Hadia ba Niha Keriso Moguna Natal?

Zuta niha ba zi sagörö ulidanö zi faduhu tödö wa Natal andrö no owasa ba wanörö tödö luo waʼatumbu Yesu Keriso. Hizaʼi hadia no irai öʼangeraigö hadia lafalua göi Natal ira niha Keriso ba abad siföföna, niha fondrege zahatö khö Yesu meföna? Ba hadia öʼila hadia niwaʼö Zura Niʼamoniʼö sanandrösa ba wanörö tödö luo waʼatumbu? Na musöndra wanema li moroi ba zinofu andrö, tola tobali fanolo khöda ba wotatugöi hadia ba niha Keriso moguna Natal andrö.

Siföföna, lö irai itutunö Sura Niʼamoniʼö gowasa wanörö tödö luo waʼatumbu Yesu hegöi niha tanö böʼö si lö faröi khö Lowalangi. Ba Zura Niʼamoniʼö, ha darua niha sangowasaini luo waʼatumbura. Yaʼira tenga samosumange Yehowa, Lowalangi nisura ba Zura Niʼamoniʼö, ba so zi lö sökhi salua me laʼowasaini luo waʼatumbura andrö. (1 Moze 40:20; Mareko 6:21) Moloʼö Encyclopædia Britannica, lö fatema ba dödö niha Keriso ba abad siföföna ”zi toʼölö nifalua niha baero ba wanörö tödö luo waʼatumbu”.

Lö nitatugöi Zura Niʼamoniʼö me hamega tumbu Yesu. Imane Cyclopedia karya McClintock ba Strong, ”Tebai mutatugöi moroi ba G[amabuʼula] Li si B[ohou] mazui moroi ba sumber tanö böʼö me hamega tumbu Yesu.” Tatu manö, na omasi Yesu enaʼö laʼowasaini ira soloʼö khönia luo waʼatumbunia, hasambalö itatugöi enaʼö laʼila mbaŵa waʼatumbunia.

Si dua, lö irai isura Sura Niʼamoniʼö wa Yesu mazui so ba gotalua ndra nifahaʼönia zamalua Natal. Moloʼö New Catholic Encyclopedia, si oföna sibai mututunö wamalua Natal yaʼia daʼö ”ba Chronograph karya Philocalus, sambua sura mbaŵa Romawi nihalö ba mbaŵa si 336 [M]”. Moroi ba daʼa muʼila wa tefalua gowasa andrö me no awai tefaʼanö Zura Niʼamoniʼö ba mato hauga abad me no aefa möi Yesu ba gulidanö. Tobali, isura McClintock ba Strong wa ”famalua gowasa Natal, sindruhu-ndruhu tenga nifakhoi Lowalangi, mazui tenga göi moroi ba G[amabuʼula] Li si B[ohou]”.a

Börö me Samahaʼö Sebua Yesu, andrö ibeʼe wanuturu lala satulö sanandrösa ba zomasi ia enaʼö lafalua ira soloʼö khönia, ba no tesura daʼö ba Zura Niʼamoniʼö. Famalua owasa Natal, lö tefarahu. Hulö simane guru ba zekola, tatu lö omasi ia na lafalua ndraono zekolania hadia ia zi lö nifakhoinia, simanö göi Yesu, lö omasi ia na ”italuʼi zi so ba zura” nifalua ndra soloʼö khönia.​—1 Korindro 4:6.

Hizaʼi, so sambua zi lö tola lö latörö tödö niha Keriso ba abad siföföna, yaʼia daʼö Fanörö Tödö waʼamate Yesu. Yesu samösa zamatunö khö ndra nifahaʼönia hawaʼara ba hewisa wamaluara daʼö. Hewisa wamalua yaʼia, hegöi mbaŵa waʼamatenia, tesura ba Zura Niʼamoniʼö.​—Luka 22:19; 1 Korindro 11:25.

Simane si no aboto ba dödöda, Natal andrö no sambua owasa wanörö tödö luo waʼatumbu, ba lö lafalua daʼö ira niha Keriso ba abad siföföna. Aefa daʼö, lö nifatunö Zura Niʼamoniʼö wa ifalua Yesu mazui niha tanö böʼö gowasa Natal andrö. Börö daʼö, zuta niha Keriso ba zi sagörö ulidanö zangai angetula wa sindruhunia tenga khöra moguna Natal.