Böi Böhöli Wangai Halöwö Yehowa si Fao Faʼomuso Dödö
HADIA ginötö sabölö omuso dödöu ba waʼauriu? Hadia me mangowaluʼö mazui me awena tumbu khöu nono siaʼa? Mazui ba ginötö tebayagö ndraʼugö idanö? Tola manö inötö sabölö omuso dödöu yaʼia daʼö me tebayagö ndraʼugö idanö. Khalaigö atö hawaʼomuso dödö ndra talifusöda me laʼila öhalö gangetula föna niha sato wa öʼomasiʼö Lowalangi moroi siʼaikö ba dödöu, nosou maʼasambua, gera-erau awö waʼabölöu!—Mrk. 12:30.
Tatu manö omuso dödömö me öhalö halöwö khö Yehowa iʼotarai me tebayagö ndraʼugö idanö. Hizaʼi, ato ndra talifusöda sanuriaigö Mbanua Lowalangi si lö faʼomuso dödö simane me awena tebayagö ira idanö. Hadia mbörö? Hana wa moguna tahalö halöwö Yehowa si fao faʼomuso dödö?
HANA WA SO ZI LÖ FAʼOMUSO DÖDÖ
So khöda waʼomuso dödö börö duria Mbanua Lowalangi. No ifabuʼu Yehowa wa famatörönia dania zamakiko ulidanö si lö sökhi andre ba ibeʼe gulidanö si bohou. Imane Zefania 1:14, ”No ahatö mbaŵa sebua khö Yehowa; no ahatö ia, ba alio sibai irugi.” Hizaʼi, na no ara tabalo-baloi ginötö andrö, tola manö lö khöda faʼomuso dödö. Lua-luania awuwu ita ba wangai halöwö khö Lowalangi.—Gamd. 13:12.
Na fariawö ita ba nono mbanua Lowalangi, tefarou dödöda ba wangai halöwö khö Yehowa si fao faʼomuso dödö. Tola manö adöni dödöda ba zindruhu hegöi ba wangai halowö khö Lowalangi börö gamuata si sökhi nono mbanua Yehowa. (I Fet. 2:12) Hewisa na so ba gotalua ndra talifusöda niha Keriso si göna degu-degu ba gangowuloa börö me no isawö goroisa Lowalangi? Tola manö afatö dödöra ba lö khöra faʼomuso dödö saʼae.
Tola alö waʼomuso dödöda na tagohi ganaʼa soya. Ba gulidanö nifatörö Zatana andre ifarou ita enaʼö taʼöli gofu hadia ia manö hewaʼae lö moguna khöda. No irai iwaʼö Yesu, ”Tebai enoni zi darua niha, ma faʼudu ia ba zi samösa ba iʼomasiʼö zi samösa, ba mazui molemba ia ba zi samösa, ba iʼositengagö zi samösa. Tebai enoni Lowalangi ami ba enoni ganaʼa.” (Mat. 11:28-30) Lö taʼila taʼosamuzaigö wamosumange Yehowa si fao faʼomuso dödö ba ginötö tagohi gisö-isö dödö ba gulidanö.
’OWUA-WUA DÖDÖDA KHÖ LOWALANGI SANGORIFI YAʼITA’
Lö abua wangai halowö khö Yehowa ba niha sangomasiʼö yaʼia. (I Yoh. 5:3) Böi olifu ita wehede Yesu me iwaʼö, ”Miʼaine khögu dozi serege tödö, awö zonoro, ba ufolombase ami. Mihareʼö khömi kalo mbagi andrö khögu ba mitöngöni khögu, me no sebolo tödö ndraʼo ba si lö fayawa tödö, ba falukha ami wolombase dödömi. Moguna sa kalo mbagi andrö, khögu, ba no aoha noro andrö khögu.” (Mat. 11:28-30) Na tobali ita niha Keriso tola so khöda waʼohahau dödö hegöi faʼomuso dödö. So tölu mbörö wa tola ’owua-wua dödöda khö Lowalangi sangorifi yaʼita’. Datafaigi atö.—Hab. 3:18.
Tafosumange Lowalangi sohahau tödö, Sameʼe-Faʼauri. (Hal. 17:28; I Tim. 1:11) Aboto ba dödöda wa moʼömö faʼauri ita khö Zokhö yaʼita. Andrö, böi aetu-aetu ba wangai halöwönia si fao faʼomuso dödö, hewaʼae no ara tebayagö ita idanö.
Lö aetu waʼomuso dödö Héctor, börö me itörö-törö tödönia wanötöna ba Mbanua Lowalangi ba owölö-ölö ia weʼamöi manuriaigö
Duma-dumania Héctor, samösa pengawas keliling sangai halöwö khö Yehowa ba zi 40 fakhe faʼara. ’Ba waʼatuania’ lö aetu waʼomuso dödönia ba wangai halöwö khö Yehowa. (Zin. 92:13-15) Tetaha halöwönia khö Lowalangi börö me mofökhö woʼominia. Hewaʼae simanö lö taya waʼomuso dödönia. Imane, ”Hewaʼae abu dödögu börö me itugu abölö-bölö wökhö woʼomogu ba abua wondrorogö yaʼia, lö utehe taya waʼomuso dödögu ba wangai halöwö khö Lowalangi. Uʼila wa so ndraʼo börö Yehowa si so ohitö dödö ba wamazökhi niha, andrö wa uʼomasiʼö ia soroi ba dödö ba ufalua halöwönia. Uforege wamalua halöwö fanuriaigö, ba itörö-törö manö tödögu dötönafö moroi ba Mbanua Lowalangi enaʼö lö taya waʼomuso dödögu.”
