Darua Razo si Faʼudu ba Ngaluo Safuria
Famaʼeleʼö si so ba bagan andre zangoromaʼö ngawalö zalua ba ginötö si fagölö. Fefu wamaʼeleʼö andre zi tobali tandra wa no so ita ba ”götö safuria”.—Dan. 12:4.
Ayati: Fam. 11:7; 12:13, 17; 13:1-8, 12
Famaʼeleʼö: No mamatörö ’gurifö samuʼi’ ba gulidanö töra 3.000 fakhe. Ba ngaluo safuria, mesokho högö si fitu moroi ba gurifö samuʼi andrö. Ba gafuriata, döhö högö andrö, ba laʼoʼö ia ”niha gulidanö”. Iʼogunaʼö gurifö samuʼi Satana ba ’wamakao maʼuwu ndra alawe andrö si tosai’.
Faʼalua: Me no aefa alua Molö Sabölö-bölö, ibörögö mamatörö niha solawa Lowalangi. Töra 3.000 fakhe aefa daʼö, samösa moroi ba gotalua zamatörö andrö, yaʼia daʼö Inggris, taya waʼabölönia me alua Wasuwöta Gulidanö I. Hizaʼi aefa daʼö, farahu Inggris khö Amerika Serikat ba ifuli zui abölö ia. Sagötö ngaluo safuria, iʼogunaʼö fefu wamatörö si so ba gulidanö andre Satana ba wamakao ono mbanua Lowalangi.
Ayati: Dan. 11:25-45
Famaʼeleʼö: Sagötö ngaluo safuria, lö aetu faʼudu razo tanö yöu khö razo tanö raya ba wamadöni kuaso.
Faʼalua: Fasuwö Jerman khö Inggris hegöi Amerika Serikat. Me döfi 1945, tobali razo tanö yöu Uni Soviet hegöi soi sotuhini yaʼia. Me döfi 1991, mududugö Uni Soviet, ba ba gafuriata, tobali razo tanö yöu Rusia hegöi soi sotuhini yaʼia.
Ayati: Yes. 61:1; Mal. 3:1; Luk. 4:18
Famaʼeleʼö: Ifatenge ’zinengenia’ Yehowa ba ’wohaogö lala’ fatua lö tefasindro Wamatörö Lowalangi. Mufatenge ngawawa andre ”ba wamaʼema turia somuso dödö ba zebua famakao”.
Faʼalua: Iʼotarai me döfi 1870, iforege talifusöda C. T. Russell hegöi niha si fao khönia ba wangokhögö faʼaboto ba dödö sanandrösa ba zindruhu nitutunö Zura Niʼamoniʼö. Ba wamobörö ndröfi 1880-an, lafatunö wa moguna manuriaigö nono mbanua Lowalangi. Lafazökhi artikel simane ”Muʼalui 1.000 Zanuriaigö” hegöi ”Mubayoini ba Wamalua Fanuriaigö”.
Ayati: Mat. 13:24-30, 36-43
Famaʼeleʼö: So nudu zananö tanömö goʼo ba gotalua danömö gandru. Tumbu danömö goʼo andrö irege lö saʼae oroma gandru. Me irugi inötö wamasi, awena mufasafi goʼo moroi ba gandru.
Faʼalua: Iʼotarai gangohorita ndröfi 1800-an, itugu oroma gamaehuta niha Keriso sindruhu ba niha Keriso sofaya. Ba ngaluo safuria, muʼowuloi niha Keriso sindruhu ba mufasafi ira moroi ba niha Keriso faya.
Ayati: Dan. 2:31-33, 41-43
Famaʼeleʼö: Ahe nifazökhi moroi ba ziʼöli hegöi tambu laʼuri. Daʼö gahe nadu nifazökhi moroi ba loga si faböʼö-böʼö.
Faʼalua: Tambu laʼuri yaʼia daʼö ono mbanua si so barö wamatörö Inggris hegöi Amerika Serikat. Lalawa zi dombua famatörö andre. Börö me molawa nono mbanua, lö afönu wangogunaʼöra kuaso niʼokhögöra si no amaedola ziʼöli.
Ayati: Mat. 13:30; 24:14, 45; 28:19, 20
Famaʼeleʼö: Muʼowuloi ”gandru” bakha ”ba halasa”, ba mutuyu ”zawuyu si lö faröi ba satua-tua” tobali sondrorogö ’zohalöwö ba nomo’. ’Teturiaigö Wamatörö Lowalangi’ ba ”zi sagörö ulidanö misa”.
Faʼalua: Me döfi 1919, mufataro zawuyu si lö faröi ba satua-tua ba wondrorogö ono mbanua Lowalangi. Iʼotarai daʼö, itugu owölö-ölö Ndraono Zekola Zura Niʼamoniʼö ba wamalua fanuriaigö. Iadaʼa, laturiaigö duria somuso dödö ira Samaduhuʼö Yehowa ba zi töra 200 soi. Lafazökhi göi publikasi si teʼodane-dane ba Zura Niʼamoniʼö ba zi töra 1.000 ngawalö li.
