2 Samuela

23 KO e tau kupu fakamui a Tavita hanai; kua pehe age a Tavita ko e tama a Iese, kua pehe e tagata kua ta hake ai ki luga, ko ia kua fakauku ai he Atua a Iakopo, ko ia kua uhu lologo mo e leo mitaki i Isaraela.

2 Kua vagahau age ai ia au e Agaga a Iehova; ha ha he alelo haku foki hana finagalo.

3 Ne vagahau mai kia au e Atua a Isaraela; ko e maka tumau a Isaraela, kua vagahau mai a ia, Ko ia kua pule ke he tau tagata kua eke ai mo e tututonu; kua pule ai a ia mo e matakutaku ke he Atua;

4 Kua tuga ne maama ke he magaaho pogipogi a ia ka kua hake e la, ko e pogipogi nakai malumalu ai e lagi; ka kua tupu mai he kelekele e vao mui kikila mai he la, ka mole atu e uha.

5 Ko e moli nakai pihia haku a magafaoa mo e Atua, ka kua eke e ia e maveheaga tukulagi mo au, kua taute ke he tau mena oti ni, mo e mau; ha ko e mena kuenaia haku a fakamouiaga, ti kuenaia foki haku a manako, pete he nakai fakatupu ai e ia.

6 Ka ko e tau tagata kolokolovao, tuga ne tau akau talatala, kua tiaki a lautolu oti ni; ha kua nakai toto a lautolu ke he lima.

7 Ka ko e tagata kua toto ki ai, kua lata ke ha ha ia ia e lapatoa mo e fuata tao; ti huhunu ai ni a lautolu ke he afi ke he mena ia.

8 Ko e tau higoa hanai he tau toa ha ha ia Tavita; ko Iasapama ko e tama a Hakamoni, kua mua a ia ke he tokotolu, ko Atino haia ko e Asoni; ne nikiti ai e ia hana tao ke he tau tagata tokovalu e teau ne keli ai ke he aho taha.

9 Ti mui age kia ia a Eleasaro ko e tama a Toto, ko e tama a Akoki, ko e taha ia he tau toa tokotolu ne fakalataha mo Tavita, he fakafiu a lautolu ke he tau tagata Filisitia ne fakapotopoto ai ke he mena ia ke tau ka kua o hake e tau tagata Isaraela;

10 Ti tu mai a ia mo e keli e tau tagata Filisitia ato mategugu ai hana lima, ti pipiki ai e lima hana ke he pelu; kua eke ai e Iehova e fakamouiaga lahi ke he aho ia; ti liliu atu e motu ke mumui atu kia ia ke fofo ai e tau mena hokoia.

11 Kua mole atu ia ko Sama ko e tama a Aka ko e Harari; kua fakapotopoto ai e tau tagata Filisitia ko e kau, ha ha i ai ke he mena ia e kala he māla ne toka ai e tau atasema; ti fehola ai e motu ki mua he tau tagata Filisitia.

12 Ti tu a ia ke he loto māla mo e laveaki ai e ia, mo e keli e ia e tau tagata Filisitia; ti eke ai e Iehova e fakamouiaga lahi.

13 Ne o hifo foki e tokotolu mai he tokotolugofulu ko lautolu ne mua, ti hohoko atu a lautolu kia Tavita ke he ana i Atulama, ke he vaha ne helehele ai e saito; ka kua he api ai e kau he tau tagata Filisitia ke he pahua he tau tagata Refā.

14 Ko e vaha ia ne nofo ai a Tavita ke he taue; ka ko e kau leoleo he tau tagata Filisitia ha ha i Petelehema a lautolu.

15 Ti manako ai a Tavita, kua pehe age a ia, Kua fia inu maga vai au mai he vai keli ha ha he gutuhala i Petelehema.

16 Ti heia atu ai e tau toa tokotolu na e heaga api he tau tagata Filisitia, mo e uta vai mai e lautolu he vaikeli ha ha he gutuhala i Petelehema; kua toto ai, mo e uta ai kia Tavita, ka e nakai mafai a ia ke inu, ka e liligi atu ai e ia kia Iehova;

17 Kua pehe age a ia, Iehova na e, kia mamao ia au ke eke ai e au e mena nai; nakai kia ko e toto hanai, he tau tagata nai, ne o atu a lautolu, mo e tuku lele atu ha lautolu a tau moui? ko e mena ia nakai inu ai e ia. Ko e mena hanā ne eke he tau toa tokotolu na.

