Hadia Öʼila?

Hadia muʼogunaʼö papirus ba wamazökhi tundraha me götö Zura Niʼamoniʼö?

ATO niha sangila wa niha Miserai me föna, laʼogunaʼö garate nifazökhi moroi ba zinanö sotöi papirusa na manura ira. Simanö göi ndra niha Yunani hegöi Romawi. Hizaʼi, lö ato niha sangila wa muʼogunaʼö göi papirus ba wamazökhi tundraha.

Töra 2.500 fakhe silalö, no isura Yesaya samaʼeleʼö wa niha si toröi ”ba gamaudu nungo nidanö Gaitiofia”, hasambalö ’lafatenge denge-tengera, lafatörö ira ba nasi, latörö dundraha nifazökhi moroi ba döla papirus’. Ba gafuriata, ifaʼeleʼö Yeremia wa lasuwö dania Mbabilona ira saradadu Media-Feresia. Enaʼö lö moloi niha Mbabilona, latunu ”dundraha moroi ba döla papirus” niʼokhögöra ira saradadu Media-Feresia.​—Yes. 18:1, 2, nis; Yer. 51:32, nis.

No bua gera-era Lowalangi fefu nösi Zura Niʼamoniʼö andrö. Börö daʼö, lö ahöli dödö niha samahaʼö yaʼira ba Zura Niʼamoniʼö na so dandra moroi ba sejarah sangoromaʼö wa muʼogunaʼö papirus ba wamazökhi tundraha me götö Zura Niʼamoniʼö. (2 Ti. 3:16) Hadia dandra si no musöndra? No lasöndra ira arkeolog dandra sangoromaʼö wa laʼogunaʼö papirus ira niha Miserai mböröta ba wamazökhi tundraha.

HEWISA WAMAZÖKHI TUNDRAHA MOROI BA PAPIRUS?

Ba lewatö niha Miserai, so gambara nifalemba hegöi nifoe sanandrösa ba niha sangowuloi papirus ba sangogunaʼö yaʼia ba wamazökhi tundraha. Lataba, lafalaete, ba lahaogö wamöbö töla papirus andrö. No motölu sagi döla papirus. Andrö, na mufalaete ba muʼosambuaʼö wamöbö yaʼia, tola fasösö ba aro döla-dölania. Itutunö sambua buku sanandrösa ba waö-waö niha Miserai wa tola irugi 17 meter waʼanau dundraha moroi ba papirus andrö, ba so 10 irugi 12 galukha ero fatambai.

HANA WA LAʼOGUNAʼÖ PAPIRUS IRA SAMAZÖKHI TUNDRAHA?

Oya sibai zinanö papirus ba danö Miserai ba zi fasui Nungo Nidanö Nilo. Baero daʼö, aoha sibai wamazökhi tundraha moroi ba papirus. Hewaʼae na no ibörögö laʼogunaʼö geu ba wamazökhi tundraha segebua, laʼogunaʼö nasa zinanö papirus ira niha si fagai mböröta ba wamazökhi rake hegöi tundraha side-ide.

No ara laʼogunaʼö zinanö papirus ba wamazökhi tundraha. Itutunö samösa penulis moroi ba Yunani sotöi Plutarch, sauri me götö ndra sinenge, wa laʼogunaʼö nasa dundraha moroi ba papirus me luo daʼö.