Ayati: Dan. 12:11; Fam. 13:11, 14, 15
Famaʼeleʼö: Urifö samuʼi si dombua tandru, ifarou fefu niha si so ba gulidanö enaʼö lafazökhi ’nadu famaedo gurifö samuʼi’. Ba ’ibeʼe hanu-hanu’ ba nadu andrö.
Faʼalua: Kuaso Gulidanö Inggris-Amerika zangagö föna irege tola tefazökhi Liga Bangsa-Bangsa. Fao göi wamatörö tanö böʼö ba wotuhini organisasi daʼa. Ba gafuriata, fao göi razo tanö yöu, hizaʼi ha me döfi 1926-1933. Faduhu dödö niha wa Liga Bangsa-Bangsa zangaʼasogö faʼatulö ba zi sagörö ulidanö. Iadaʼa, faduhu göi dödö niha wa tola ifalua zimane daʼö Perserikatan Bangsa-Bangsa. Hizaʼi, ha Famatörö Lowalangi zi tola mamalua daʼö.
Ayati: Dan. 8:23, 24
Famaʼeleʼö: Samösa razo safaito zamalua ”famakiko” sabölö-bölö.
Faʼalua: Oya niha si no ibunu Kuaso Gulidanö Inggris-Amerika ba oya waʼatekiko sabölö-bölö nifaluania. Duma-dumania, sagötö waʼalua Wasuwöta Gulidanö II, so dombua bom atom nitorugö Amerika Serikat ba soi si tobali udu Inggris hegöi Amerika Serikat. Na sindruhunia ba zilalö, lö irai so wakake wasuwöta zangaʼasogö faʼatekiko simane daʼö.
Ayati: Dan. 11:31; Fam. 17:3, 7-11
Famaʼeleʼö: Kalua ”gurifö samuʼi soyo si hulö hola-hola galitö” si fulu tandru moroi ba mbaho sabakha sibai. Yaʼia razo si walu. Iwaʼö Danieli wa razo andre ’samedadao sogoro ita, fanudugö huku Lowalangi’.
Faʼalua: Sagötö waʼalua Wasuwöta Gulidanö II, lö saʼae oya halöwö nifalua Liga Bangsa-Bangsa. Me no aefa wasuwöta, mufasindro PBB. Simane Liga Bangsa-Bangsa, itema wanuno PBB sinangea mubeʼe ba Wamatörö Lowalangi. Hasambalö göi isuwö agama.
Ayati: 1 Tes. 5:3; Fam. 17:16
Famaʼeleʼö: So gangombakhata nifatunö fefu soi, lawaʼö ”no atulö, no ahono!” Ba gafuriata, lasuwö ”zohorö” ira ”tandru si fulu rozi” hegöi ”urifö samuʼi”. Aefa daʼö, tedudugö fefu wamatörö si so ba gulidanö.
Faʼalua: Lawaʼö fefu soi wa no mofozu ira ba wangaʼasogö faʼahono dödö hegöi faʼatulö ba gulidanö. Aefa daʼö, fefu soi sotuhini PBB, ladudugö agama sofaya. Daʼa zi tobali famobörö wamakao sabölö-bölö. Awena awai wamakao sabölö-bölö, na no mofozu Yesu ba wangohori fefu wamatörö Zatana dania ba Hamagedo.
Ayati: Hez. 38:11, 14-17; Mat. 24:31
Famaʼeleʼö: Tohare Gogi ba wanuwö tanö niʼiagö nono mbanua Lowalangi. Aefa daʼö, laʼowuloi ”niha nifili” ira malaʼika.
Faʼalua: Lasuwö nono mbanua Lowalangi ira razo tanö yöu hegöi fefu soi tanö böʼö. Lö ara me no aefa tebörögö wanuwö andrö, teʼowuloi ba zorugo niha Keriso nibayoini si tosai nasa ba gulidanö.
Ayati: Hez. 38:18-23; Dan. 2:34, 35, 44, 45; Fam. 6:2; 16:14, 16; 17:14; 19:20
Famaʼeleʼö: ”Si fakudo” si so yawa ba ”kudo safusi”, ”möna” ia me idudugö Gogi hegöi ira saradadunia. Mutiboʼö ”gurifö samuʼi” ba ”mbaho alitö si hola-hola safönu balera”, ba so sambua gara zodudugö adu sebua andrö.
Faʼalua: Ilumöʼö nono mbanua Lowalangi Yesu, si no tobali Razo ba Wamatörö Lowalangi. Fao khönia zi-144.000 hegöi ira malaʼika si tobali saradadunia, ba wangohori fefu soi sanuwö nono mbanua Lowalangi. Daʼö gamozua gulidanö Zatana.