Iopu

4 TI tali age ai a Elifasa ko e tagata Timanu, kua pehe age,

2 Ka lali atu taha ke vagahau kia koe po ke mamahi nakai a koe? Ka e maeke kia hai ke taofi hana tau kupu?

3 Kitiala, ne fakamafana atu a koe ke he tau tagata tokologa, ti fakamalolo ai e koe e tau lima ne lolelole.

4 Ko e tau kupu hau ne fakatu ai a ia ne tauveli, ne fakamalolo ai foki e koe e tau tulihui ne tagatagato.

5 Ka ko ainei kua hoko atu kia koe, kua fakalolelole ai a koe; kua piki atu kia koe ti fakahahaku ai a koe.

6 Nakai kia tua a koe ha ko e hau a matakutaku ke he Atua, mo e nakai kia amaamanaki a koe ha ko e mahani tonu hau?

7 Kia manatu la, po ko hai ne malaia noa ka e nakai hala a ia? Po ko hai foki ne mahani tututonu ka e fakaoti a ia?

8 Tuga he kitia e au, ko lautolu ne keli e kelekele mo e mahani hepehepe, mo e gana ai e mahani kelea, to helehele mai ai e lautolu.

9 Ne malaia a lautolu he fafagu he Atua, ti fakaoti ai a lautolu ke he fakamanava he hana ita.

10 Ko e tagi he leona, mo e leo he leona favale, mo e tau nifo he tau punua leona, ne pakipaki ai.

11 Kua mate e leona malolo he nakai fai mena a ia ke hēhē, ti fakamavehevehe ai foki e tau punua he leona fifine.

12 Ne fakahoko mai fufu e kupu kia au, ti logona ai he tau teliga haku e mena tote.

13 Ko e tau manatu ke he tau fakakiteaga he po, ka kua momohe popo ai e tau tagata;

14 Ne hoko mai kia au e matakutaku mo e vivivivi, ti vivivivi ai haku tau hui motua oti.

15 Ti fina age ai e agaga ki mua haku, ti tu fulu e tau fulu he hoku tino.

16 Ne tu mai a ia ka e nakai kitia e au hana fakakite mai po ke fefe a ia, ha ha i ai e ata ki mua he tau mata haku, ne fakanonono, ti logona ai e au e leo kua pehe mai,

17 Ne mua kia e tututonu he tagata ke he tututonu he Atua, po ke mua e mahani mea he tagata ke he mahani mea hana ne eke a ia?

18 Kitiala, nakai tua a ia ke he hana tau fekafekau; ti tala age a ia ke he hana tau agelu kua goagoa a lautolu;

19 Nakai kia au atu ai he pihia kia lautolu kua nonofo ke he tau fale kelekele, ne toka ai e tau fakave ke he efuefu, ne tuki malipilipi ai a lautolu tuga ne lefio.

20 Ne tukimalipilipi ai a lautolu he kamata mai he pogipogi ke hoko atu ke he afiafi, kua malaia tukulagi a lautolu ka e nakai manamanatu ai taha.

21 Nakai kia toho kehe ia lautolu e toua ne pokai aki ha lautolu a fale ie? Ne mamate a lautolu ka e nakai fai iloilo.