Tau Fakatai

18 KO ia kua vevehe kehe a ia, kua kumi ni e ia e mena ne manako ki ai a ia; kua latau a ia mo e tau iloilo oti ni.

2 Nakai manako e tagata goagoa ke he iloilo; kua manako hokoia ni a ia ke fakakite ai hana loto.

3 Ka hau e tagata hala, kua hau fakalataha ai foki e fakavihia; kua hau foki e ma fakalataha mo e mahani fuafuakelea.

4 Ko e tau kupu he gutu he tagata, ko e tau vai hokulo haia; ko e mena ne tupu mai ai e iloilo, ko e vailele tafe mau haia.

5 Nakai mitaki ke kau fakalataha mo e tau tagata hala, kia liliu kehe ai e fakafiliaga he tagata tututonu.

6 Kua o atu e tau laugutu he tagata goagoa ke he taufetoko; kua ui age foki hana gutu ke fahi a ia.

7 Ko e gutu he tagata goagoa kua malaia ai a ia; ko e hana tau laugutu, ko e matahele ke hele aki hana moui.

8 Ko e tau kupu he tagata feutaaki tala, kua lata ia mo e tau mena lolo; kua hoko hifo ki loto ni he manava.

9 Ko ia foki kua fakalolelole ke he hana gahua kua eke a ia mo matakainaga he tagata moumou mena.

10 Ko e higoa a Iehova, ko e kolo uka haia; kua hola atu ki ai e tagata tututonu, ti hao ai a ia.

11 Ko e koloa he tagata maukoloa, ko e hana taue uka haia; kua tuga ne kaupa tokoluga foki ke he hana ni a manatu.

12 Kua fakatokoluga fakamua e loto he tagata, to malaia a ia; kua mua atu foki e mahani fakatokolalo ke he lilifu.

13 Ko ia kua tali atu ke he kupu, ka e nakaila fanogonogo a ia ki ai, kua eke ia mo goagoa hana, mo mena foki ke mā ai a ia.

14 Ko e loto he tagata, kua fakauka ai a ia ke he hana gagao; ka ko e loto malipilipi, ko hai kia ke toto hake a ia?

15 Ko e loto he tagata pulotu kua moua e ia e iloilo; ko e tau teliga foki he tagata iloilo kua kumi ia ke he iloilo.

16 Ko e mena fakaalofa he tagata kua fakalaulahi e ia e puhala māna; kua takitaki ai foki a ia ki mua he tau iki.

17 Kua tonu a ia kua fakamua ke he hana taufetoko, ka e hau e taha tagata ti kumikumi e ia kia ia.

18 Ko e vili kua hiku ai e taufetoko; kua vevehe ai foki e tau toa.

19 Ko e tagata kua ekefakakelea he hana tau matakainaga; kua mua he uka a ia ke moua ke he taue; ko e tau taufetoko foki he tau matakainaga kua lata ia mo e tau fakamau fakalava he kolo.

20 Ko e tau fua he gutu he tagata kua makona ai hana manava; kua makona a ia he tau mena kua tutupu mai he tau laugutu hana.

21 Ko e mate mo e moui kua toka ai ia ke he pule he alelo; ko lautolu foki kua manako ki ai to kai ai e lautolu hana tau fua.

22 Ko ia kua moua e hoana, kua moua e ia e mena mitaki; kua moua foki e ia e fakaalofa mai ia Iehova.

23 Kua vagahau mai mo e ole he tagata nofogati, ka ko e tagata maukoloa kua tali atu a ia mo e vagahau fakahakehake.

24 Ko e tagata kua eke māna e tau kapitiga tokologa, kua fakahiku mo e matematekelea ai a ia; ha ha i ai taha kua ofania mai kua mua he pipiki mai a ia ke he matakainaga.