Niha Safaito Ndraʼo ba Salio Mofönu

SI NO NUMALÖ:

Tumbu ndraʼo ba Ciudad Mante, banua si baga-baga ba Tamaulipas, Meksiko. Ogoböwö niha si so ba daʼö ba fahuwu göi. Hizaʼi, börö me oya gorudua niha si lö sökhi, andrö wa ataʼu niha weʼamöi ba mbanua andrö.

Ono numero dua ndraʼo moroi ba gotalua zi daöfa si fatalifusö. Lafabayagöʼö idanö ndraʼo ira satuagu ba Gereja Katolik, ba fao ndraʼo ba gangowuloa ndra sanunö. Uʼomasiʼö Lowalangi börö me ataʼudo na lafakao ndraʼo dania ba galitö narako.

Me lima fakhe ndröfigu, iröi ndraʼaga bapagu. Afökhö sibai dödögu. Lö uʼila hadia mbörö wa iröi ndraʼaga bapagu, hiza sa maʼomasiʼö sibai ia. Mohalöwö mamagu ba wobalazoi yaʼaga, iraononia si daöfa.

Uʼogunaʼö ginötö daʼö wa lö möi ba zekola enaʼö tola fariawö ndraʼo ba ndraono tanö böʼö sabölö atua moroi khögu. Lafahaʼö ndraʼo fahölu ba mangelifi, moroko, managö, ba faʼudu. Börö me omasido ufatörö niha, ufomaha ndraʼo fatezu, fagulat, fakarate, hegöi ba wangogunaʼö wana. Tobali niha samuʼi ndraʼo. Asese fao ndraʼo fafana, ba asese mendro ndraʼo ba laröi manö ndraʼo ba zinga lala. Afökhö sibai dödö mamagu me iʼilado, ba ifazawado, iʼohe ndraʼo ba rumah sakit!

Me 16 fakhe ndröfigu, möi nawögu me iraono ba nomo, töinia Jorge. Iwaʼö wa Samaduhuʼö Yehowa ia, ba so duria somasi ifaʼema khöma. Ifatunö hadia nifaduhusinia tödö moroi ba Zura Niʼamoniʼö. Lö irai ubaso Zura Niʼamoniʼö, ba omasido sibai wamahaö yaʼo ba döi Lowalangi hegöi ba nifabuʼunia. Isofu Jorge hadia omasi ndraʼaga na mafahaʼöga ba Zura Niʼamoniʼö. Mawaʼö, omasiga.

HEWISA ZURA NIʼAMONIʼÖ WOMBULÖʼÖ FAʼAURIGU:

Ahono sibai dödögu me no aefa uʼila wa alitö narako tenga famahaʼö moroi ba Zura Niʼamoniʼö. (Zinunö 146:4; Zangombakha 9:5) Börö daʼö, lö ataʼudo saʼae. Moloʼö yaʼo, hulö Ama sebua faʼomasi Lowalangi andrö, omasi ia na latema fefu zi sökhi iraononia.

Börö me itugu tedou wamahaʼögu yaʼo ba Zura Niʼamoniʼö, aboto ba dödögu wa moguna ubulöʼö waʼaurigu. Moguna so khögu wangide-ngideʼö ba uröi zi lö sökhi. Mene-mene sanolo yaʼo yaʼia daʼö nisura ba I Korindro 15:33 sangumaʼö wa ’ifakiko mböwö si sökhi huhuo si lö sökhi’. Aboto ba dödögu, na omasi tabulöʼö waʼaurida, moguna taʼaröuʼö ita moroi ba niha sondrönisi yaʼita ba zi lö sökhi. Börö daʼö, lö fariawö ndraʼo saʼae khöra, hizaʼi khö ndra talifusö si sara lala wamati sangasiwaisi fefu hadia ia si teʼodane-dane ba Zura Niʼamoniʼö tenga ba waʼalösökhi.

Ayati tanö böʼö, ba Roma 12:17-19. Imane, ”Böi misulöni zi lö sökhi awönia si lö sökhi, ba niha; . . . Na dali ami, ba yaʼatulö ami ba niha fefu. Böi milau mbalömi, . . . noa sa so ba zura: ’Khögu wolau balö, yaʼo zanulöni, iwaʼö Soʼaya.’” Fao dödögu, Yehowa zanulöni. Udaʼi-daʼi ba wondröi fefu zi lö sökhi si no irai ufalua.

