Isaia

39 KO e vaha ia ne fakafano mai e Merotapalata ko e tama a Palata, ko e patuiki a Papelonia, e falu ke ta mai e tau tohi mo e tau mena fakaalofa kia Hesekia; he logona e ia, ne gagao a ia, ka kua malolo.

2 Kua fiafia a Hesekia kia lautolu, ti fakakite atu e ia kia lautolu e fale ne toka ai hana tau koloa, ko e ario, mo e auro, mo e tau mena manogi, mo e puke lolo mitaki, katoa mo e fale oti ne toka ai hana tau kanavaakau, mo e tau mena oti ha ha i ai ke he hana tau mena ne tanaki ai e koloa; nakai fai mena ke he hana fale mo e hana motu oti nakai fakakite atu ai e Hesekia kia lautolu.

3 Ti fina age ai e perofeta ko Isaia ke he patuiki ko Hesekia, kua pehe age kia ia, Ko e heigoa ne tala atu he tau tagata na? ti o mai i fe a lautolu kia koe? Ti pehe age a Hesekia, Ko e motu mamao ne o mai ai a lautolu, ko Papelonia.

4 Ti pehe age a ia, Ko e heigoa kia kua kitia e lautolu ke he fale hau? Ti pehe age a Hesekia, Ne kitia e lautolu e tau mena oti ke he haku a fale, nakai toe ha mena ke he haku a mena ne tanaki koloa ai kua nakai fakakite atu e au kia lautolu.

5 Ti pehe age ai a Isaia kia Hesekia, Ati fanogonogo mai ā koe ke he kupu a Iehova Sapaota,

6 Kitiala, kua pehe mai a Iehova, To hoko mai e tau aho ke uta ai ki Papelonia e tau mena oti ha ha he fale hau, katoa mo e tau mena oti kua tatanaki ai he tau matua hau ke hoko mai ke he aho nai; ti nakai ni toe ha mena taha.

7 To uta foki e lautolu falu he tau tama tane hau ke tutupu mai ia koe, ke fanau ai e koe, ti eke a lautolu mo tau eunuka ke he fale he patuiki a Papelonia.

8 Ti pehe age a Hesekia kia Isaia, Kua mitaki e kupu a Iehova kua vagahau mai ai e koe; kua pehe age foki a ia, Ha ko e mena ke ha i ai e mafola mo e fakamoli ke he tau aho he haku a moui.