Isaia

2 KO e tau mena ne kitia e Isaia ko e tama a Amota kia Iuta mo Ierusalema.

2 To hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga ha atu mouga, to fakatokoluga ai foki ki luga he tau matiketike, ti tafe atu ki ai e tau motu oti kana.

3 To o mai foki e tau motu kehe loga, mo e pehe age a lautolu, O mai a, kia o hake a tautolu ke he mouga a Iehova, ko e fale he Atua a Iakopo; to fakaako mai foki e ia a tautolu ke he hana tau puhala, ti o ai a tautolu ke he hana tau puhala; ha ko e mena fina atu ai e fakatufono i Siona, ko e kupu a Iehova foki ke fina atu ai i Ierusalema.

4 To fakafili foki e ia e tau motu kehe, mo e fofola atu e ia ke he tau motu loga; ti tukituki e lautolu ha lautolu a tau pelu ke eke mo tau koho, ko e ha lautolu a tau tao foki ke eke mo tau titipi ke taute aki e tau vine; to nakai nikiti atu he taha motu e pelu ke he taha motu, to nakai liu ako tau foki e lautolu.

5 Ko e magafaoa a Iakopo na e, kia o mai a a mutolu, ke o ai a tautolu ke he maama a Iehova.

6 Kua tiaki e koe hāu a motu ko e magafaoa a Iakopo, ha kua puke a lautolu ke he tau mena mai he fahi uta, mo lautolu kua talahau mena he kitekite ke he tau aolagi, tuga ne tau tagata Filisitia, ti eke ai e lautolu e maveheaga mo e fanau he tau tagata kehe.

7 Kua puke foki ha lautolu a motu ke he ario mo e auro, kua nakai maeke foki ke totou ha lautolu a tau koloa. Kua puke foki ha lautolu a motu ke he tau solofanua, ti nakai maeke ke totou ha lautolu a tau kariota.

8 Kua puke foki ha lautolu a motu ke he tau tupua; kua fakaveli fakafohifo a lautolu ke he tau gahua he tau lima ha lautolu, ko e tau mena ni ne eke ai ke he tau matalima ha lautolu.

9 Kua palu hifo ai e lalotagata, kua fakatokolalo foki e iki, ti aua neke fakamagalo e koe a lautolu.

10 Kia hu atu a koe ke he maka tumau, ti fakamumuli ai a koe ke he kelekele, ha ko e matakutaku kia Iehova, mo e lilifu he hana malolo.

11 To fakatokolalo ai e tau mata fakatokoluga he tau tagata; to fakatokolalo ai foki e mahani fakaikaluga he tau iki; ka ko Iehova hokoia ni ke lilifu ai ke he aho ia.

12 Ha ko e aho a Iehova Sapaota, to hoko atu ia kia lautolu kua fakahakehake mo lautolu oti kua mahani fakaikaluga, katoa foki mo lautolu oti kua fakatokoluga; ti fakatokolalo ai a lautolu.

13 To hohoko ke he tau arasi oti ne loloa mo e tokoluga i Lepanona; to hoko foki ke he tau aluna oti i Vasana;

14 To hoko ke he atu mouga tokoluga oti; to hoko foki ke he tau matiketike tokoluga oti;

15 To hoko ke he tau kolo tokoluga oti; to hoko foki ke he tau kaupa uka oti;

16 To hoko ke he tau foulua Tasesa oti; to hoko foki ke he tau mena fulufuluola oti.

17 To fakatokolalo ai e mahani fakatokoluga he tau tagata; to fakatokolalo ai foki e mahani fakaikaluga he tau iki; ka ko Iehova hokoia ni ke lilifu ai ke he aho ia.

18 Ti mole atu ni e tau tupua katoatoa.

19 To huhu atu foki a lautolu ke he tau ana ke he tau maka tumau, mo e tau luo he kelekele, ha ko e matakutaku kia Iehova mo e lilifu he hana malolo, ka matike a ia ke lulululu ai e lalolagi.

20 Ko e aho ia to liti atu ai he tau tagata ha lautolu a tau tupua ario mo e ha lautolu a tau tupua auro, ne eke e lautolu ke fakaveli fakafohifo ki ai a lautolu, to liti ai e lautolu ke he tau afora mo e tau peka.

21 Kia o atu ai a lautolu ke he tau maihi he tau maka, katoa mo e tau vaha maka, ha ko e matakutaku kia Iehova, mo e lilifu he hana malolo ka matike a ia ke fakamatakutaku ai e lalolagi.

22 Toka ai e mutolu e tagata aua neke tua kia ia, ha ha i ai e fafagu ke he hana tau pokoihu; ko e heigoa kia e mena ke talahaua ai a ia?