18 Ko Apisai foki ko e matakainaga a Ioapa, ko e tama a Seruia, kua mua a ia ke he tokotolu; ne nikiti foki e ia hana tao ke he tau tagata ne tokotolu e teau ti keli ai e ia a lautolu; ti talahaua a ia fakalataha mo e tokotolu.

19 Nakai kia mua a ia he tokotolu? ti eke ai a ia mo iki kia lautolu, ka e nakai hoko atu a ia ke he tokotolu fakamua.

20 Ko Penaia foki ko e tama a Iehoiata, ko e tama he tagata malolo mai Kapeseelu, ne eke e ia e tau mena loga; ne keli ai e ia e tau tama tokoua a Arielu i Moapi; ne hifo foki a ia mo e keli e leona ke he luo ke he vaha ne to ai e kiona.

21 Ti keli foki e ia e tagata Aikupito, ko e tagata mitaki; ha ha he lima he tagata Aikupito e tao, ti hifo a ia kia ia mo e tokotoko, ti hamuti mai e ia e tao he lima he tagata Aikupito, ti keli aki e ia a ia ke he tao ni hana.

22 Ko e tau mena na ne eke e Penaia ko e tama a Iehoiata, ti talahaua a ia fakalataha mo e tau toa tokotolu;

23 Ne mua a ia ke he tokotolugofulu ka e nakai hoko atu a ia ke he tokotolu fakamua; ti kotofa e Tavita a ia ke pule kia lautolu kua leveki a ia.

24 Ko Asaelu ko e matakainaga a Ioapo ko e taha ia he tokotolugofulu; ko Elehanana ko e tama a Toto ko e tagata Petelehema.

25 Ko Sama ko e tagata Haroti, ko Elika ko e tagata Haroti,

26 Ko Helesa ko e tagata Paleti, ko Ira ko e tama a Ikesa ko e tagata Tikoa,

27 Ko Apiseru ko e tagata Anatota, ko Mepuna ko e taha he fanau a Usa,

28 Ko Salemoni ko e tagata he magafaoa a Akoki, ko Maharai ko e tagata Netopā,

29 Ko Helepa ko e tama a Paana ko e tagata Netopā, ko Itai ko e tama a Ripai ko e tagata Kipeā ko e maga he fanau a Peniamina,

30 Ko Penaia ko e tagata Piratonu, ko Hitai mai ke vailele ko Kaasa,

31 Ko Api-alepona ko e tagata Arepa, ko Asemaveta ko e tagata Pahurima,

32 Ko Eliepa ko e tagata Saalepo, ko e taha tama a Iasenu, ko Ionatana,

33 Ko Sama ko e tagata Harari, ko Ahiamu ko e tama a Sararu ko e tagata Harari,

34 Ko Elipeleta ko e tama a Ahasepai, ko e tama he tagata Maakati, ko Eliamu ko e tama a Aitofele ko e tagata Kilo,

35 Ko Heserai ko e tagata Karamelu, ko Paarai ko e tagata Arapa,

36 Ko Ikalo ko e tama a Natano mai Sopa, ko Pani ko e tagata Kato,

37 Ko Seleko ko e tagata Amoni, ko Naharai ko e tagata Perota ko e hoa a Ioapo ko e tama a Seruia,

38 Ko Ira ko e tagata he magafaoa a Iteru, ko Karepa ko e tagata he magafaoa a Iteru;

39 Ko Uria ko e tagata Heti; ko e katoatoa ko e tokotolugofulu ma fitu.