Esoto

4 TI tali atu ai a Mose, kua pehe atu, Kitiala, nakai talia e lautolu au ti nakai fanogonogo a lautolu ke he haku tau kupu, ha ko e mena to pehe mai a lautolu, Nakai fakakite a Iehova kia koe.

2 Ti pehe mai a Iehova kia ia, Ko heigoa e mena na ha he lima hau? Kua pehe atu a ia, Ko e tokotoko.

3 Ti pehe mai a ia, Ati liti a ke he kelekele; ti liti ai e ia ke he kelekele, kua faliu mo gata; ti hola kehe ai a Mose.

4 Ti pehe mai a Iehova kia Mose, Fakaolo a hau a lima, mo e toto hana hiku. Ati fakaolo ai e ia hana lima, kua tapaki ai e ia, ti faliu mo tokotoko ke he hana lima.

5 Ko e mena ia ke talia ai e lautolu kua fakakite kia koe a Iehova ko e Atua he tau matua ha lautolu, ko e Atua a Aperahamo, ko e Atua a Isaako, mo e Atua a Iakopo.

6 Kua liu foki vagahau a Iehova kia ia, Kia tuku a hau a lima ke he hau a fatafata; ti tuku ai e ia hana lima ke he hana fatafata; kua eke mai ai, kitiala, kua lepela hana lima tuga ne kiona.

7 Ti pehe mai a ia, Ati liuaki hau a lima ke he hau a fatafata; ti liuaki e ia hana lima ke he hana fatafata, kua eke mai ai he hana fatafata, kitiala, kua faliu foki kua tuga ne hana tino.

8 Kaeke foki ke nakai talia mai e lautolu a koe, mo e nakai fanogonogo ke he leo he fakamailoga fakamua, ti talia ni e lautolu e leo he fakamailoga fakamui.

9 Kaeke foki ke nakai talia e lautolu e na fakamailoga ua nai, mo e nakai fanogonogo ke he hau a tau kupu, ati ahu mai a e magavai mai he vailele, mo e liligi e koe ke he kelekele momo, ti faliu toto ai ke he kelekele momo e magavai ne ahu mai e koe he vailele.

10 Ti pehe atu a Mose kia Iehova, Ma Iki na e, ko au ko e tagata nakai iloa ke fakamatala, tali mai i tuai, mo e vaha nai foki kua vagahau mai ai a koe ke he hau a fekafekau; ha kua nakai gutu mahifi au, kua nakai mahifi foki haku alelo.

11 Ti pehe mai ai a Iehova kia ia, Ko hai kia ne eke e gutu he tagata? po ko hai ne eke e kuhukuhu, po ke teligatuli, po ke mata maama, po ke matapouli? Nakai kia ko au ko Iehova?

12 Ko e hanai, fano a koe; ko au foki to fakalataha au mo e gutu hau, to fakaako foki e au a koe ke he tau kupu ke vagahau ai a koe.

13 Ka kua pehe atu a ia, Ma Iki na e, kia fakafano e koe taha kua lata ke fakafano atu ai.

14 Ti tupu ai e ita a Iehova kia Mose, ti pehe mai a ia, Nakai kia ko e matakainaga hau a Arona ko e tagata Levi? kua iloa e au a ia ko e tagata pulotu ke vagahau; kitiala, ha ne hau a ia ke feleveia mo koe; ka kitia e ia a koe, ti fiafia ai hana loto.

15 To vagahau atu a koe kia ia, to tuku foki e koe e tau kupu ia ke he hana gutu; ko au foki to fakalataha au mo e gutu hau katoa mo e hana gutu, to fakaako foki e au a mua ke he tau mena ke eke e mua.

16 To vagahau atu a ia māu ke he tau tagata, to eke foki a ia mo gutu māu, to eke foki a koe mo Atua mana.

17 Ko e tokotoko foki na, to uta ia ke he hau a lima ke eke aki e koe e tau fakamailoga.

18 Ti fano ai a Mose, kua liu atu kia Ieteru hana matua fugavai, mo e pehe age kia ia, Kia fano au, mo e liu atu ke he haku tau matakainaga ha ha i Aikupito, kia kitia ai e au po ke ne momoui agaia a lautolu. Ti pehe mai ai a Ieteru kia Mose, Ati fano a koe mo e monuina.

19 Ti pehe mai ai a Iehova kia Mose i Mitiana, Kia fano a koe liu ki Aikupito, ha kua mamate e tau tagata oti ne kolo ke kelipopo a koe.

20 Ti uta ai e Mose hana hoana mo e hana tau tama tane, kua fakaheke e ia a lautolu ki luga he asini, ti liu atu ke he motu ko Aikupito; ne uta foki e Mose e tokotoko he Atua ke he hana lima.

21 Ti kua pehe mai a Iehova kia Mose, Ka fano a koe mo e liu atu ki Aikupito, a koe mo e tau mana oti kua tuku atu e au ke he hau a lima, kia eke ai e koe ki mua a Farao; ka ko au to fakamao e au hana loto, ti nakai toka e ia e tau tagata ke o.

22 To pehe age foki a koe kia Farao, Kua pehe mai e vagahau a Iehova, Ko e tama haku a Isaraela, ko e haku a tama uluaki;

23 Kua pehe atu au kia koe, Toka e koe haku tama ke fano mo e fekafekau mai kia au; ka e nakai maeke ia ia ke o a lautolu, kitiala, ko au ni to kelipopo e au hau a tama, ko e hau a tama uluaki.

24 Ha he puhala a ia, ti feleveia ai a Iehova mo ia ke he mena kua api ai e tau fenoga, kua fia kelipopo a ia.

25 Ti toto ai e Sipora e maka mo e helehele ai e kili he tino he hana tama, kua liti age ke he hana tau hui, kua pehe age, Ko e moli ko e tane lima toto ni a koe kia au.

26 Ti toka ai e ia a ia; ti pehe atu ai e fifine, Ko e tane lima toto ni a koe, ha ko e peritomeaga.

27 Kua pehe mai a Iehova kia Arona, Fano a koe ke fonofono a Mose ke he tutakale. Ti fano ai a ia, kua feleveia a laua mo ia ke he mouga he Atua, ti figita a ia kia ia.

28 Ti tala age e Mose kia Arona e tau kupu oti a Iehova ne fekau ai e ia a ia, katoa mo e tau fakamailoga oti ne poaki mai kia ia.

29 Ti o ai a Mose mo Arona, kua fakapotopoto e laua e tau patu oti kana he fanau Isaraela.

30 Ti fakamatala atu e Arona e tau kupu oti ne fakamatala e Iehova kia Mose, kua eke foki e ia e tau fakamailoga ki mua he motu.

31 Ti talia ai he motu, kua logona e lautolu kua ahi e Iehova e fanau Isaraela, mo e kitekite mai ke he matematekelea ha lautolu; to tukutukuhifo a lautolu mo e hufeilo.