Isaia

17 KO e kavega a Tamaseko. Kitiala, kua uta kehe a Tamaseko ke nakai eke a ia mo maga; kua eke a ia mo tumutumu, ko e tau fale kua malŏlŏ.

2 Kua tiaki e tau maga a Aroeru, to eke ia mo e tau fuifui manu, to tatakoto ai a lautolu, to nakai ha ha i ai taha ke fakamatakutaku atu ki ai.

3 To fakaoti e taue a Efaraimo, mo e kautu a Tamaseko, katoa mo lautolu ne toe i Suria; tuga ne lilifu ha fanau a Isaraela ti pihia ni a lautolu, kua pihia mai e kupu a Iehova Sapaota.

4 Ko e aho ia foki to fakatote ai e lilifu a Iakopo, to pipili e tino hana foki ne lahi.

5 To uta ai foki tuga ne kapitipiti e ia ne helehele saito e tau saito kua tu agaia, ti helehele ai e tau huki saito ke he hana lima; to uta ni tuga ne okooko ai he tagata e tau huki saito ke he pahua he tau tagata Refā.

6 To toe ai foki falu a fua venevene, tuga ne lulululu ai e tau olive na ua po ke tolu e fua ne toe ai ke he tapunu he la tokoluga; ne fa po ke lima ke he tau la he akau ne fua; kua pihia mai e kupu a Iehova ko e Atua a Isaraela.

7 Ko e aho ia to hagao atu e tagata kia Ia ne eke a ia, to kitekite atu foki hana tau mata kia ia ne Tapu i Isaraela.

8 To nakai hagao atu a ia ke he tau fatapoa, ko e tau mena ne eke ai he tau lima hana; to nakai kitekite foki a ia ke he tau mena ne eke he hana tau matalima, ko e tau tupua a Asaira mo e tau tupua he la.

9 Ko e aho ia to eke ai hana tau maga nonofo taue ke tuga ne mena kua tiaki ai ke he vao motua mo e tapunu he la akau, ne tiaki e lautolu ki mua he fanau a Isaraela, to eke ai foki mo vao.

10 Ha kua nimo ia koe e Atua he hau a fakamouiaga, ti nakai manatu e koe ke he maka tumau ke malolo ai, ko e mena ia to to ai e koe e tau lakau fulufuluola, mo e tau lakau mai he motu kehe;

11 Ko e aho ke to ai to puipui aki e koe ke he pa, to fakatupuolamoui foki e koe hau a tau fua mena ke he pogipogi; ka e hola e fuaaga ke he aho ne mānu mo e matematekelea lahi ai.

12 Oi te! ko e tomumu he tau motu loga; kua tomumu a lautolu tuga ne gu he tahi; ko e go foki he motu o tagata, kua go a lautolu tuga ne go he tau vai loga.

13 Kua go e motu o tagata tuga ne go he tau vai loga, ka e akonaki atu a ia kia lautolu, ti fehola mamao a lautolu; ti tutuli ai a lautolu tuga ne havilia e otaota he tau saito he tau mouga ke he matagi, tuga foki e tau mena taveliveli ke he hiohio.

14 Ka hoko ke he afiafi, kitiala, ko e matakutaku; kua nakaila hoko ke he aho a pogipogi, kua nakai ha i ai a lautolu. Ko e tufaaga ia ha lautolu ne fofo mena mai ia tautolu, ko e tufaaga foki ia ha lautolu ne kaiha ai e tau mena ha tautolu.