2 Samuela

13 KUA mole atu e tau mena ia; ne ha ha ia Apisaloma ko e tama a Tavita e mahakitaga ko e fifine mitaki, ko e hana higoa ko Tamara; ti manako kia ia a Amanono ko e tama a Tavita.

2 Kua mamahi e loto a Amanono, ti gagao ai a ia ha ko Tamara hana mahakitaga, ha ko e tamāfine tote a ia; kua uka foki kia Amanono ke eke ha mena kia ia.

3 Ka e ha ha ia Amanono e kapitiga, ko e hana higoa ko Ionatapu ke e tama a Sama ko e matakainaga a Tavita; ko e tagata iloilo lahi ni a Ionatapu.

4 Ti pehe age a ia kia ia, Ko e heigoa kia e mena ne tino kelea ai pihia a koe ke he taha aho mo e taha aho, ko koe ko e tama he patuiki? nakai kia tala mai a koe kia au? Ti pehe age a Amanono kia ia, Kua manako au kia Tamara ko e mahakitaga a Apisaloma haku a matakainaga.

5 Ti pehe age a Ionatapu kia ia, Kia takoto a a koe ke he hau a moheaga, ti fakatupua ai kua gagao a koe. Ka hau ai e matua tane hāu ke ahi a koe, ti pehe age a koe kia ia, Kia toka e koe haku a mahakitaga ko Tamara ke hau ke ta mai ai e ia e tau mena kai maku, mo e taute ai e ia e tau mena kai ki mua haku, kia kitia ai e au, ti kai ai e au mai he lima hana.

6 Ti takoto ai a Amanono, ti gagao fakatupua a ia; kua fina age e patuiki ke ahi a ia, ti pehe age a Amanono ke he patuiki, Kia toka e koe haku a mahakitaga ko Tamara ke hau, mo e taute ai e ia e tau areto lapalapa ne ua ki mua haku, ke kai ai e au mai he lima hana.

7 Ti fakafano atu e Tavita kia Tamara ke he hana fale, kua pehe atu kia ia, Kia fano a koe ke he fale he tugane hau ko Amanono, ke taute ai e koe e tau mena kai mana.

8 Ti fina age ai a Tamara ke he fale a Amanono hana tugane, ka ko ia ne takoto; ti toto ai e ia e lakuaga falaoa, ti laku ai e ia, mo e eke ai e ia e tau areto lapalapa ki mua hana, ti tunu e ia e tau areto lapalapa.

9 Ti uta ai e ia ke he pani mo e liligi ai e ia ki mua hana, ka e nakai mafai a ia ke kai ai e ia; ti pehe age a Amanono, Kia o kehe e tau tagata oti ia au; ti o kehe ai e tau tagata oti ia ia.

10 Ti pehe age a Amanono kia Tamara, Tamai la e koe e tau mena kai he he poko ke kai ai e au mai he lima hau. Ti uta e Tamara e tau areto lapalapa ne eke e ia ti ta age ai e ia kia Amanono hana tugane ke he poko.

11 Kua ta age ai e ia kia ia ke kai; ti toto e ia a ia, mo e pehe age a ia kia ia, Haku mahakitaga na e, hau a, kia momohe a taua mo au.

12 Ti tali age a ia kia ia, Aua ia, haku tugane na e, aua neke tapaki e koe au, ha ko e mena nakai eke pihia ke he motu a Isaraela; aua neke eke e koe e mena kelea na.

13 Ko au foki to fano au ki fe mo e haku a ma; ka ko koe to tatai a koe mo e taha tagata matahavala ke he motu a Isaraela; hanai, kia vagahau a mua mo e patuiki, ha ko e mena nakai lamakai e ia a au kia koe.

14 Ka e nakai mafai a ia ke fanogonogo ke he hana tau kupu, kua mua hana malolo ke he malolo he fifine, ti tapaki e ia a ia, ti mohe a ia mo ia.

15 Ti fakavihia lahi e Amanono a ia, kua mua hana fakavihia kia ia ke he hana manako fakamua kia ia; ti pehe age a Amanono kia ia, Matike ā, ti fano ā koe.

16 Ti pehe age a ia kia ia, Aua ia, ha kua mua he kelea e mena nai kua eke e koe he fakafano kehe e koe au ke he mena na ne eke e koe kia au. Ka e nakai mafai a ia ke fanogonogo kia ia;

17 Ti ui age a ia ke he hana fekafekau ne fekafekau ai kia ia, kua pehe age kia ia, Kia tuku atu a e koe e fifine nai ki fafo ia au, ti fakamau e koe e gutuhala ki tua hana.

18 Ne tapulu a ia ke he tapulu loa, ha kua tapulu ai pihia e tau tama fifine ha patuiki ko e tau tamāfine tote. Ti takitaki he fekafekau a ia ki fafo mo e fakamau ai a gutuhala ki tua hana.

19 Ti tuku ai e Tamara e efuefu ki luga he ulu hana, mo e hehe e ia hana tapulu loa ne tapulu ai a ia; ne tuku foki e ia hana lima ki luga he ulu hana, ti fano ai a ia, kua tagi aue ai a ia mo e fano.

