Iopu

41 KUA maeke kia ke futi e koe e leviatana ke he matau, po ke taofi hifo e koe hana alelo ke he toua?

2 Kua maeke kia ke tuku e koe e toua ke he hana ihu? po ke tui aki e koe hana kauvehe ke he matau?

3 To fakaloga atu kia e ia e tau olelalo kia koe, po ke vagahau atu a ia kia koe mo e tau kupu molulu?

4 To eke kia a mua mo ia e maveheaga? Ke uta e koe a ia ke eke mo fekafekau hau tukulagi?

5 To fefeua kia a koe mo ia tuga he fefeua mo e manu lele? po ke lili e koe a ia ma e tau tama fifine hāu?

6 To fakafua atu kia a ia he tau tagata ne kau fakalataha ai he takafaga? To tufatufa age kia e lautolu a ia ke he tau tagata fakafua koloa?

7 Kua maeke kia ke tuina a ia ke galo ai hana kili he tau lapatoa matila? mo e hana ulu foki ke he tau tao hoka ika?

8 Kia tuku atu e koe hau a lima ki luga hana; kia manatu a e koe e tau, ti nakai eke pihia foki e koe.

9 Kitiala, kua noa e amaamanaki ke moua a ia; nakai kia palu hifo e tagata he kitekite atu kia ia?

10 Nakai fakamalolo taha ke fakalagalaga a ia; ti ko hai kia ke tu ki mua haku?

11 Ko hai kia ne ta mai fakamua kia au e tau mena, kia taui atu e au kia ia? Ko e tau mena oti ha ha i lalo he lagi, haku ni e tau mena ia.

12 Nakai fakamate au ha ko e hana tau faahi tino, ko e tala foki ke he hana malolo, mo e fulufuluola he hana tauteute ke tau.

13 Kua maeke kia hai ke fakakite e tua he hana tapulu? Ko hai kia ke hoko atu ke he hana atu nifo ua?

14 Kua maeke kia hai ke hafagi e tau gutuhala he hana gutu? Ko e mena ne matakutaku ai hana tau nifo ne tutu takai ai.

15 Ko e hana mena ne hula ai a ia, ko e hana tau akau punuti mao ia, ko e tau mena po ke tau hinafi, ne fakamau fakalataha ai, po ke fakamau ai ke he fakamau fakamailoga.

16 Ne tutaki ai e taha ke he taha, ti nakai hao atu e havili ke he tau vaha he tau hinafi ia.

17 Ne pipiki ai taha ke he taha, ne fepeliaki fakalataha, nakai ni maeke ke vevehe kehekehe.

18 Ka tihe a ia, ti kikila mai ai e maama; ko e tau mata hana foki kua tuga ne tau tuamata he pogipogi.

19 Kua o atu he gutu hana e tau hulu, kua hohopo mai ai e tau lemu afi.

20 Kua fina atu e ahua mai hana tau pokoihu tuga ne ulo, ne vela ai e vai mo e tau kaho ne tugi.

21 Kua tugi aki e tau malala ke he fafagu hana, ne fina atu foki e afi puhopuho he gutu hana.

22 Ha ha he ua hana e malolo, kua koli foki e matakutaku ki mua hana.

23 Kua pipiki mau ai e kakano he hana manava; kua mao ia, nakai maueue.

24 Kua mao hana atefua tuga ne maka, kua mao ni po ke maka holo i lalo.

25 Ka matike a ia ti matakutaku ai e tau toa; kua nimo e tau loto ha lautolu he matakutaku.

26 Kua oga e pelu he tagata ne eke ke tamate a ia, kua pihia foki e tao, mo e fana, mo e tao hoka ika.

27 Kua fakataufata kia ia e lapatoa mo e tau kakau saito, ko e apakula foki kua tuga ne akau popo ia kia ia.

28 Nakai hola a ia ha ko e tau fana, ko e tau maka ne liti aki he filo, ne eke ia mo tagutugutu saito kia ia.

29 Kua lata e tau katoua mo e tau tagutugutu saito kia ia; kua kata foki a ia ke he tau tao ne fakavivivivi.

30 Ko e faahi lalo hana kua tuga e tau kapa kapiniu matila; ne fofola ai e ia e mena ki luga he pelapela ne fotofoto tuga ne eke ai ke he mena matila ne holi aki e tau fua saito.

31 Kua eke e ia e moana ke puna ai tuga ne ulo; kua eke e ia e tahi ke tuga ne maga lolo.

32 Ne eke ai e ia e puhala ke kikila ki tua hana; ti manatu ai he tagata kua uluhina e moana.

33 Nakai ha ha i ai taha i luga he kelekele kua tatai mo ia, kua eke ai kua nakai iloa e matakutaku.

34 Kua kitekite hifo a ia ke he tau mena tokoluga oti; ko ia ko e patuiki he tau manu favale oti kana.