Eseta

4 NE iloa e Moretikai e tau mena oti kua eke, ti hehe ai e Moretikai hana tau tapulu, mo e tapulu ai a ia ke he ie talatala mo e efuefuafi, ti fano ai a ia ki loto he maga mo e tagi ai mo e tagi lahi mo e mamahi.

2 Ne fina age a ia ki mua he gutuhala he patuiki, ha ko e mena fono ke hu atu taha ke he gutuhala he patuiki ka tapulu ai a ia ke he ie talatala.

3 Ko e taha fahi kautu mo e taha fahi kautu ko e tau kautu oti ne hoko ki ai e kupu he patuiki mo e hana tau fakatufono, ne tagi lahi ai e tau tagata Iuta, mo e fakakanopogi, mo e tagi, mo e tagi tatuki; ne fofola ai foki he tau tagata tokologa ha lautolu a tau mohega ke he ie talatala mo e efuefuafi.

4 Ti o age ai e tau tama fifine a Eseta mo e hana tau eunuka, mo e tala age a lautolu kia ia. Ti mamahi lahi ai e patuiki fifine; ne fakafano age foki e ia e tau tapulu ke tapulu ai a Moretikai, mo e uta kehe ia ia hana ie talatala; ka e nakai talia ai e ia.

5 Ti ui age ai e Eseta kia Hatako, ko e taha eunuka ia he patuiki, ne kotofa e ia ke fekafekau kia ia, mo e poaki e ia kia ia ke fano ki Moretikai ke iloa ai po ke heigoa e mena na? ko e ha foki e mena ia?

6 Ti fina age ai a Hatako kia Moretikai ke he male he maga ha ha i mua he gutuhala he patuiki.

7 Ti fakakite age e Moretikai kia ia e tau mena oti ne hohoko kia ia, mo e tala age fakatonu e ia e tau ario ne pehe age a Hamanu ke fafati age ai e ia ke he mena ne tatanaki ai e tau koloa he patuiki ha ko e tau tagata Iuta, kia fakamahakava ai a lautolu.

8 Ne ta age foki e ia kia ia e tohi he fakatufono ne lagaaki ne fakamatala mai i Susana kia fakaoti ai a lautolu, mo e fakakite atu ai e ia kia Eseta mo e tala age a ia kia ia, mo e pehe age a ia kia ia ke fina age a ia ke he patuiki ke ole age a ia kia ia, mo e olelalo age ai a ia kia ia ha ko e hana motu.

9 Ti fina age ai a Hatako mo e tala age a ia kia ia e tau kupu a Moretikai.

10 Ti vagahau age e Eseta kia Hatako mo e poaki age ai e ia kia Moretikai, kua pehe age,

11 Kua iloa he tau fekafekau oti he patuiki, mo e tau tagata he tau fahi kautu he patuiki, kaeke ke fina age ai taha ko e tane po ke fifine ke he patuiki ke he lotopa i loto, ka e nakai ui ai a ia, ko e taha maka e fakatufono kia ia, kia mate ni a ia; ka e toe a ia kua fakaolo age ki ai he patuiki e tokotoko auro ke moui ai a ia. Ko au foki nakai ui ai au ke fina age ke he patuiki ke he tau aho ne tolugofulu ia.

12 Ti tala age ai kia Moretikai e tau kupu a Eseta.

13 Ti pehe age ai a Moretikai ke tali age kia Eseta, Aua neke piko a koe ke he hāu a loto ke hao ai a koe he tau tagata Iuta oti, he ha i ai a koe ke he magafaoa he patuiki.

14 Ha ko e mena kaeke ke fakamate ai ni a koe ke he vaha nai, ti hoko mai ai e tokanoaaga mo e laveaki mai ai e tau tagata Iuta he taha mena; ka ko koe, mo e magafaoa he hau a matua tane to mamate ni a mautolu; kua iloa e hai foki po kua eke nakai a koe mo patuiki fifine ke lata ai mo e tau aho pehenai?

15 Ti tala age e Eseta, kia tali age ai kia Moretikai,

16 Kia fano a koe, kia fakapotopoto a e koe e tau tagata Iuta oti ha ha i Susana, mo e fakakanopogi a a mutolu ha ko au, aua neke kai a mutolu ti aua foki neke inu a mutolu ke he tolu e aho ke he po mo e aho; ko au foki mo e haku a tau tama fifine to fakakanopogi ai pihia e mautolu; to fina age pihia foki au ke he patuiki, ko e mena nakai lata ia mo e fakatufono; kaeke ke mate au, to mate ai ni.

17 Ti fina age ai a Moretikai, mo e eke ai e ia ke lata mo e tau mena oti ne poaki age ai e Eseta kia ia.