Esoto

35 TI fakapotopoto mai e Mose e fakapotopoto aga oti he fanau a Isaraela, ti pehe atu a ia kia lautolu, Ko e tau mena hanai kua poaki mai ai e Iehova ke eke.

2 Ono ni e aho ke eke ai e gahua, ka ko e aho fitu to tapu ia kia mutolu, ko e sapati ma Iehova ke okioki ai; ka eke ai e taha ha gahua kia kelipopo a ia.

3 Aua neke tafu ha afi ke he taha fale ha mutolu ke he aho sapati.

4 Ti vagahau atu a Mose ke he fakapotopotoaga oti he fanau a Isaraela, kua pehe atu, Ko e mena nai kua poaki mai ai e Iehova, kua pehe mai,

5 Kia eke a e mutolu e poa kia Iehova, takitaha e tagata mo e mena kua makai ki ai ke he hana loto kia ta mai e ia e poa kia Iehova, ko e auro, mo e ario, mo e apa kula,

6 Mo e mena uli, mo e kula uhi, mo e kula momoho, mo e ie lino, mo e tau fulu koti,

7 Mo e tau kili mamoe tane kua vali kula, mo e tau kili takesa, mo e akau ko e sitima;

8 Ko e lolo ke fakapuho, ko e tau mena manogi ke fakamanogi aki e lolo ke uku, ke eke aki foki e tau mena manogi mitaki ke huhunu,

9 Ko e tau maka soama, mo e tau maka ke taute aki e efota mo e ufi fatafata

10 Ko lautolu oti foki kua iloilo ha ia mutolu, kia o mai a lautolu, mo e eke e lautolu e tau mena oti kua poaki mai ai e Iehova;

11 Ko e faituga, ko e hana fale uta fano, mo e hana ufiufi, ko e hana tau fakamau mo e hana tau lapa, ko e hana tau akau loa, ko e hana tau pou mo e hana tau fakalago;

12 Ko e puha, mo e hana tau akau tauloto, ko e haeleaga he fakaalofa noa, mo e ie puipui;

13 Ko e laulau, mo e hana tau akau ke tauloto, mo e hana tau mena oti kana, mo e areto ke fakatokatoka i mua;

14 Mo e fakatuaga lamepa ke fakamaama aki, mo e hana tau mena, mo e hana tau lamepa, mo e lolo ke fakapuho;

15 Mo e fatapoa ke huhunu ai e tau mena manogi, mo e hana tau akau tauloto, mo e lolo ke fakauku, mo e mena manogi mitaki ke huhunu, mo e puipui ie he gutuhala, ke pa aki e faituga;

16 Ko e fatapoa ke eke ai e tau poa huhunu, mo e hana tokaaga afi apa kula, ko e hana tau akau tauloto mo e hana tau mena oti; ko e kumete mo e hana tuaga;

17 Ko e tau ie puipui he pa, ko e hana tau pou, mo e hana tau fakalago, mo e ie puipui ma e gutuhala he pa;

18 Ko e tau fao mo e faituga, mo e tau fao mo e pa, mo e ha lautolu a tau toua;

19 Ko e tau tapulu he fekafekauaga ke fekafekau ai ke he mena tapu, ko e tau tapulu tapu he ekepoa ko Arona, mo e tau tapulu he hana tau tama tane ke eke ai e feua he ekepoa.

20 Ti o kehe ai e fakapotopotoaga he fanau Isaraela i mua a Mose;

21 Ti o mai ai a lautolu, ko lautolu oti kua omoi ki ai ha lalu tau loto, mo lautolu oti kua makai ki ai ha lalu tau loto, kua ta mai e lautolu e poa kia Iehova mo e gahua he fale uta fano he tutuutaga, mo e hana tau fekafekauaga oti, katoa mo e tau tapulu tapu.

22 Ti kua o mai a lautolu, ko e tau tane mo e tau fifine; ko lautolu oti ni kua makai ki ai ha lautolu a tau loto, kua ta mai e lautolu e tau fakamau, mo e tau mena tau teliga, mo e tau mama, mo e tau kahoa auro, ko e tau mena auro oti, kua igatia e tau tagata kua eke poa mo e eke e poa auro kia Iehova.

23 Ko e tau tagata oti ha i ai e mena uli, mo e kula uhi mo e kula momoho, mo e ie lino, mo e tau fulu koti, mo e tau kili mamoe tane kua vali kula, mo e tau kili takesa, kua ta mai ni e lautolu.

24 Ko lautolu oti kua eke e poa ario mo e apa kula, kua ta mai e lautolu e poa kia Iehova; ko lautolu oti foki ha i ai e tau akau ko e sitima kua aoga ke he taha mena he gahua, kua ta mai ni e lautolu.

25 Ko e tau fifine oti foki kua iloilo, kua filo e lautolu ke he tau lima ha lautolu, ti ta mai ai e lautolu e tau mena kua filo, ko e tau mena uli, mo e kula uhi, mo e kula momoho mo e ie lino.

26 Ko e tau fifine oti foki kua omoi ai he tau loto ha lautolu mo e iloilo, kua filo e lautolu e tau fulu koti.

27 Ko e tau iki foki, kua ta mai e lautolu e tau maka soama, mo e tau maka ke taute mo e efota mo e ufi fatafata;

28 Mo e mena manogi, mo e lolo ke fakapuho, mo e lolo ke fakauku, katoa mo e mena manogi mitaki ke huhunu.

29 Ko e tau tane oti katoa mo e tau fifine kua makai ki ai ha lalu tau loto, kua ta mai e lautolu e tau mena ke eke aki e tau gahua oti ne poaki mai ai e Iehova kia Mose ke eke; kua ta mai mo e fakamakai he fanau a Isaraela kia Iehova.

30 Ti pehe atu a Mose ke he fanau a Isaraela, Kitiala, kua ui e Iehova ke he hana higoa a Pesaleli, ko e tama a Auri, ko e tama ia a Huro, ko e magafaoa a Iuta;

31 Kua fakapuke foki a ia ke he Agaga he Atua ke he iloilo mo e pulotu, mo e maama, ke eke ai e tau gahua oti kana.

32 Kia fatuakiloto e ia e tau gahua iloilo; kia gahua ai a ia ke he auro, mo e ario, mo e apa kula;

33 Ke ta foki e tau maka ke fakamau ai, ke laku akau foki, mo e eke e tau gahua iloilo oti kana.

34 Kua tuku atu foki e ia ke he hana loto kia maeke ia ia ke fakaako atu, ko ia katoa mo Aliavu e tama a Ahisamako he magafaoa a Tano.

35 Kua fakapuke e ia a laua ke he iloilo ke eke e tau gahua oti he tufuga ta maka, mo e gahua he tufuga iloilo, mo e tufuga tuitui mena ke he mena uli, mo e kula uhi, mo e kula momoho, mo e ie lino, katoa mo e gahua he tufuga lalaga ie, mo e tau gahua kehekehe, mo e gahua ha lautolu kua fatuakiloto e tau gahua iloilo.