Iopu

24 KUA nakai galo e tau tau kia Ia hana e malolo oti kana, hanai, ko e heigoa e mena kua nakai iloa ai hana tau aho e lautolu ne mahani mo ia?

2 Kua tolo katofia e falu; kua fofo e lautolu e tau fuifui mamoe mo e fagai ai a lautolu.

3 Kua uta e lautolu e asini he tau tama kua nakai fai matua, kua uta e lautolu e povi he fifine takape ke eke mo mena ke fakamau aki e fakafua.

4 Kua fakaliliu kehe e lautolu a lautolu ne nonofogati mai he puhala, kua fakamumuli fakalataha ai a lautolu ne matematekelea ke he motu.

5 Kitiala, tuga ne tau asini vao ke he tutakale, ne o age ai a lautolu ke he tau gahua ha lautolu, kua uhu kumi e lautolu e tau mena kai; ko e tutakale kua moua mai ai e tau mena kai ma e fanau ha lautolu.

6 Kua helehele e lautolu ke he fonua e tau mena ne fagai aki e tau manu ma lautolu; mo e faki e lautolu e tau fua venevene he ulu vine he tau tagata mahani kelea.

7 Ne momohe noa a lautolu he po ti ahogia mo e nakai tapulu, kua makalili foki ka e nakai fai kafu a lautolu.

8 Kua pala a lautolu he uha ne to mai he tau mouga, kua pipiki foki a lautolu ke he kaumaka he nakai fai mena a lautolu ke malu ai.

9 Ha ha i ai foki a lautolu ne fofo mai he huhu ha hana matua fifine e tama ne mate hana matua tane, kua uta foki e lautolu e mena ke fakamau aki e fakafua, mai he tau tagata matematekelea.

10 Kua o noa a lautolu mo e nakai tapulu; kua fia kai foki a lautolu kua fetuku e lautolu e tau fuhi saito;

11 Kua tatau e lautolu e puke lolo ke he tau fale ha lautolu, kua taholi e lautolu ha lautolu a tau holiaga vine, ka e fia inu ni a lautolu.

12 Kua tauoi mai e tau tagata he maga ne tokologa ai, kua tagi ai foki a lautolu ne kafokia; ka e nakai talahau ai he Atua kua hala a lautolu.

13 Ha ha i ai a lautolu na fakalataha mo lautolu ne fakafualoto ke he maama; nakai iloa e lautolu hana tau puhala, nakai tumau foki a lautolu ke he hana tau puhala loto.

14 Kua matike e keli tagata ke he matafatafaata he aho, kua kelipopo e ia a ia ne matematekelea, mo ia ne nofogati; kua tuga ne kaiha foki a ia ke he po.

15 Kua tatali foki e tagata faivao ke he magaaho mahegihegi he afiafi, kua pehe hifo a ia, To nakai kitia he taha au; kua ufiufi foki e ia hana mata.

16 Kua keli e lautolu e tau kaupa he tau fale he po, kua puipui e lautolu a lautolu ke he aho; nakai iloa e lautolu e maama.

17 Ha ko e pogipogi kua tuga ne ata he mate ia kia lautolu oti, ha kua iloa e lautolu e tau mena matakutakuina he ata he mate.

18 Kua lata a ia mo e mena māmā ki luga he vai; kua malaia ha lautolu a tufaaga ke he lalolagi; nakai hagao atu a ia ke he puhala he tau ulu vine.

19 Kua fakaoti ai e vai kiona ke he lā mo e vevela, kua fakaoti pihia e Seoli a lautolu ne hala.

20 Kua nimo a ia he manava he hana matua fifine; kua humelie a ia ke he uaga, nakai tuai manatu a ia; to fati foki e tagata mahani hepehepe tuga ne akau,

21 Kua fakaoti e ia e fifine tufua kua nakai fanau; ti nakai eke fakamitaki atu foki e ia e fifine takape.

22 Kua toho foki e ia a ia ne malolo ke he hana malolo; ka matike a ia ti nakai tua taha ke he hana moui.

23 Kua foaki age he Atua kia lautolu ke nonofo mo e nakai haofia, kua falanaki foki a lautolu ki ai, kua fofoga atu foki a ia ke he tau puhala ha lautolu.

24 Kua fakatokoluga ai a lautolu ke he falu a aho gahoa, ti nakai ha ha i ai a lautolu; kua fakaoti ni a lautolu, kua fakapotopoto ai a lautolu tuga ne tau tagata oti; kua hahala foki a lautolu tuga ne tau tapunu he tau kakau saito.

25 Kaeke kua nakai pihia, ko hai kia ke fakakite mai haku a pikopiko, mo e eke haku a tau kupu mo mena nakai aoga?