Iopu

12 TI tali age ai a Iopu, kua pehe age,

2 Ko e moli, ko mutolu ni ko e motu, to mole atu fakalataha a mutolu mo e iloilo.

3 Ha ha ia au foki e loto manamanatu ke tatai mo mutolu, nakai to ki tua foki au ia mutolu; ko hai kia kua nakai iloa e tau mena pehena?

4 Kua eke au po ke taha kua va ki ai hana kapitiga, ko e tagata ne ui atu ke he Atua ti tali mai a ia kia ia; kua eke mo mena ke va ki ai e tagata mahani tututonu, ko ia ne mahani hakohako.

5 Ko e matematekelea ko e mena vihiatia haia ke he manatu he tagata kua nofo fakahanoa; kua taute ia ma lautolu kua hapelua ai e tau hui.

6 Nakai haofia e tau fale ie ha lautolu ne fofo mena, kua nonofo mo e nakai haofia foki a lautolu ne fakahogohogomanava atu ke he Atua; ko lautolu ne ta mai ki ai e tau mena he Atua, ke he tau lima ha lautolu.

7 Ka e huhu la ke he tau manu huifa to fakaako mai e lautolu a koe; mo e tau manu lele to fakailoa mai e lautolu kia koe.

8 Po ke vagahau atu a koe ke he kelekele to fakaako mai e ia a koe; to tala mai foki kia koe e tau ika he tahi.

9 Po ko hai kia kua nakai iloa ke he tau mena oti ia kua eke he lima a Iehova e tau mena oti na?

10 Ha ha he lima hana e moui he tau mena moumoui oti, mo e fafagu he tau tagata oti kana.

11 Nakai kia kamatamata he teliga e tau kupu, tuga ne kamata ai he gutu hana tau mena kai?

12 Ha ha i ai ke he tau tagata momotua e iloilo; ko ia foki ne fakatuleva ai hana tau aho ha ha ia ia e pulotu.

13 Ha ha ia ia e iloilo mo e malolo, ne toka ai ia ia pule mo e pulotu.

14 Kitiala, ne ulu moumou e ia, ti nakai maeke ke liu ati hake ai; ne puipui ai e ia e tagata, ti nakai tuai vevete e fale.

15 Kitiala, kua taofi e ia e vai ti pakupaku ai a ia; ne fakafano mai foki ti maona ai e tau motu.

16 Ha ha ia ia e malolo mo e iloilo; ha ha ia ia e tagata ne fakahehe ai, katoa mo ia ne fakahehe ai a ia.

17 Ne takitaki ai e ia e tau pule po ke tau tagata ne moua he tau, ti eke foki e ia e tau fakafili mo tau tagata goagoa.

18 Ne vevete e ia e tau liliaga he tau patuiki, ti pipi foki e ia e tau tokupu ha lautolu ke he tau pipi.

19 Ne takitaki ai e ia e tau ekepoa po ke tau tagata ne moua he tau; ne tulutulei hifo foki e ia a lautolu ne malolo.

20 Ne uta kehe e ia e vagahau ha lautolu ne fakamoli, ti uta kehe foki e ia e loto manamanatu he tau tagata momotua.

21 Ne fakavihia e ia e tau iki, ti vevete foki e ia e tau pipi tokupu ha lautolu ne malolo.

22 Ne fakakite ai e ia e tau mena hokulo mai he pouli, ne ta mai foki e ia e ata he mate ke he maama.

23 Ne fakatokologa ai e ia e tau motu, ne fakaotioti ai foki e ia; ne fakalaulahi e ia e tau motu, ne fakalautote ai foki e ia.

24 Ne uta kehe e ia e tau loto he tau iki ne mua he tau motu he lalolagi, mo e fakahehe ai e ia a lautolu ke he tau mena toka noa, nakai ha i ai ha puhala.

25 Ne tamotamo ai a lautolu ke he pouli, kua nakai fai maama; ne fakahehe foki e ia a lautolu po ke tau tagata kua konahia.