Tau Fakatai

11 KO e fua tautau fakavai, ko e mena vihiatia kia Iehova haia; ka ko e maka ke fafati aki e tau mena kua tonu, ko e hana fiafia haia,

2 Ka hau e mahani fakatokoluga ti hau ai e mā; ka e ha ha i ai e iloilo kia lautolu kua fakatokolalo.

3 Ko e mahani hakohako he tau tagata tututonu to takitaki ai e ia a lautolu; ka ko e mahani keukeu he tau tagata fakavai to fakaoti ai e ia a lautolu.

4 Nakai aoga e koloa ke he aho ke tupu ai e ita; ka ko e mahani tututonu to laveaki e ia mai he mate.

5 Ko e tututonu he tagata mahani hakohako ke fakahako ai hana puhala; ka e veli ai e tagata mahani kelea he hana mahani kelea.

6 Ko e tututonu he tau tagata kua mahani tonu ke laveaki ai a lautolu; ka to moua ai e tau tagata mahani keukeu ke he mahani kelea ha lautolu.

7 Ka mate e tagata mahani kelea, ti noa hana tatali; to noa foki e amaamanaki he tagata mahani hepehepe.

8 Kua laveaki e tagata tututonu mai he matematekelea; ka e hau e tagata mahani kelea ke hukui aki a ia.

9 Ko e tagata kolokolovao kua kelipopo ke he hana gutu e tagata ne katofia mo ia; ka ko e iloilo kua laveaki ai e tau tagata tututonu.

10 Kua olioli e maga ka monuina e tau tagata tututonu; kua kalaga fiafia foki ka mahaikava ai e tau tagata mahani kelea.

11 Kua fakamatalahi ai e maga he fakamonuina he tau tagata mahani hakohako; ka kua ulu ai ki lalo he tau gutu he tau tagata mahani kelea.

12 Kua noa mo e manamanatu e tagata kua fakavihia ke he tagata ne katofia mo ia; ka kua fakanono e tagata kua manamanatu.

13 Ko ia kua faifano mo e feutaaki tala, kua fakakite ai e ia e tau kupu galo; ka ko ia kua loto fakamoli kua ufiufi ai e ia e tau kupu,

14 Kua malaia e motu kaeke kua nakai fai pule; ka ko e tau pule tokologa ke hao mitaki ai.

15 To matematekelea lahi a ia kua eke mo fakamoli ha ko e tagata kehe; ka ko ia kua vihiatia ke fetotoaki e tau lima ha laua mo taha to monuina a ia.

16 Kua moua he fifine tino mitaki e lilifu; ka e moua he tau tane malolo e koloa.

17 Ko e tagata totonu kua eke fakamitaki atu e ia a ia ni; ka ko e tagata favale kua fakamamahi e ia hana ni a tino.

18 Ko e tagata mahani kelea kua moua ai e ia e palepale fakavai; ka ko ia kua gana e mahani tututonu ha ha ia ia e taui moli.

19 Ko ia kua tumau ai ke he mahani tututonu to moui ai a ia; ka ko ia kua tutuli e mahani kelea kua eke ia mo mena ke mate ai a ia.

20 Kua vihiatia e Iehova a lautolu kua loto hepehepe; ka e fiafia a ia kia lautolu kua mahani hakohako.

21 Pete he toto ai e lima ke he lima he taha, ka e nakai noa mo e fakahala e tagata mahani kelea; ka to hao ni e fanau he tau tagata tututonu.

22 Tuga ne mama auro ke he ihu he puaka, kua pihia e fifine tino mitaki kua noa mo e manamanatu.

23 Ko e manako he tau tagata tututonu kua mitaki hokoia ni haia; ka ko e amaamanaki he tau tagata mahani kelea, kua hiku ia ke he ita.

24 Ha ha i ai a ia kua tolotolo fano hana tau mena, ka e au atu he fakaloga ai; ha ha i ai foki kua taofi hana tau mena ke homo atu ke he mena kua lata ai, ka e nofogati ai a ia.

25 To fakamuhu mena ai e tagata fakamokoi; ko ia foki kua fakamalū atu ke he falu, to fakamalū ai foki a ia.

26 To kaialu e motu kia ia kua toka e tau fua saito; ka e ha ha i ai e monuina ki luga he ulu hana kua fakafua atu.

27 Ko ia kua kumi fakamakutu ke he mitaki kua kumi e ia e fakaalofa; ka ko ia kua kumi e kelea, to hoko ia kia ia.

28 Ko ia kua tua ke he hana koloa, to veli ni a ia; ka ko e tau tagata tututonu to tupuolamoui a lautolu tuga ne tau lau akau.

29 Ko ia kua fakalavelave hana magafaoa, to eke ni e matagi mo tufaaga hana; to eke foki e tagata goagoa mo fekafekau kia ia ne loto iloilo.

30 Ko e tau fua he tagata tututonu ko e akau he moui haia; kua moua foki e ia ne iloilo e tau agaga.

31 Kitiala, kua taui atu ai ke he tagata tututonu ke he lalolagi; ti au atu foki he pihia ke he tagata mahani kelea mo e tagata hala!