Esoto

Ko e Esoto. Ko e Tohi Ua a Mose

1 KO e tau higoa hanai he tau tama tane a Isaraela ne o ki Aikupito fakalataha mo Iakopo, ne o ai takitaha mo e hana magafaoa;

2 Ko Reupena, ko Simeona, ko Levi mo Iuta;

3 Ko Isakara, ko Sepulona mo Peniamina;

4 Ko Tano mo Nafatali, ko Kato mo Asera;

5 Ko e tau tagata oti ne fanau kia Iakopo, ko e tokofitugofulu ia, ka ko Iosefa ha i Aikupito a ia.

6 Ne mate foki a Iosefa, mo e hana tau matakainaga oti kana, katoa mo e hau oti ia.

7 Ka ko e fanau a Isaraela kua fanau a lautolu, to tolotologa, to fakatokologa, to malolo lahi ue atu, kua puke e motu ia lautolu.

8 Ti kua eke e patuiki fou ke pule ki Aikupito, kua nakai iloa e ia a Iosefa.

9 Ti pehe age a ia ke he hana motu, Kitiala, ko e motu he fanau Isaraela, kua mua tuai kia tautolu he tokologa mo e malolo;

10 O mai a, kia eke e tautolu kia lautolu mo e pulotu, neke fakatokologa a lautolu, ati oti ka hoko ke he vaha ke tau ai, ti kau fakalataha a lautolu mo lautolu kua fai fi kia tautolu, ti tau mai a lautolu kia tautolu, to o kehe a lautolu mo e motu nai.

11 Ti kotofa ai e lautolu e tau leoleo gahua kia lautolu, kia fakamamahi a lautolu ke he tau kavega mamafa ha lautolu; ti eke e lautolu ma Farao e tau maga fetuku koloa, ko Pitoma mo Ramesi.

12 Kua fakamamahi e lautolu a lautolu, ti au atu ai he fakatokologa, to au atu he tutupu; kua fakaatukehe a lautolu ha ko e fanau Isaraela.

13 Ne fakatupatupa he tau tagata Aikupito e fanau Isaraela mo e favale.

14 Ti fakavihia e lautolu ha lautolu a moui ha ko e gahua mamafa ke he kelekele mo e tau maka kelekele, mo e tau gahua oti he fonua; ko e tau gahua oti ha lautolu ne fakatupatupa ai e lautolu a lautolu kua kotofa ia mo e favale.

15 Kua tala age foki e patuiki a Aikupito kia laua ne fakafanau e tau fifine Heperu, ko e higoa he taha ko Sipela ia, ko e higoa foki he taha ko Pua ia,

16 Kua pehe age a ia, Ka fakafanau e mua e tau fifine Heperu, ti kitia e mua kua fanau, kaeke ko e tama tane, ti tamate a ia, kaeke ko e tama fifine kia moui a ia.

17 Ka kua matakutaku ke he Atua e tau fifine fakafanau, ti nakai eke e mena ne tala age ai e patuiki a Aikupito kia laua, ka e fakamoui e laua e tau tama tane.

18 Ti ui age ai e Patuiki a Aikupito ke he tau fifine fakafanau, mo e pehe age kia laua, Ko e heigoa e mena nei kua eke e mua he fakamoui e mua e tau tama tane?

19 Ti pehe age ai e tau fifine fakafanau kia Farao, Ha ko e mena nakai tuga e tau fifine Aikupito e tau fifine Heperu; ha kua malolo a lautolu, kua fanau tuai a lautolu ka e nakala hoko ki ai e fifine fakafanau.

20 Ti totonu e Atua ke he tau fifine fakafanau; ti fakatokologa e motu, mo e malolo lahi ni a lautolu.

21 Ne matakutaku ke he Atua e tau fifine fakafanau, ko e mena ia ne eke ai e ia e tau magafaoa ha laua.

22 Kua poaki age foki e Farao ke he hana motu oti kana, kua pehe age, Ko e tau tama tane oti kua fanau mai, kia liti e mutolu ke he vailele, ka ko e tau tama fifine oti, kia fakamoui ia e mutolu.