2 Samuela

10 KUA mole atu e tau mena na ti mate ai e patuiki he fanau a Amoni, ti eke a Hanuno e tama hana mo patuiki ke hukuiaki a ia.

2 Ti pehe age ai a Tavita to fakaalofa atu au kia Hanuno ko e tama a Nahasa, tuga ne fakaalofa mai e matua hana kia au; ti fakafano age ai e Tavita hana tau fekafekau ke fakamafana a ia ha ko e hana matua tane. Kua hohoko atu e tau fekafekau a Tavita ke he motu he fanau a Amoni.

3 Ti pehe age e tau iki he fanau a Amoni kia Hanuno ko e iki ha lautolu, Piko kia a koe kua fakalilifu mai a Tavita ke he matua hau, kua fakafano mai ai e ia e tau tagata ke fakamafana a koe? nakai kia fakafano mai ai e Tavita hana tau fekafekau kia koe, kia kitekite a lautolu ke he maga ke toko ki ai, mo e moumou ai e ia?

4 Ti toto atu e Hanuno ke he tau fekafekau a Tavita, ti hifi ai fakafahitaha e ia ha lautolu a tau hafe, mo e hehele ai e ia he lautolu a tau tapulu ke he lotoga, ke hoko ke he tau patupula ha lautolu; ti fakafano atu e ia a lautolu.

5 Kua talahau atu kia Tavita, ti fakafano age e ia e falu ke fonofono a lautolu ha kua ma lahi ni a lautolu; kua pehe age e patuiki; Kia nonofo a a mutolu i Ieriko ato tutupu ai e tau hafe ha mutolu, ti liuliu mai a mutolu.

6 Kua kitia he fanau a amoni kua vihiatia e Tavita a lautolu, ti tuku fenoga atu ai he fanau a Amoni ki Suria i Peterehopo mo Suria i Sopa, ko e tau tagata uafulu e afe ko e kau ne o ke he tau hui ha lautolu, mo e tau tagata he patuiki ko Maaka ne taha e afe, mo e tau tagata i Isitopa ne hogofulu ma ua e afe.

7 Kua logona e Tavita ti fakafano age e ia a Ioapo katoa mo e kau oti ko e tau tagata malolo.

8 Ti o age e fanau a Amoni mo e tatanaki atu ke tau ke he gutuhala he maga, ka ko e tau tagata Suria ne o mai i Sopa, mo Rehopo, mo e tau tagata i Isitopa, mo Maaka kua nonofo kehe a lautolu ke he vao.

9 Kua kitia e Ioapo kua hagao mai e tau kia ia i mua mo tua, ti fifili ai e ia e tau tagata mai he tau tagata malolo oti i Isaraela, ti tatanaki atu e ia a lautolu ke tau ke he tau tagata Suria.

10 Ka ko lautolu ne toe he motu ne tuku atu e ia a lautolu ke he pule he matakainaga hana ko Apisai, ti tatanaki atu a lautolu ke tau mo e fanau a Amoni.

11 Ti pehe age a ia, Kaeke ke kautu mai a Suria kia au, ti lagomatai mai ai a koe kia au; ka ko e mena kaeke ke kautu mai he fanau a Amoni kia koe, to fina atu ai au mo e lagomatai kia koe.

12 Kia fakamanavalahi a, ti fakamalolo a a tautolu ma e motu ha tautolu, ma e tau maga foki he Atua ha tautolu, ka kia eke e Iehova e mena kua finagalo a ia ki ai.

13 Ti fakatata atu ai a Ioapo, katoa mo e motu ha ha ia ia ke tau mo Suria; ti fehola a lautolu mai mua hana.

14 Kua kitia he fanau a Amoni kua fehola a Suria, ti fehola ai a lautolu i mua a Apisai, mo e huhu atu ai a lautolu ke he maga. Ti liu mai ai a Ioapo he tau mo e fanau a Amoni, kua hoko mai a ia ki Ierusalema.

15 Kua kitia e Suria kua mahala a lautolu ki mua he tau tagata Isaraela, ti fakapotopoto fakalataha ai a lautolu.

16 Ti fakafano atu e Hatatesa mo e ta mai ai e tau tagata Suria ha ha he fahi atu he vailele; ti o mai ai a lautolu ki Helama; ko Sopaka foki, ko e takataki kau a Hatatesa, ne mua atu a ia kia lautolu.

17 Kua talahau ai kia Tavita, ti fakapotopoto ai e ia a Isaraela oti, ti o a lautolu ke he fahi atu a Ioritana kua hohoko atu a lautolu ki Helama. Ti tatanaki mai a Suria ke tau kia Tavita, ti tau ai a lautolu mo ia.

18 Ti fehola a Suria i mua a Isaraela, ti keli ni e Tavita ia Suria fitu e teau e tagata ne heke he tau kariota, mo lautolu ne heke solofanua ko e tau tagata ne fagofulu e afe, katoa mo Sopaka ko e takitaki kau ha lautolu ne keli e ia ti mate a ia ke he mena ia.

19 Kua kitia he tau patuiki oti ne fekafekau kia Hatatesa, ne mahala a lautolu kia Isaraela, ti fakamitaki ai a lautolu kia lautolu; ti matakutaku a Suria ke lagomatai foki ke he fanau a Amoni.