Iopu

Ko e Tohi a Iopu

1 HA ha i ai ke he motu ko Usa e tagata, ko Iopu hana higoa; ne mahani hakohako e tagata ia, mo e mahani tonu, ne matakutaku foki a ia ke he Atua, mo e kalo kehe a ia mo e tau mena kelea.

2 Ne fanau ai foki kia ia tokofitu e tama tane mo e tokotolu e tama fifine.

3 Ha ha ia ia foki e tau manu ko e tau mamoe ne fitu e afe, mo e tau kamela ne tolu e afe, mo e tau povi ne taha e afe, mo e tau asini fifine ne lima e teau, katoa mo e tau fekafekau tokologa ni; ne mua ue atu foki e tagata na he tau tagata oti ke he faahi uta.

4 Ne feoaki hana tau tama tane mo e kai galue ai a lautolu ke he tau fale ha lautolu, takitaha mo e hana aho; ne fakafano atu foki e lautolu mo e ui ke he tau mahakitaga tokotolu ha lautolu ke kai ai mo e inu fakalataha mo lautolu.

5 Kua mole atu e tau aho ne kai galue ai a lautolu, ti fakafano atu e Iopu mo e fakatapu ai a lautolu, ti uhu matike a ia he magaaho pogipogi mo e eke e tau poa huhunu ke lata ai ma lautolu oti he totou; he pehe age a Iopu, Na kua hala haku a tau tama tane, mo e kupu kelea a lautolu ke he Atua ke he tau loto ha lautolu. Ne eke pihia e Iopu he tau aho oti ni.

6 Kua hoko ke he taha aho ti o mai ai e tau tama tane he Atua ke tutu ai a lautolu ki mua a Iehova; ti hau ai foki a Satani fakalataha mo lautolu.

7 Ti pehe age a Iehova kia Satani, Ne hau i fe a koe? Ti tali age a Satani kia Iehova kua pehe age, Kua hau au he fano feliuaki ke he lalolagi, mo e faifano ai.

8 Ti pehe age a Iehova kia Satani, Kua manamanatu nakai a koe ke he fekafekau haku ko Iopu, kua nakai ha ha i ai taha ke tatai mo ia ke he lalolagi, ko e tagata mahani hakohako mo e mahani tonu, kua matakutaku a ia ke he Atua mo e kalo kehe mo e tau mena kelea?

9 Ti tali age a Satani kia Iehova, kua pehe age, Kua matakutaku noa kia a Iopu ke he Atua?

10 Nakai kia pa takai ai e koe a ia, mo e hana fale, katoa mo e hana tau mena oti ke he tau faahi oti? kua fakamonuina e koe e gahua he hana tau lima, kua fakaloga ai foki hana tau manu ke he fonua.

11 Ka kia fakaolo atu a e koe e lima hau mo e pipiki atu ke he hana tau mena oti, ti vagahau kelea ai a ia kia koe ki mua hau ni.

12 Ti pehe age a Iehova kia Satani, Kitiala, ha ha he lima hau e tau mena oti hana, ka ko ia, aua neke fakaolo atu e koe hau a lima kia ia. Ti fano kehe ai a Satani mai mua a Iehova.

13 Kua hoko ke he taha aho, ti kai mena mo e inu uaina ai e tau tama tane hana, mo e hana tau tama fifine ke he fale he tagata fakamua ha lautolu.

14 Ti fina age ai taha fekafekau kia Iopu, kua pehe age, Ne toho he tau povi e tau arote ke he fonua; ne kai mena ai foki e tau asini fifine ke he tapa ha lautolu;

15 Ti feoho mai e tau tagata Sihipa, mo e fofo ai a lautolu; kua kelipopo foki e lautolu e tau fekafekau ke he pelu; ka e hao au, hoko au ni tokotaha, ke tala atu ai kia koe.

16 Kua vagahau ai a ia ke he mena na, ti fina age foki taha, Kua pehe age, Kua to e afi he Atua mai he lagi, kua huhunu ai e tau mamoe mo e tau fekafekau, kua fakaoti ai a lautolu, ka e hao au hoko au ni tokotaha, ke tala atu ai kia koe.

17 Kua vagahau ai a ia he mena na, ti fina age foki taha, Kua pehe age, Ne vevehe la tolu ai he tau tagata Kaletaia e kau, ti feoho mai a lautolu ke he tau kamela, mo e kaiha ai e lautolu, ti kelipopo foki e lautolu e tau fekafekau ke he pelu; ka e hao au, hoko au ni, tokotaha ke tala atu ai kia koe.

18 Ha ne vagahau a ia he mena na, ti fina age foki taha, kua pehe age, Ne kai mena mo e inu uaina ai e tau tama tane hau mo e hau e tau tama fifine ke he fale he tagata fakamua ha lautolu;

19 Ti kitiala, ne agi mai e matagi lahi mai he vao, ne pehi mai ke he tau hika ne fa he fale, ti veli ai ni ki luga he fanau, ti mamate ai a lautolu, kua hao au, hoko au ni tokotaha ke tala atu ai kia koe.

20 Ti matike a Iopu, mo e hehe ai e ia hana tapulu, mo e hifi e ia hana ulu; ti fakaveli fakafohifo ai a ia ke he kelekele mo e hufeilo.

21 Ti pehe age a ia, Ne hau au he manava he haku matua fifine mo e nakai fai felevehi; to liu atu foki au ki ai mo e nakai fai felevehi; ne foaki mai ai e Iehova, kua uta kehe foki e Iehova; kia monuina ai e higoa a Iehova.

22 Nakai hala a Iopu he tau mena oti na, ti nakai pehe foki a ia kua goagoa e Atua.