Lö irai uʼolifugö zalua ba zi sara wongi me mangawulido ba nomo. So ndraono matua si bohou ebua, udugu me mböröta, lafaondragödo, ba lagarogoido, ibözi döla hulugu kafalora, ba iʼebuakö linia, ”Aine, talau fabago!” Ba ginötö daʼö, ulau mangandrö khö Yehowa, uʼandrö khönia enaʼö tola utaha dödögu ba nifaluara andrö. Hewaʼae na so dödögu ba wanulöni, lö utötöna wa tola utaha dödögu. Mahemolunia, uʼondrasi gafalo geng andrö, ha samösa-mösa ia. Mofönudo sibai, hizaʼi sakalitö ufuli uʼandrö khö Yehowa enaʼö ibeʼe khögu wanaha tödö. Ba zi lö udöna-döna iʼondrasi ndraʼo samösa nono matua ba imane, ”Bologö dödöu ba zalua menewi. Omasido na tobalido simane yaʼugö. Omasi ufahaʼö ndraʼo ba Zura Niʼamoniʼö.” Omuso sibai dödögu me tola utaha wönugu! Daʼö mbörö wa ibörögö ifahaʼö ia.

Hizaʼi, lö latohugö wamahaʼö yaʼira ira nösi nomogu me ba ginötö daʼö. Ba uhalö gangetula wa udouʼö wamahaʼögu yaʼo ba lö utehegö hadia ia si tobali fanaisigu. Aboto ba dödögu, na fariawö ndraʼo ba nono mbanua Lowalangi, tola tefadöhö zokho dödögu ba hulö zoroi yomogu ira. Itugu tedou ndraʼo ba wamati ba tebayagö ndraʼo idanö tobali Samaduhuʼö Yehowa ba ndröfi 1991.

HOWU-HOWU NITEMAGU:

Me mböröta, niha si lö sökhi ndraʼo, omasido ufatörö niha böʼö, ba afaito sibai ndraʼo. Hizaʼi, Taromali Lowalangi zombulöʼö faʼaurigu. Iadaʼa, ufaʼema duria somuso dödö ba niha somasi mamondro-ndrongo. Ohahau dödögu me uhalö halöwö fanuriaigö safönu inötö ba zi 23 fakhe faʼara.

No irai mohalöwödo ba gödo ndraha si so ba Meksiko. Ba daʼö falukha ndraʼo khö Claudia, talifusöda ira alawe sanuriaigö safönu inötö, ba mangowalu ndraʼaga me döfi 1999. Uʼandrö sibai saohagölö khö Yehowa me no ibeʼe nawögu ba waʼauri, si lö faröi.

Matolo mbanua niha Keriso Bahasa Isyarat ba Meksiko, matolo niha si lö mangila muhede enaʼö lafahaʼö ira sanandrösa khö Yehowa. Aefa daʼö, lafatenge ndraʼaga ba Belize ba wanolo niha enaʼö lafahaʼö ira ba Zura Niʼamoniʼö. Hewaʼae ha si toʼölö manö waʼaurima, hizaʼi owua-wua dödöma ba zi no maʼokhögö. Ba lö omasiga tefalalini ia ba danö böʼö.

Ba gafuriata, ifahaʼö ia mamagu ba Zura Niʼamoniʼö ba tebayagö ia idanö. Gaʼagu ndra matua, foʼomonia ba ononia, iadaʼa tobali ira Samaduhuʼö Yehowa. Awögu si no irai ufahaʼö ba Zura Niʼamoniʼö göi tobali ia Samaduhuʼö Yehowa.

Hizaʼi, so ösa nösi nomogu si mate börö me lö sökhi lala waʼaurira. Na simane yaʼira menaʼö ndraʼo, tatu manö fagölö lua-lua waʼaurima. Uʼandrö sibai saohagölö me no ituyu ndraʼo Yehowa tobali ono mbanuania, ebolo sibai dödö zamahaʼö yaʼo, sökhi gamuatania ba wanolo yaʼo ba wangaurifagö goi-goi Zura Niʼamoniʼö.