Lologo a Solomona

5 HAKU mahakitaga na e, haku hoana na e, kua hau au ke he kaina haku; kua tanaki e au haku a tau muro mo e haku a tau mena manogi; kua kai e au haku a tau meli ne hihina hifo mo e haku a tau meli; kua inu e au haku a tau uaina mo e haku a tau puke huhu. Kia taumafa a, haku a tau kapitiga na e, kia inu a mutolu haku tau fakahele na e, kia inu a a mutolu ke makona.

2 Ne mohe au, ka e ala haku loto. Ko e leo he haku fakahele! Kua tukituki mai e ia, mo e pehe mai a ia, Haku mahakitaga na e, haku kapitiga na e, haku lupe na e, ko koe na kua katoatoa e mitaki, kia hafagi mai la e gutuhala kia au, ha kua pala hoku ulu he hahau, kua haumia foki e tau fili lauulu he haku lauulu ke he hahau kua hihina hifo he po.

3 Kua aaki e au haku a tapulu, kua maeke fefe ke liu tapulu ai au? Kua holoholo e au haku tau hui, kua maeke fefe ke liu tapilo ai?

4 Ne tuku mai he fakahele haku hana, lima ke he pu he gutuhala ti hofihofi noa haku loto kia ia.

5 Ne matike au ke hafagi e gutuhala ke he haku fakahele, ne hihina hifo foki e muro he tau lima haku, mo e muro hihina mai he tau matalima haku ke he tau kalihe he tau fakamau fakalava.

6 Kua hafagi e au e gutuhala ke he haku fakahele ka kua tafilu haku fakahele, mo e fano kehe, a ia, ne hopo haku ate he vagahau mai a ia. Ne kumi e au a ia ka e nakai moua; ne ui atu au kia ia, ka e nakai tali mai a ia kia au.

7 Ne moua au he tau leoleo ne o fano ai ke he maga, ti ta e lautolu au, ti kafokia au ia lautolu. Ne fofo ia au he tau leoleo he kaupa haku tapulu.

8 Ko e tau tama fifine a Ierusalema na e, kua omonuo atu e au kia mutolu, kaeke ke moua e mutolu haku a fakahele kia tala age a mutolu kia ia, kua gagao au he haku a fakaalofa atu kia ia.

9 Ko koe na kua homo atu he mitaki ke he tau fifine, ko e heigoa kia e mena ne mua ai hāu a fakahele ke he falu a fakahele? ko e heigoa kia e mena ne mua ai hāu a fakahele ke he falu a fakahele he omonuo ai pihia a koe kia mautolu?

10 Ko e hina haku a fakahele mo e kula a ia, ne mua ue atu a ia ke he hogofulu e afe tagata.

11 Ko e hana ulu kua tuga ne auro mitaki; ko e hana lauulu kua fakatalolo, kua uli tuga ne oreva.

12 Ko e hana tau mata kua tuga ne tau mata he tau lupe tata age ke he tau vailele, kua koekore ke he puke huhu mo e nonofo ke he tapa he tau vailele kua puke mau.

13 Ko e hana tau kauvehe kua tuga ne ulu pasama, mo e tau mena paiaia ne to ai e tau lakau manogi; ko e hana tau laugutu ko e tau susana ne hihina hifo ai e tau muro hihina.

14 Ko e hana tau lima kua tuga ne tau mama auro ne tuku ai e topasa; ko e hana manava kua tuga ne tau nifo elefane kua fakakikila mo e ufiufi aki he tau maka safaira.

15 Ko e hana tau hui ko e tau pou sesa haia, kua fakatu ai ki luga he tau lago auro ko e auro mitaki; kua tuga a Lepanona a ia ke kitekite ki ai, kua mua hana mitaki tuga ne tau arasi.

16 Ko e hana fofoga kua leo mitaki lahi ni. Kua katoatoa hana mitaki. Ko e tau tama fifine a Ierusalema na e, ko e haku a fakahele ni haia, ko e haku a kapitiga foki haia.