Isaia

13 KO e kavega a Papelonia ne kitia e Isaia ko e tama a Amota.

2 Kia fakatu ki luga e fakamailoga ke he mouga nakai tupu ai ha akau, ti ui atu mo e leo lahi kia lautolu, ti alo tau atu he tau lima kia lautolu, kia huhu atu a lautolu ke he tau gutuhala he tau iki.

3 Ko au ni, kua poaki atu e au ke he tau tagata kua kotofa, kua ui ni au ke he haku a tau tagata malolo, ko e haku a tau tagata hemu mo e fakatokoluga, kia fakahoko ai haku a ita.

4 Ko e tomumu he tau tagata ke he mouga, tuga ne motu o tagata tokologa, ko e leo ne go mai he tau kautu he tau motu kehe kua fakapotopoto mai; ko Iehova Sapaota kua fakapotopoto e ia e kau ke tau ai ke he tau.

5 Kua o mai a lautolu he motu mamao, mai he motuaga he lagi, ko Iehova mo e tau kanavaakau he hana ita ke fakaoti ai e motu oti ni.

6 Kia tagi aue a, ha kua tata mai e aho a Iehova, ke hoko mai tuga ne malaia mai ia Ia hana e malolo oti kana.

7 Ko e mena ia ke tagatagato ai e tau lima oti to fakalolelole foki e tau loto he tau tagata oti.

8 Ti vivivivi ai a lautolu; to moua a lautolu he matematekelea mo e mamahi; to kokono a lautolu tuga ne fifine kua fanau, to fekiteaki a lautolu ko e taha ke he taha mo e ofo a lautolu; ko e tau mata ha lautolu ko e tau afi puhopuho haia.

9 Kitiala, ko e aho a Iehova ha ne hau, kua vela ai ke he ita mo e ita lahi; ke eke ai e motu mo mena kua moumou; ke fakaoti foki e tau tagata hala ha ha i ai.

10 Ha ko e tau fetu he lagi mo e ha lautolu a tau fakapotopotoaga fetu, nakai kikila mai a lautolu; kua fakapouli e la ke he hana fina atu, ko e mahina foki nakai huhulu mai hana maama.

11 To ahi atu au e lalolagi ha ko e mahani kelea ha lautolu, ko e tau tagata holifono foki ha ko e tau hala ha lautolu; to fakaoti foki e au e mahani fia mua he tau tagata fakatokoluga, to fakatokolalo ai e au e mahani fakahakehake he tau tagata favale.

12 To fakatokogahoa e au e tau tagata ke mua ni a ia ke he auro mitaki, ko e tau tagata ni ke mua he hogeia a lautolu ke he auro mai Ofaira.

13 Ko e mena ia to luelue e au e lagi, to vivivivi ai foki e lalolagi ke he mena ha i ai a ia, ke he ita a Iehova Sapaota, mo e aho he hana ita lahi.

14 To eke a lautolu ke tuga ne tevi kua tutuli, ke tuga ne fuifui mamoe nakai ha i ai taha ke fakapotopoto ai a lautolu, to takitaha a lautolu mo e liu atu ai ke he hana tau tagata, to takitaha foki a lautolu mo e liu ke he hana ni a motu.

15 Ko lautolu oti ka moua ai to hoka ato ati a lautolu, katoa mo lautolu kua tapaki ai, ti mamate a lautolu ke he pelu.

16 To palu ke he tau maka ha lautolu a tau tama mukemuke ki mua ha lautolu, to fofo ai e tau mena he tau fale ha lautolu, to toho foki e tau hoana ha lautolu.

17 Kitiala, kua fakaohooho atu e au e tau tagata Metai ke tau mo lautolu, nakai manatu e lautolu ke he tau ario, to nakai fiafia foki a lautolu ke he tau auro.

18 To tukimalipilipi ai e tau fuata ke he tau kaufana ha lautolu, to nakai fakaalofa atu a lautolu ke he fanau, to nakai fakahao e lautolu e tau tama.

19 Ko Papelonia foki, ko ia ne lilifu ke he tau kautu, ko e maga fulufuluola ne hula ai a Kaletaia; to eke ia ke tuga a Sotoma mo Komora ne fakamahakava ai he Atua.

20 Nakai liu kakai ai taha tukulagi, nakai tuai nofo ai taha ke hahau mo hahau; to nakai heapi ai e tau tagata Arapi, ti nakai uta foki he tau leveki mamoe ha lautolu a tau fuifui mamoe ke tatakoto ai.

21 Ka to tatakoto ai e tau manu favale he vao, to puke ai foki ha lautolu a tau fale ke he tau lulu, to nonofo ai foki e tau iaena, to hopohopo ai foki e tau koti he vao.

22 To tagi ai e tau aie ke he hana tau fale iki, katoa mo e tau luko ke he tau fale iki ne fiafia ai. Kua tata mai hana vaha, nakai mule foki hana tau aho.