ba wökhö si göna khönia, irege tola laʼalui lala ira satua sokubaloi enaʼö lö göna wökhönia andrö ba niha böʼö ba ginötö tebayagö ia idanö. Fatua lö ibörögö fakawa si samösa niha, ba te no göna khönia wökhö salio fatöfa, moguna ifafaresoʼö ndronia. Na ifalua fefu daʼö si samösa niha, no iforomaʼö wa ’iʼangeragö zoguna ba niha böʼö, tenga ha soguna khönia samösa’.—Filifi 2:4.
Mangawuli ba wamahaʼö 56 numero 2
7. Abula Dödö Sanandrösa ba Bisnis hegöi ba Huku
Oya gabula dödö si tola tatimbagö na no tafazökhi zura fawuʼusa li sanandrösa ba gefe mazui bisnis, farahu ba daʼö na moʼamakhaita ia khö ndra talifusöda si sara lala wamati. (Yeremia 32:9-12) Hewaʼae simanö, itaria so watitisa ba gotalua niha Keriso sanandrösa ba gefe mazui tanö böʼönia. Fatitisa simane daʼö, tola laʼanemaiʼö laʼasiwai ba laʼatulöʼö ba gotaluara.
Hizaʼi, hewisa na abula dödö sebua zalua, simane falimosa mazui fangobousi töi niha böʼö? (Baso Mataiʼo 18:15-17.) Ifatunö khöda Yesu tölu ngawalö lala sinangea tafalua ba wangasiwai abula dödö andrö:
Odödögö wangasiwai abula dödö andrö ba gotaluami.—Faigi ayati 15.
Na lö nasa teʼasiwai gabula dödö andrö, waʼö samösa mazui darua ndra talifusöda saro ba wamati enaʼö fao ami ba wangondrasi niha daʼö.—Faigi ayati 16.
Na lö nasa awai zalua andrö, awena öʼandrö wanolo khö ndra satua sokubaloi.—Faigi ayati 17.
Ba zi no irai alua, abölö sökhi na lö taʼohe ndra talifusöda si sara lala wamati föna ndra sanguhuku. Hadia mbörö? Tola manö möi fangobousi döi Yehowa daʼö hegöi banua niha Keriso. (1 Korindro 6:1-8) Hizaʼi, so göi ösa zinangea muʼasiwai föna ndra sanguhuku. Duma-dumania, fabalisa moloʼö huku, na muʼetuʼö haniha zangebuaʼö iraono, hawaʼebua gefe nibeʼe khö woʼomora me no fabali, famuʼa asuransi, na lö sagu wamuʼa foʼömö mazui na muhaogö zura wasiat.
Na alua zi lö sökhi, simane sohoröni niha, samakao iraono, samözi awönia, sanagö okhöta, mazui samunu niha, tola ifatunö zalua andre si samösa niha Keriso khö ndra samatörö. Niha Keriso samalua daʼö, lö musawönia goi-goi si so ba Zura Niʼamoniʼö.
a Iʼotarai 455 SM ofeta 1 SM, so 454 fakhe. Iʼotarai 1 SM ofeta 1 M, ha döfi daʼö börö me lö hadöi döfi 0. Ba iʼotarai 1 M ofeta 29 M, so 28 fakhe. Na muʼorudugö fefu ndröfi andrö so 483 fakhe (454 + 1 + 28).
b Enaʼö öʼila sanandrösa ba lala wameʼe dalu-dalu nitutunö moroi yawa no mege, faigi ”Pertanyaan Pembaca” ba Menara Pengawal 15 Mbaŵa si Fulu 2000.