Esoto

40 TI vagahau mai e Iehova kia Mose, kua pehe mai,

2 Ko e aho fakamua he mahina fakamua kia fakatu ai e faituga, ko e fale uta fano he tutuutaga.

3 Ti tuku ai e koe e puha he fakatufono, ti puipui e koe e puha ke he ie puipui.

4 Ti ta age foki e laulau, ti taute e koe hana tau mena taute; kia ta age foki e koe e fakatuaga lamepa, ti tugi ai hana tau lamepa.

5 Kia tuku foki e koe ki mua he puha he fakatufono e fatapoa auro ke huhunu mena manogi, ti tautau e koe e ie puipui ke he gutuhala he faituga.

6 Ti tuku e koe ki mua he gutuhala he faituga e fatapoa ke eke ai e tau poa huhunu, ko e fale uta fano he tutuutaga.

7 Kia tuku foki e koe e kumete ke he vaha he fale uta fano he tutuutaga mo e fatapoa; ti liligi e koe e vai ki ai.

8 Ti fakatu e koe e pa ke takai aki, mo e tautau e ie he gutuhala he pa.

9 Kia uta foki e koe e lolo fakauku, mo e fakatakai e koe e faituga mo e tau mena oti ha i ai, ti fakatapu ai e koe mo e hana tau mena oti kana ti tapu ai ni.

10 Ti fakatakai e koe e fatapoa ke eke ai e tau poa huhunu mo e hana tau mena oti, mo e fakatapu e koe e fatapoa, ti eke ai ni mo fatapoa tapu ue atu.

11 Kia fakatakai foki e koe e kumete mo e hana tuaga, mo e fakatapu ai e koe.

12 Ti uta e koe a Arona mo e hana fanau fakatata atu ke he gutuhala he fale uta fano he tutuutaga, mo e fakakoukou e koe a lautolu ke he vai.

13 Ti fakatapulu e koe a Arona ke he tau tapulu tapu, ti fakauku a ia mo e fakatapu a ia; kia eke e ia e feua he ekepoa kia au;

14 Ko e hana fanau foki, kia ta mai fakatata e koe a lautolu, mo e fakatapulu a lautolu ke he tau tapulu loto;

15 Ti fakauku e koe a lautolu, tuga ne fakauku e koe ha lautolu a matua, kia eke ai e lautolu e feua he ekepoa kia au; to eke ni ha lautolu a fakauku mo kotofaaga a lautolu ke he feua he ekepoa tukulagi ke he ha lautolu a tau hau a mui.

16 Ti eke ni e Mose tuga ne tau mena oti ne poaki mai e Iehova kia ia, ne eke pihia ni e ia.

17 Ti ko e mahina fakamua he tau ua, ko e aho fakamua he mahina ia kua fakatu ai e faituga.

18 Kua fakatu e Mose e faituga, mo e tuku hana tau fakalago, kua fakatu foki hana tau lapa, mo e humaki hana tau akau loa, ti fakatu mo e hana tau pou;

19 Kua fofola foki e ufiufi ki luga he faituga, mo e fakatoka ai e ufiufi he fale uta fano ki luga fakaoti; tuga ne poaki mai e Iehova kia Mose.

20 Ne uta foki e ia e tau lapa maka he fakatufono mo e tuku ke he puha, ne humaki foki e tau akau tauloto ke he puha; ti fakatoka e haeleaga he fakaalofa noa ki luga he puha.

21 Ti ta age ai e ia e puha ke he faituga, ti tautau e ia e ie puipui, mo e puipui aki e puha he fakatufono; tuga ne poaki mai e Iehova kia Mose.

22 Ne tuku foki e ia e laulau ke he fale uta fano he tutuutaga ke he fahi tokelau he faituga, ke he fahi mai nai he ie puipui.

23 Ti tauteute e ia e areto ki luga he laulau ki mua a Iehova; tuga ne poaki mai e Iehova kia Mose.

24 Ne tuku foki e ia e fakatuaga lamepa ke he fale uta fano he tutuutaga ke he fahi toga he faituga, kua fehagai mo e laulau.

25 Ne tugi foki e ia e tau lamepa ki mua a Iehova; tuga ne poaki mai e Iehova kia Mose.

26 Ne tuku foki e ia e fatapoa auro ke he fale uta fano he tutuutaga ki mua he ie puipui.

27 Ti huhunu e ia ki luga ai e mena manogi; tuga ne poaki mai e Iehova kia Mose.

28 Ne tautau foki e ia e ie puipui ke he gutuhala he faituga.

29 Ko e fatapoa foki ke eke ai e tau poa huhunu, ne tuku ai e ia ki mua he gutuhala he faituga, ko e fale uta fano he tutuutaga, ti eke e ia ki luga ai e poa huhunu mo e poa mena kai; tuga ne poaki mai e Iehova kia Mose.

30 Ne tuku foki e ia e kumete ke he vaha he fale uta fano he tutuutaga mo e fatapoa; ti liligi ai e vai ke koukou ai;

31 Ne holoholo mai ai e Mose mo Arona mo e hana fanau ha lautolu a tau lima mo e ha lautolu a tau hui;

32 Ne holoholo ai a lautolu ka huhu atu ke he fale uta fano he tutuutaga, ka fakatata atu foki ke he fatapoa; tuga ne poaki mai e Iehova kia Mose.

33 Ne fakatu foki e ia e pa ke takai aki e faituga mo e fatapoa, ti tautau foki e ia e ie puipui ke he gutuhala he pa; ti kua fakaoti ni e Mose e gahua.

34 Ti ufiufi aki he aolagi e fale uta fano he tutuutaga, ko e lilifu foki a Iehova kua fakapuke aki e faituga;

35 Ti nakai maeke ia Mose ke hu atu ke he fale uta fano he tutuutaga, ha kua nofo e aolagi ki luga ai; ko e lilifu foki a Iehova kua fakapuke aki e faituga.

36 Ka lagaaki foki e aolagi mai luga he faituga, ti o ai e fanau a Isaraela ke he fenoga oti kana ha lautolu.

37 Kaeke ke nakai lagaaki e aolagi, ti nakai o e fenoga ha lautolu ato hoko ke he aho ke lagaaki ai.

38 Ha ko e mena ha i luga e faituga e aolagi a Iehova ka aho; ka ko e afi ha i luga ai ke he po, ki mua he faoa oti a Isaraela ke he ha lautolu a tau fenoga oti kana.