Iopu

32 TI nakai tuai tali age ai e tau tagata tokotolu na kia Iopu, ha kua tututonu a ia ke he hana manatu.

2 Ti tupu ai e ita a Elihu ko e tama a Parakelu, ko e tagata Pusa ko e tagata he magafaoa a Rama, ne tupu hana ita kia Iopu he talahaua e ia a ia kua tututonu, ka e nakai ko e Atua.

3 Ne tupu foki hana ita ke he hana tau kapitiga tokotolu, he talahau ai e lautolu kua hala a Iopu, ka e nakai maeke kia lautolu ke tali age kia ia.

4 Ne tatali atu a Elihu kia Iopu, ato oti atu e tau kupu, ha kua momotua a lautolu, ka e gahoa hana tau tau.

5 Kua kitia e Elihu kua nakai ha ha he tau fofoga he tau tagata tokotolu ha kupu ke tali age ai, ti tupu ai hana ita.

6 Ti tali age ai a Elihu ko e tama a Parakelu ko e tagata Pusa, kua pehe age, Ne gahoa haku tau tau, ka e momotua ni a mutolu, ko e mena ia ne maimaina au mo e matakutaku ai au ke fakakite atu kia mutolu haku a taofi.

7 Ne pehe au, kia vagahau mai he tau aho, kia fakakite mai he tau tau loga e iloilo.

8 Ka e ha ha i ai ni e agaga i loto he tagata; ko e fafagu ki ai foki a Ia hana e malolo oti kana ti pulotu ai a lautolu.

9 Nakai ko e tau tagata talahaua, ne iloilo; nakai ko e tau tagata momotua foki ne pulotu ai ke he tau fakafiliaga.

10 Ko e mena ia kua pehe atu au, Kia fanogonogo mai a a mutolu kia au, to fakakite atu foki e au haku a taofi.

11 Kitiala, ne tatali atu au ke he tau kupu ha mutolu; ne fakateliga atu au ke he tau fakafiliaga ha mutolu, he fifili ai e mutolu ha mutolu a tau kupu.

12 Ne manamanatu foki au ke he tau kupu ha mutolu; ti kitiala, nakai ha ia mutolu taha ne akonaki atu mo e tonu kia Iopu, po ke tali atu ke he hana tau kupu.

13 A mutolu neke pehe age a mautolu, Kua moua e mautolu e iloilo; kua mahala a ia ke he Atua ni, ka e nakai ko e tagata.

14 Nakai fakalata mai e ia hana tau kupu kia au, to nakai tali age foki au kia ia mo e tau kupu ha mutolu.

15 Kua ofomate a lautolu; kua nakai tali age foki a lautolu; nakai tuai fai kupu a lautolu ke vagahau ai.

16 Ke tatali foki kia au he nakai vagahau a lautolu, ha kua fakanono a lautolu, kua nakai tuai tali age foki a lautolu?

17 Ko au foki to tali atu ni au, ko au ni; to fakakite atu e au haku a taofi.

18 Ha kua puke au ke he tau kupu; kua omoi mai kia au he agaga ha ha i loto ia au.

19 Kitiala, ko e loto haku kua tuga ne uaina nakai vevete, ko e pa ne fai tuga ne tau lupo kili manu fou.

20 To vagahau atu au, kia fakamanava ai au, to fakamaga au haku tau laugutu, mo e tali atu ai au.

21 Aua neke fakamailoga tagata au; aua neke fakaheke atu foki au ke he tagata.

22 Ko e mena nakai maeke kia au ke fakaheke atu, neke uta kehe fakaave au a Ia ne eke au.