Isaia

10 OI te fakaalofa kia lautolu kua eke e tau fakatufono kelea, ko lautolu foki kua tohi ai e tau mena favale ke he tau tohi;

2 Kia fakaliliu kehe e taufetoko ha lautolu kua lolelole, mo e fofo ai e fakafiliaga he tau tagata nonofogati ke he hau a motu; kia eke e lautolu e tau fifine takape mo mena ne fofo he tau ma lautolu, ti fofo ai e lautolu e tau mena he tau tama nakai fai matua.

3 To eke ha e mutolu ke he aho ke ahi mai ai a mutolu, mo e aho ke hoko mai ai he mena mamao e malaia kia mutolu? To fehola a mutolu kia hai ke moua ai e lagomatai? Ko e mena fe foki ke toka ai e mutolu ha mutolu a lilifu?

4 Kia nakai tukutukuhifo a lautolu fakalataha mo lautolu ne fofo he tau, mo e veveli ai a lautolu fakalataha mo lautolu ne kelipopo. Ka e pete ni he tau mena oti ia nakai liu kehe ai hana ita, ka e fakaolo atu agaia hana lima.

5 Oi te fakaalofa kia Asuria, ko e tokotoko he haku a ita; ko e akau foki ke he tau lima ha lautolu, ko e haku a ita lahi haia.

6 To fakafano atu e au a ia ke he motu kolokolovao, to poaki atu e au a ia ke he motu kua ita au ki ai, ke uta ai e tau mena ne fofo he tau, ke uta foki mo e tau mena ne kaiha ai, ti eke ia mo mena kua taholi, ke tuga ne pelapela he puhala.

7 Ka ko ia nakai pihia hana manatu, to nakai manamanatu pihia foki hana loto; ka e loto ni a ia ke moumou mo e fakaoti ai e tau motu loga.

8 Ha kua pehe a ia, Nakai kia eke mo tau patuiki e tau iki oti ha ha ia au?

9 Nakai kia tatai a Kaleno mo Karekemisa? nakai kia tatai a Amato mo Arepa? nakai kia tatai a Samaria mo Tamaseko?

10 Tuga ne moua he lima haku e tau kautu he tau tupua, ko e ha lautolu a tau tupua kua ta, kua homo ia ke he tau tupua a Ierusalema mo Samaria;

11 Tuga ne eke e au ki Samaria mo e hana tau tupua, nakai kia eke pihia au ki Ierusalema mo e hana tau tupua?

12 Ka fakaoti ai he Iki hana tau gahua oti ke he mouga ko Siona mo Ierusalema, to ahi ai au e tau fua he loto fakatokoluga he patuiki a Asuria, mo e fakakiteaga he hana tau mata fakaikaluga.

13 Ha kua pehe age a ia, Ko e malolo he haku a tau lima, mo e pulotu haku kua eke ai e au e tau mena ia; ha ko e mena iloilo ni au; kua tolo e au e tau katofia he tau motu, kua fofo foki e au ha lautolu a tau koloa, tuga ne toa foki kua fakatokolalo e au a lautolu ne nonofo ai.

14 Kua moua he lima haku e koloa he tau motu tuga ne ofaga, tuga ne okooko foki he tagata e tau fufua manu kua tiaki, kua fakapotopoto ai e au e lalolagi oti; ti nakai ha i ai taha kua nikiti hana tau tapakau, po ke fakamaga hana gutu, po ke tagi.

15 Ke hula kia e toki kia ia ne hio aki ai? po ke fakatokoluga e kili kia ia ne kili mena ai? Tuga ne luelue ai he tokotoko a lautolu ne nikiti aki a ia, tuga he likiti he akau a ia nakai ko e akau.

16 Ko e mena ia ke fakafano atu ai he Iki, ko e Iki Sapaota, e pipili ke he hana tau tagata lalahi; to huhunu mena e ia to huhunu ai i lalo hana lilifu, tuga ne huhunu ke he afi.

17 To eke ai e Maama a Isaraela mo afi, to eke foki mo afi puhopuho hana Iki Tapu; to huhunu, mo e fakaoti ai hana tau akau talatala mo e hana tau akau fotofoto ke he aho taha.

18 To fakaoti ai foki e lilifu he hana vao mo e hana fonua talumelie, ko e agaga katoa mo e tino; to lolelole foki a ia tuga e tagata gagao.

19 To toe gahoa ai e tau akau ke he vao hana, ti maeke ke he tama ke totou ai.

20 Ko e aho ia ko lautolu ne toe i Isaraela, mo lautolu he magafaoa a Iakopo kua hao, nakai liu falanaki a lautolu kia ia ne keli a lautolu, ka to falanaki fakamoli a lautolu kia Iehova ko ia ne Tapu i Isaraela.

21 To liliu mai a lautolu ne toe, ko lautolu a Iakopo ne toe, ke he Atua malolo.

22 Ko e mena pete he tatai hau a tau tagata mo e oneone he tahi, ma Isaraela na e, ka to liliu mai kia ia a lautolu ne toe. Ko e fakaotiaga ha lautolu ne kotofa, kua puapuā ia ke he tututonu.

23 Ha ko e fakaotiaga kua kotofa, to eke ai he Iki ko Iehova Sapaota ke he lalolagi oti.

24 Ko e mena ia kua pehe mai ai e Iki ko Iehova Sapaota, Haku motu na e, kua nonofo i Siona; aua neke matakutaku a koe kia Asuria; to ta e ia a koe ke he tokotoko, to likiti foki e ia hana akau ki luga ia koe, ke tuga a Aikupito.

25 Ha ko e mena toe tote ti oti ai e ita lahi, to mole foki haku a ita ka fakaoti ai a lautolu.

26 To likiti e Iehova Sapaota e akau ki luga hana, tuga ne keliaga a Mitiana ke he maka ko Orepa; ha ha i ai foki hana akau ki luga he tahi, to likiti ai e ia tuga ne eke i Aikupito.

27 Ko e aho ia to uta kehe ai hana kavega he fulima hau, mo e hana lakau hahamo foki mai he ua hau; to fati ai foki e lakau hahamo hana ha ko e fakauku.

28 Ne hoko a ia ki Aiata, ti fana age ai a ia ki Mekerona, ti toka ai e ia hana tau mena i Mekemase.

29 Ne o atu a lautolu ke he puhala, ne eke e lautolu a Kapa mo mena ke api ai a lautolu ne vivivivi ai a Rama; ne hola a Kipeā a Saulo.

30 Kia fakatutu kia koe e tama fifine a Kalima, kia fanogonogo atu ai a Laisa, Anatota na e ne nofogati.

31 Kua hola a Matemena; kua fehola a lautolu ne nonofo i Kepima.

32 Ko e aho nai ne toe ke tu ai a ia i Nove, mo e alo tau atu ke he hana lima ke he mouga he tamafifine a Siona, ko e mouga ha i ai a Ierusalema.

33 Kitiala, ko e Iki ko Iehova Sapaota, ha ne hahala e ia mo e malolo e tau la akau; to hio ai foki a lautolu kua tutupu tokoluga, ti fakatokolalo ai a lautolu ne fakatokoluga.

34 To hahala ai e ia e vao vihi ke he lapatoa, ti veli ai a Lepanona ke he taha ne malolo.