Esoto

8 KUA pehe mai a Iehova kia Mose, Kia fano a koe kia Farao, mo e tala age kia ia, Kua pehe e vagahau mai a Iehova; kia toka e koe haku motu ke o, kia fekafekau mai a lautolu kia au.

2 Kaeke ke nakai maeke ia koe ke tokai a lautolu ke o, kitiala, to ta e au hau a motu oti ke he tau rane.

3 To pa loga mai e tau rane he vailele; to hake mai ai, mo e huhū atu ke he hau a fale, mo e hau a poko mohe, ki luga foki hau a mohega, ko e tau fale foki he hau a tau fekafekau, katoa mo e hau a motu, ko e hau a tau gutuumu foki, mo e hau a tau mena ke laku ai e falaoa,

4 To hake e tau rane ki luga ia koe, mo luga he hau a motu, mo luga he hau a tau fekafekau oti kana.

5 Kua pehe mai foki a Iehova kia Mose, Kia tala age e koe kia Arona; kia fakaolo hau a lima ha i ai hau a tokotoko ki luga he tau vailele, mo e tau vailele ikiiki, mo e tau loloto vai, kia hake mai ia e tau rane ke he motu ko Aikupito.

6 Ti fakaolo e Arona hana lima ki luga he tau vai ha Aikupito, ti hake mai ai e tau rane, kua galo ai ni e motu ko Aikupito.

7 Kua eke pihia foki e tau taulaatua ke he ha lautolu a tau lagatau taulaatua; kua fakahake foki e lautolu e tau rane ke he motu ko Aikupito.

8 Ti ui ai a Farao kia Mose mo Arona, kua pehe mai, Kia ole atu e mua kia Iehova kia uta kehe e ia e tau rane ia au mo e haku motu, ti tuku atu ai e au e motu ke o, kia eke poa ai e lautolu kia Iehova.

9 Ti pehe atu a Mose kia Farao, Kia kotofa mai e koe kia au po ke ole atu a fe e au māu, mo e hau a tau fekafekau, mo e hau a motu, ke fakaotioti e tau rane mai ia koe, mai he tau fale foki hau, kia ha ha he vailele ni hokoia?

10 Kua pehe mai a ia, A pogipogi. Ti pehe atu ai a Mose, To eke ni tuga ne kupu hau, kia fioia e koe kua nakai ni taha ke tuga a Iehova ha mautolu a Atua;

11 To o kehe e tau rane ia koe, mo e hau a tau fale, mo e hau a tau fekafekau, mo e hau a motu, ti ha ha i ai ke he vailele hokoia ni.

12 Ti hu ki fafo a Mose mo Arona ia Farao; kua fakatutu foki a Mose kia Iehova ha ko e tau rane ne ta mai e ia kia Farao.

13 Ti eke ai e Iehova tuga ne kupu a Mose; kua mamate e tau rane mai he tau fale, mo e tau magamotu, katoa mo e fonua.

14 Ti fakapotopoto ai e lautolu ke he tau tanakiaga, ti elo ai e motu.

15 Kua kitia e Farao kua moua ha okioki, ti fakamao ai e ia hana loto, mo e nakai fanogonogo kia laua, tuga ne tala mai ai e Iehova.

16 Ti pehe mai a Iehova kia Mose, Kia pehe age a koe kia Arona, Kia fakaolo ā hau a tokotoko, mo e ta aki e efuefu he kelekele, kia faliu ai mo kutu ke he motu oti ko Aikupito.

17 Ne eke pihia e laua, ne fakaolo e Arona hana lima ha i ai hana tokotoko mo e ta e efuefu he kelekele, ti kua eke mo kutu ke he tau tagata, katoa mo e tau manu; kua faliu mo kutu e efuefu oti ha he motu oti kana ko Aikupito.

18 Kua eke pihia foki he tau taulaatua ke he ha lautolu a tau lagatau taulaatua kia fakahake mai e tau kutu, ka e nakai ni maeke; ha i ai foki e tau kutu ke he tau tagata mo e tau manu.

19 Ti pehe atu e tau taulaatua kia Farao, Ko e lima he Atua haia; ka kua mao e loto a Farao, ti nakai fanogonogo a ia kia laua, tuga ne tala mai e Iehova.

20 Kua pehe mai foki a Iehova kia Mose, Kia uhu matike a koe a pogipogi mo e tu a koe ki mua a Farao; kitiala, kua fano a ia ke he vai, ti tala age a koe kia ia, Kua pehe e vagahau mai a Iehova, kia toka haku motu ke o, kia fekafekau mai a lautolu kia au;

21 Ha ko e mena kaeke ke nakai maeke ia koe ke toka haku motu ke o, kitiala ko e fakafano atu ne fai e au e tau garova kia koe, mo e hau a tau fekafekau, mo e hau a motu, mo e hau a tau fale; to puke foki e tau fale a Aikupito katoa mo e kelekele kua tu ai a lautolu ke he tau garova.

22 To vevehe kehe foki e au ke he aho ia ni e kelekele ko Kosena ha i ai haku motu, kia nakai hoko ki ai e tau garova, kia iloa ai e koe ko au ko Iehova kua pule ke he lalolagi.

23 To tuku foki e au a katofia ke he vaha he haku motu mo e motu hau; to eke e fakamailoga nai a pogipogi.

24 Ti eke pihia ni e Iehova, kua hoko mai ai e tau garova loga lahi ke he fale a Farao, mo e tau fale he hana tau fekafekau, mo e motu oti ni ko Aikupito; kua kelea e motu ha ko e tau garova.

25 Ti ui ai e Farao kia Mose mo Arona, ti kua pehe mai a ia, Kia o a mutolu, mo e eke poa ke he Atua ha mutolu ke he motu na.

26 Ti pehe atu ai a Mose, Nakai lata ke eke pihia e mautolu, ha ko e tau mena vihiatia i Aikupito ke eke aki e mautolu e poa kia Iehova ha mautolu a Atua; kitiala, ka eke e mautolu e tau mena vihiatia i Aikupito mo poa ki mua ha lautolu, nakai kia tauliti maka mai e lautolu kia mautolu?

27 Ka e o a mautolu ke he fenoga po tolu ke he tutakale, ti eke poa ai e mautolu kia Iehova ha mautolu Atua, tuga ne tala mai ai a ia kia mautolu.

28 Ti pehe age ai a Farao, To toka atu e au a mutolu ke o, ti eke poa ai e mutolu kia Iehova ha mutolu a Atua ke he tutakale; taha e mena hokoia neke o mamao a mutolu; kia ole ā mua maku.

29 Ti pehe age a Mose, Kitiala, ko e fano ne fai au ia koe, ti ole e au kia Iehova, to uta kehe e tau garova ia Farao, mo e hana tau fekafekau mo e hana motu a pogipogi; taha e mena hokoia neke liu foki fakavai e Farao he nakai toka e ia e motu ke o ke eke poa kia Iehova.

30 Ti fano ai a Mose ia Farao, kua ole atu foki a ia kia Iehova.

31 Kua eke foki e Iehova tuga e kupu a Mose, kua uta kehe e tau garova ia Farao, mo e hana tau fekafekau, mo e hana motu, kua nakai toe taha.

32 Ka kua liu foki fakamao e Farao hana loto ke he mena nai, ti nakai toka e ia e motu ke o.