Tau Fakatai

21 KO e loto he patuiki, ko e tau hala vai ia ke he lima a Iehova; ne liliu ai e ia ke he tau mena oti kua finagalo ki ai a ia.

2 Kua hakohako e tau puhala oti he tagata ke he hana ni a manatu; ka kua fafati e Iehova e tau loto.

3 Kia eke e mahani tututonu mo e fakafili mena mo e tonu; kua mua e mitaki ia kia Iehova ke he poa.

4 Ko e tau mata fakaikaluga, mo e loto fakatokoluga, ko e lamepa foki he tau tagata mahani kelea, ko e hala haia.

5 Ko e tau manatu he tagata ne malolo ke gahua kua hiku ia ke he muhu mena; ka ko lautolu kua fakatepetepe, kua fakatepetepe atu ni ke he nofogati hokoia.

6 Ko e tanakiaga koloa kua moua ke he alelo pikopiko, ko e mena fakateaga kua havilia fano haia; ko lautolu kua kumi e tau mena ia, kua kumi e lautolu e mate.

7 Ko e favale he tau tagata mahani kelea kua uta kehe ai a lautolu; he nakai mafai a lautolu ke eke e fakafiliaga.

8 Kua keukeu lahi e puhala he tagata kua pehia he tau hala; ka ko ia kua mahani meā, kua tonu hana tau gahua.

9 Kua mitaki he nofo ke he hika he tua fale i luga; ka e kelea he nofo mo e fifine favale ke he fale lahi.

10 Kua manako e loto he tagata mahani kelea ke he kelea; nakai ofania e ia e tagata ne katofia mo ia.

11 Ka fakahala e tagata fa vā, ti fakailoilo ai e ia ne goagoa; ka fakaako ai foki e tagata iloilo, ti moua ai e ia e iloilo.

12 Kua manamanatu e tagata tututonu ke he magafaoa he tagata mahani kelea; kua liti hifo a lautolu kua mahani kelea ke kelea ai a lautolu.

13 Ko ia kua ponoti hana tau teliga ke he tagi he tagata nofogati, to tagi foki a ia ka e nakai fanogonogo taha ki ai.

14 Ko e mena ne foaki age fakagalo, kua fakamaulu ai e ita; ko e taui foki kua tuku age ke he fatafata kua maulu ai e ita lahi.

15 Ko e mena ke fiafia ai e tagata tututonu ka eke e ia e tau mena tonu; ka e malaia ni a ia kua eke e tau mena kelea.

16 Ko e tagata kua hehe mai he puhala he manamanatu, to nofo ai a ia ke he fakapotopotoaga he tau agaga ha lautolu ne mamate.

17 Ko ia kua manako ke he tau mena fakafiafia, to eke a ia mo tagata nofogati, ko ia kua manako ke he uaina mo e puke lolo, nakai maukoloa ai a ia.

18 Kua eke e tagata mahani kelea mo totogi ke totogi aki e tagata tututonu; ko e tagata mahani fakavai foki, kua eke mo hukui he tagata mahani hakohako.

19 Kua mitaki he nofo ke he tutakale, ka e kelea he nonofo mo e fifina favale mo e fa ita.

20 Ko e koloa uho mo e puke lolo ne toka ai ke he fale he tagata iloilo; ka ko e tagata goagoa kua moumou e ia e tau mena oti ia.

21 Ko ia kua tutuli atu ke he mahani tututonu mo e fakaalofa, to moua ai e ia e moui, mo e tututonu, mo e lilifu.

22 Kua hake e tagata iloilo ke he maga he tau toa; ti liti hifo foki e ia ha lautolu a malolo ne tua a lautolu ki ai.

23 Ko ia kua leveki hana gutu mo e hana alelo, kua leveki e ia a ia neke matematekelea.

24 Ko e tagata fakatokoluga mo e mahani fakahakehake, ko e tagata fa vā ko e hana higoa haia, kua eke mena ai e ia he ita mo e fakatokoluga.

25 Ko e manako he tagata teva kua mate ai a ia; ha kua nakai mafai hana tau lima ke gahua.

26 Ha ha i ai e tagata kua manako lahi ni ke he aho oti; ka ko ia ne mahani tututonu kua foaki age e ia mo e nakai taofi ai e ia e tau mena.

27 Ko e poa he tau tagata mahani kelea, ko e mena vihiatia haia; ti au atu he pihia ka tamai mo e manatu kelea.

28 Ko e tagata fakamoli mena kua pikopiko, to malaia ni a ia; ka ko e tagata kua fanogonogo kua vagahau e ia ti tumau ai hana tau kupu.

29 Ko e tagata mahani kelea, kua fakamao ai e ia hana mata; ka ko e tagata mahani hakohako, kua manamanatu ai a ia ke he hana tau puhala.

30 Nakai ni fai iloilo, to nakai fai pulotu, to nakai fai pule kua totoko atu kia Iehova.

31 Kua taute e solofanua ma e aho ke tau ai; ka ko e fakamouiaga, ha ha ia Iehova haia.