20 Ti pehe age a Apisaloma hana tugane kia ia, Ne ha ha ia koe kia a Amanono hau a tugane? Ka ko e hanei, haku a mahakitaga na e, kia fakamate a koe, ha ko e tugane hau a ia, aua neke manatu e koe ke he mena nai. Ti nofo noa ai a ia ke he fale a Apisaloma hana tugane.

21 Kua logona he patuiki ko Tavita e tau mena oti ia ti ita lahi ai a ia;

22 Ka e nakai vagahau atu e Apisaloma kia Amanono ha kupu kelea po ke kupu mitaki; ha kua vihiatia e Apisaloma a Amanono, he tapaki e ia a Tamara hana mahakitaga.

23 Kua mole atu e tau tau ne ua, ti ha ha i ai kia Apisaloma e tau tagata hifi mamoe i Paala-hasora ne tata age ki Efaraimo. Ti ui age e Apisaloma ke he tau tama tane oti he patuiki ke o age ki ai.

24 Ti fina age ai a Apisaloma ke he patuiki, mo e pehe age, Kitiala, ha ha i ai ke he hau a fekafekau e tau tagata hifi mamoe; kia haele atu ai e patuiki mo e hana tau fekafekau fakalataha mo au hau a fekafekau.

25 Ka kua pehe age e patuiki kia Apisaloma, Aua ia haku tama na e aua neke o atu a mautolu oti neke pehia a koe ia mautolu. Ti ole fakamakamaka age e ia kia ia, ka e nakai mafai a ia ke haele atu ai a ia, ka e fakamonuina e ia a ia.

26 Ti pehe age a Apisaloma, Kaeke ke nakai o a tautolu mo koe, kia o a mautolu mo e matakainaga haku ko Amanono. Ti pehe age e patuiki kia ia, Ke o a mua mo ia he ha?

27 Ka e ole fakamakamaka a Apisaloma kia ia, ti toka atu ai e ia a Amanono ke o mo ia katoa mo e tau tama tane oti he patuiki.

28 Ti poaki atu a Apisaloma ke he hana tau fekafekau, kua pehe atu, Kikite la a mutolu ka fiafia e loto a Amanono ha ko e uaina; ka pehe atu au kia mutolu, Keli ā e mutolu a Amanono, ti tamate ai e mutolu a ia, aua neke matakutaku a mutolu; nakai kia poaki atu ai e au kia mutolu? kia fakamalolo a, mo e fakatoa a mutolu.

29 Kua eke he tau fekafekau a Apisaloma, kia Amanono, tuga ne poaki atu ai e Apisaloma. Ti mamatike ai e tau tama tane oti he patuiki, kua takitaha mo e heke hana a falata, ti fehola ai a lautolu.

30 Ha ha he puhala a lautolu ti hoko mai ai e tala kia Tavita, kua pehe mai, Kua kelipopo e Apisaloma e tau tama tane oti he patuiki, nakai ni toe taha ia lautolu.

31 Ti matike e patuiki, ti hehe ai e ia hana tau tapulu, mo e takoto ai a ia ke he kelekele; ko e hana tau fekafekau oti ne tutu ai ne hehe ai e lautolu ha lautolu a tau tapulu.

32 Ti tala age e Ionatapu ko e tama a Sama ko e matakainaga he patuiki, kua pehe age, Aua neke manatu haku iki kua tamate e tau fuata oti ko e tau tama he patuiki, ha ko Amanono hokoia kua matulei; ha kua kotofa ai e Apisaloma ia tali mai he aho ne tapaki ai e ia a Tamara hana mahakitaga.

33 Hanai, aua neke manatu ai haku iki ko e patuiki ke he mena nai, kua pehe, Kua matulei e tau tama tane oti he patuiki; ha ko Amanono ni hokoia kua matulei.

34 Kua hola a Apisaloma. Kua haga hake e fuata ne toko, ti kitia atu e ia e motu o tagata tokologa ne o mai he puhala ki tua hana ke he fahi he mouga.

35 Ti pehe age a Ionatapu ke he patuiki, Kitiala, ko e tau tama tane he patuiki kua haele mai, tuga ne kupu he hau a fekafekau, kua eke ni pihia.

36 Kua fakahiku e ia hana tau kupu, kitiala, ti o mai ai e tau tama tane he patuiki; ti tagi ai a lautolu mo e leo lahi katoa foki mo e patuiki, mo e hana tau fekafekau oti kua tagi lahi ni a lautolu.

37 Ka kua hola a Apisaloma, mo e fina age a ia kia Talemai ko e tama a Amihuta ko e patuiki a Kesuri; ka e mānu ai a Tavita ke he tau aho oti ni ha ko e hana tama.

38 Kua hola a Apisaloma mo e fina age a ia ki Kesuri; ti tolu e tau he nofo ai a ia.

39 Ti manako e patuiki ko Tavita ke fina atu kia Apisaloma; ha kua mafanatia hana loto ha ko Amanono, ha kua mate a ia.