Lologo a Solomona

3 HA ha i luga he mohega haku ke he po ne kumi e au a ia ne manako ki ai haku loto. Ne kumi e au a ia ka e nakai moua e au a ia.

2 Ne matike au mo e faifano ai ke he maga, ke he tau puhala mo e tau male, mo e kumi ai e au a ia ne manako ki ai haku loto; ne kumi e au a ia, ka e nakai moua e au a ia.

3 Ne moua au he tau leoleo ne o fano ai ke he maga; ti pehe age au kia lautolu, Kua kitia nakai e mutolu a ia ne manako ki ai haku loto?

4 Ne mole atu fakatote au ia lautolu ti moua agataha e au a ia kua manako ki ai haku loto; ti taofi e au a ia, ti nakai toka e au a ia ato takitaki atu e au a ia ke he fale he haku a matua fifine, mo e poko hana ne fanau ai au.

5 Ko e tau tama fifine a Ierusalema na e, kua pehe atu au kia omonuo mai a mutolu ke he tau sevi mo e tau aila he vao, ke aua neke fakalagalaga e mutolu po ke fafagu e mutolu haku a fakahele ato loto ki ai a ia.

6 Ko hai kia hanā kua hake mai he tutakale tuga ne ahua fakatupou, kua manogi he muro, mo e pili lipano, mo e tau mena manogi oti kua tuki fakaikiiki he tau tagata fakafua koloa?

7 Kitiala, ko e mohega hana, ko e mohega a Solomona, kua agaagai ki ai e tau toa tokoonogofulu mai he tau toa a Isaraela.

8 Ko e takitaha a lautolu oti mo e toto hana pelu, kua mahani mo e tau a lautolu oti; ko e tagata mo e hana pelu kua pipi ke he hana hui ha ko e matakutaku ke he po.

9 Ne eke he patuiki ko Solomona e fata ke tauloto aki a ia he tau akau i Lepanona.

10 Ne eke aki e ia hana tau pou he ario, ko e hana tau akau fakalava ne eke aki he auro, ko e hana nofoa kua eke ai he ie kula uhi; kua eke aki ha loto ke he tau mena fakaalofa he tau tama fifine a Ierusalema, mo tau maka kua tatanaki mo laupapa.

11 Ko e tau tama fifine a Siona na e, kia o atu a, kia kitekite atu a mutolu ke he patuiki ko Solomona mo e foufou ne fakafoufou aki he matua fifine hana a ia ke he aho ne faihoana ai a ia, ko e aho foki ne fiafia ai hana finagalo.