No ibeʼe höli khöda Yehowa enaʼö tasöndra waʼohahau dödö. ”Simanö sa waʼomasi Lowalangi nösi gulidanö, no ibeʼe Nononia andrö, si ha sambua, enaʼö lö tekiko dozi samati khönia, enaʼö so khöra waʼauri si lö aetu.” (Yoh. 3:16) Tola teʼefaʼö horöda ba tasöndra waʼauri si lö aetu na mamati ita ba höli nibeʼe Lowalangi. Taʼandrö sibai saohagölö ba mbuala andre! Börö daʼö, omasi ita tahalö halöwö Yehowa si fao faʼowua-wua dödö.
Lö igohi wangalui kefe sebua Jesús ba ihalö halöwö Yehowa si fao faʼomuso dödö ba zi haʼuga fakhe
Imane samösa dalifusöda moroi ba Meksiko sotöi Jesús, ”Me mböröta, iʼosawuyu ndraʼo halöwögu. Enaʼö usöndra gefe sebua, ukila wohalöwö he na lö mufarou ndraʼo, mohalöwödo hewaʼae no italuʼi inötö. Daʼö zasese ufalua. Aefa daʼö ufahaʼö ndraʼo sanandrösa khö Yehowa hegöi me ibeʼe nono niʼomasiʼönia ba niha gulidanö. Omasido sibai uhalö halöwö Yehowa. Börö daʼö ululu waʼaurigu khönia ba ubato wohalöwö hewaʼae no 28 fakhe mohalöwödö ba daʼö. Aefa daʼö uhalö halöwö safönu inötö.” Iʼotarai daʼö, omuso dödö Jesús wangai halöwö khö Yehowa.
Na sökhi lala waʼaurida tola tasöndra waʼomuso dödö. Hadia lö olifuʼö hewisa waʼaurimö meföna fatua lö ösöndra waʼaboto ba dödö sanandrösa khö Yehowa? Ifasugi Faulo ba dödö niha Keriso si so ba Roma wa yaʼira ”sawuyu horö”, hizaʼi no tobali ira ”enoni zatulö”. No so hare ira ”ba wangohau-hau” ba fozunia yaʼia daʼö faʼauri si lö aetu. (Rom. 6:17-22) Simanö göi ita, taʼamoniʼö lala waʼaurida, irege aröu ita moroi ba wangabu dödö börö gamuata wohorö hegöi amuata si lö sökhi tanö böʼö. Daʼa zi tola mangohahauʼö tödöda.
”Si tobali faʼomuso dödögu yaʼia daʼö ba wangai halöwö khö Yehowa.”—Jaime
Duma-duma tanö böʼö yaʼia daʼö Jaime, fatezu halöwönia. Yaʼia andre niha si lö faduhu tödö wa so Lowalangi ba faduhu dödönia göi wamahaʼö evolusi. Ibörögö möi Jaime ba gangowuloa niha Keriso ba ahöli dödönia me iʼila waʼomasi niforomaʼö ndra talifusöda. Iröi fefu gamuatania si no irai ifalua ba iʼandrö wanolo khö Yehowa enaʼö so khönia waʼafaduhu dödö. Imane Jaime, ”Itugu ara, itugu aboto ba dödögu wa so Nama sebua faʼomasi ba Lowalangi si so faʼahakhö dödö. Na uʼoʼö goi-goi Yehowa no sambua folumöʼö khögu daʼö. Tola manö no matedo iadaʼa simane ndra awögu tanö böʼö na lö uböhöli fatezu. Awena ohahau dödögu me no ubeʼe ginötögu wangai halöwö khö Yehowa.”
BÖI AWUWU!
Moloʼö yaʼugö, hewisa dödöda gasa-gasa wombaloi faʼatekiko gulidanö si lö sökhi andre? Böi olifu wa yaʼita andre ”sanaru ba geheha” ba ’tabasi dania waʼauri si lö aetu’. Börö daʼö, ”Böi atage ita, wolau si sökhi; na inötönia dania, ba mamasi ita, na lö atage ita.” (Gal. 6:8, 9) Moroi ba wanolo Yehowa, yaʼanau gölöda ba taforege wangokhögö amuata si tola manolo yaʼita na tohare ”wamakao sabölö-bölö”, ba datahalö halöwö Yehowa si fao faʼomuso dödö, hewaʼae oya wamakao nitaögöda.—Fam. 7:9, 13, 14; Yak. 1:2-4.
Na anau gölöda, faduhu dödöda wa ifahowuʼö ita Lowalangi, börö me itöngöni halöwö ba faʼomasi niforomaʼöda khönia hegöi ba döinia. Na lö aetu tahalö halöwö Yehowa si fao faʼomuso dödö, tatu manö fao dödöda ba niwaʼö zinunö Dawido, ”No ubeʼe ba gametahögu Yehowa, si lö mamalö-malö; naso ia ba gambölögu, ba lö mangiwa ndraʼo. Andrö omuso dödögu, ba maʼiki lakhömigu andrö ba ösigu göi molombase, lö hadia ia.”—Zin. 16:8, 9.