Tau Fakatai

29 KO e tagata kua fa akonaki ka e fakamao ai e ia hana ua, to tuki malipilipi fakalutukia a ia, ka e nakai fai lagatau ke fakamalolo aki a ia.

2 Ka tokologa ai e tau tagata tututonu, ti fiafia ai e motu; ka ko e mena ka pule e tagata mahani kelea ti ooi ai e motu.

3 Ko e tagata kua manako ke he iloilo, kua fakatupu ai e ia e fiafia he hana matua tane; ka ko ia kua kapitiga mo e tau fifine fakataka kua moumou ai e ia hana koloa.

4 Kua fakatumau ai he patuiki e motu ke he fakafiliaga; ka ko e tagata kua tatali ke he tau mena fakaalofa kua ulu moumou e ia e motu.

5 Ko e tagata kua fakavai e tagata ne katofia mo ia; kua fofola e ia e kupega ke he mena kua fano ai a ia.

6 Ha ha i ai e matahele ke he holifono he tagata mahani kelea; ka ko e tagata tututonu kua lologo mo e fiafia a ia.

7 Kua iloa he tagata tututonu e fakafiliaga he tau tagata nonofogati; ka ko e tagata mahani kelea nakai manamanatu a ia ke iloa ai e ia.

8 Ko e tau tagata fa vā, kua tugi e lautolu e maga; ka ko e tau tagata iloilo kua fakaliu kehe e lautolu e ita.

9 Ka fakafili mena e tagata iloilo mo e tagata goagoa, po ke ita a ia po ke kata, nakai fai mafola.

10 Ko e tau tagata lima toto kua vihiatia e lautolu a ia ne katoatoa e mitaki hana mahani; ka ko e tau tagata mahani hakohako kua kumi e lautolu ke moui ai a ia.

11 Ko e tagata goagoa, kua liligi mai e ia hana loto oti; ka ko e tagata iloilo kua taofi ai e ia hana loto ato fakamui.

12 Kaeke ke fanogonogo e pule ke he tau kupu pikopiko, ti mahani kelea hana tau fekafekau oti ni.

13 Ko e tagata nofogati, mo e tagata favale kua feleveia a laua; ko Iehova kua fakamaama ai e tau mata ni ha laua tokoua.

14 Ko e patuiki kua fakafili mo e fakamoli e tau tagata nonofogati, to fakamau tukulagi ai hana nofoaiki.

15 Ko e akau mo e akonakiaga ke tupu ai e iloilo; ka ko e tama kua toka noa kua fakamā ai e ia hana matua fifine.

16 Ka tokologa ai e tau tagata mahani kelea, kua fakaloga ai e tau holifono, ka ko e tau tagata tututonu to kitia e lautolu a lautolu ka veveli ai a lautolu.

17 Kia akonaki e koe hāu a tama tane, ti moua ai e koe e okiokihaga; to tupu ai ni e fiafia ke he hāu a loto.

18 Ka nakai fai fakakiteaga kua mahani fakahanoa e tau tagata; ka ko ia kua omaoma ke he fakatufono, kua monuina a ia.

19 Nakai mafai e fekafekau ke fanogonogo he akonaki a ia ke he tau kupu; ha ko e mena pete he logona e ia, nakai ni tali atu ai a ia.

20 Kua kitia kia e koe e tagata kua fakatepetepe ai ke he hana tau kupu? kua fai amaamanaki ke he tagata goagoa, ka e nakai pihia kia ia.

21 Ko ia kua fakahelehele hana fekafekau tali mai he vaha tote hana, to eke fakamui a ia mo tama tane hana.

22 Ko e tagata fa ita kua fakatupu ai e ia e taufetoko; mo e tagata vale kua fakaloga ai e ia e tau holifono.

23 Ko e mahani fakatokoluga he tagata ke fakatokolalo ai a ia; ka ko e fakatokolalo he loto ke moua ai e lilifu.

24 Ko ia kua veveheua e tau mena fakalataha mo e tagata kaiha, kua fakavihia e ia a ia ni; kua logona e ia e kaialu ka e nakai fakakite ai e ia.

25 Ko e matakutaku ke he tau tagata ke hoko mai ai e matahele; ka ko ia kua tua kia Iehova, to nofo ai a ia mo e nakai haofia.

26 Tokologa kua kumi ke he pule; ka e ha ha ia Iehova e fakafiliaga he tau tagata.

27 Kua fakavihia he tau tagata tututonu e tagata mahani hepehepe; ka kua vihiatia he tau tagata mahani kelea e tagata mahani hakohako.