Isaia

22 KO e kavega he Pahua he Fakakiteaga. Po ke fefe a koe ne o hake ai e tau tagata oti hau ki luga he tau fale?

2 Kua puke a koe ke he miha, ko e maga ne fa go falelea, ko e maga ne fiafia; ko e hau a tau tagata ne kelipopo nakai keli a lautolu ke he pelu ti nakai mamate ai a lautolu ke he tau.

3 Kua fehola fakalataha hau a tau iki oti, ha ko e tau kaufana kua lili ai a lautolu; kua lili fakalataha a lautolu oti ne moua ha ha ia koe, ko lautolu ne fehola mai he mena mamao.

4 Ko e mena ia ne pehe atu ai au, Kia haga kehe a mutolu ia au; ke tagi lahi ai au, ti ua eke a mutolu ke fakamafana au ha ko e malaia he tama fifine he haku a motu.

5 Ha ko e aho taha ke miha ai, mo e taholi ai, mo e fakaatukehe ai mai he Iki ko Iehova Sapaota ke he pahua he fakakiteaga, ko e aho ke ulu moumou ai e tau kaupa, mo e tagi atu ai ke he tau mouga.

6 Ne uta e Elama e taga fana, fakalataha mo e tau kariota, ko e tau tagata ne o ke he tau hui ha lautolu, mo lautolu ne heke solofanua, kua fukefuke e Kira e akau punuti.

7 Ne puke ai e tau pahua ne homo atu he tau kariota, ne unuunu mai foki e kau heke solofanua ke he gutuhala.

8 Ti uta kehe e ia e ufiufi a Iuta, ti hagao atu a koe he aho ia ke he tau kanavaakau ha ha he fale ke he vao.

9 Ne kitia e mutolu e tau mena maihihi he maga a Tavita, ha kua loga ni, ti fakapotopoto ai e mutolu e tau vai he namo i lalo.

10 Ti toto ai e mutolu e tau fale i Ierusalema, mo e ulu e mutolu e tau fale ke taute aki e kaupa.

11 Ti keli ai e mutolu e luo ke he vaha he na kaupa ua ke pa ai e vai he namo tuai; ka e nakai hagao atu a mutolu kia ia ne eke ai e mena ia, ti nakai kitekite atu a mutolu kia ia ne taute ia ne aho mua.

12 Ne ui mai ai foki he Iki ko Iehova Sapaota ke he aho ia ke tagi aue, mo e tagi tatuki, ke hifi puga foki e tau ulu, mo e tapulu ai ke he ie talatala.

13 Kitiala, ko e fiafia mo e olioli, kua tamate ai e tau povi mo e tamate ai e tau mamoe, kua kai ai e tau maga kakano mo e inu uaina; Kia kai a tautolu, mo e inu, ha ko e mena mamate a tautolu a pogipogi.

14 Ka kua fakakite mai e Iehova Sapaota ke he haku tau teliga, nakai ni fakamagalo atu kia mutolu e mahani kelea na ke hoko ke he aho ke mamate ai a mutolu, kua pihia mai ai e Iki ko Iehova Sapaota.

15 Kua vagahau mai pehe a Iki ko Iehova Sapaota, Hau a, ke fano a koe ke he fekafekau pule na, ko Sevena, ko ia ne pule ke he magafaoa, ti pehe atu a koe kia ia,

16 Ko e heigoa kia hau ke he mena nai? ko hai foki e tagata hau ki hinei? kua keli ai e koe e tukuaga māu ke he mena nai, kua keli ai e ia hana tukuaga ke he mena tokoluga, kua tuki ai ke he kaumaka e fale māna.

17 Kitiala, kua palu hifo e Iehova a koe mo e malolo lahi, ti ufiufi ai a koe.

18 To vakai ni a koe, to vakai ni ke tuga ne mena veliveli to liti atu ai ke he motu laulahi; to mate ai a koe, to ha i ai foki hau a tau nofoa fakataveli fulufuluola, ko e mena ke ma ai e magafaoa he hāu a iki.

19 To vega e au a koe he hāu a tufaaga, to palu hifo foki e au a koe mai he mena ne tu ai.

20 Ko e aho foki ia to ui atu au ke he haku a fekafekau ko Eliakimo ko e tama a Hilikia;

21 To fakatapulu e au a ia ke he tapulu hau; mo e fakamalolo aki e au a ia ke he pipi hau, to tuku atu foki e au e pule hau kia ia, to eke foki a ia mo matua ha lautolu kua nonofo i Ierusalema katoa mo e magafaoa a Iuta.

22 To tuku atu foki e au e kei he magafaoa a Tavita ke he hana ua; to hafagi e ia, ka e nakai pa e taha; to pa foki e ia ka e nakai hafagi e taha.

23 To fakamau e au a ia tuga ne fao ke he mena ke mau ai, to eke foki a ia mo nofoaiki lilifu ke he magafaoa he hana matua;

24 Ti tautau ai e lautolu kia ia e lilifu he tau mena oti ha ha he fale he hana matua; ko e tau mena ne tutupu ai, mo lautolu oti kua fanau mai ai; ko e tau kapiniu ikiiki oti ni, ko e tau kapiniu hokulo, katoa mo e tau lupo oti.

25 Kua pehe mai a Iehova Sapaota, Ko e aho ia to uta kehe ai e fao ne fakamau ke he mena ke mau ai, to mapaki foki a ia mo e to ai; to hehele kehe foki e tau mena ne tautau ai; ha kua vagahau mai ai e Iehova.