Isaia

44 KA ko ainei, fanogonogo mai ā Iakopo na e, ko e haku a fekafekau, ko Isaraela foki ne fifili e au.

2 Kua talahau mai pehe a Iehova, ko ia ne eke a koe, mo ia ne fakatupu ai a koe ke he manava; ko ia ne lagomatai kia koe; Aua neke matakutaku a koe haku a fekafekau na e ko Iakopo, ko Iesuruna foki ne fifili e au.

3 Ha ko e mena to liligi atu e au e vai ke he motu fia inu, mo e tau vailele ke he kelekele momo; to liligi atu e au haku Agaga ki luga he fanau hau, mo e haku a fakamonuina ki luga ha lautolu ke tutupu mai ia koe.

4 To tutupu hake a lautolu ki loto he tau motie, tuga ne tau garava ke he tau kauvai he tau vailele.

5 To pehe mai e taha, Ko au ko e tagata a Iehova; ti ui ai e taha ke he higoa a Iakopo; ka e tohi e taha ke he hana lima, Ma Iehova, to fakahigoa foki e ia a ia ke he higoa a Isaraela.

6 Kua talahau mai pehe a Iehova, ko e Patuiki a Isaraela, ko ia foki ne laveaki a ia, ko Iehova Sapaota; ko au ko e fakamua, ko au foki ko e fakamui, ti nakai fai atua, ka ko au ni hoko au.

7 Ko hai foki a ia ke tuga na au ke ui, mo e fakakite atu, mo e talahau mai fakamatafeiga kia au, tali mai he kotofa e au e motu i tuai? kia fakakite atu e lautolu kia lautolu e tau mena nakaila tutupu, mo e tau mena ke hohoko mai.

8 Aua neke fakaatukehe a mutolu; ti ua matakutaku a mutolu; nakai kia fakailoa atu e au kia koe ne aho mua, mo e tala atu ai e au kia koe? ko e haku a tau tagata ke talahau ai e mutolu, po ke fai atua nakai, ka ko au ni hoko au? Nakai ni fai maka tumau, nakai iloa e au taha.

9 Ko lautolu ne eke e tau tupua kua ta, kua teao ni a lautolu oti kana, ti nakai aoga ha lautolu a tau mena fakafiafia; ko lautolu ke talahau atu kia lautolu; nakai ni kitia e lautolu, ti nakai iloa e lautolu ke mā ai a lautolu.

10 Ko hai kia ne eke e atua, mo e taute ai e tupua lapatoa, kua nakai aoga?

11 Kitiala, to mā a lautolu oti ne fakalataha mo ia; ko e tau tufuga foki ko e tau tagata ni a lautolu; to fakapotopoto a lautolu oti; to tutu ki luga a lautolu; to matakutaku a lautolu; to mā fakalataha a lautolu.

12 Ko e tufuga eke mena lapatoa ne eke ai e ia e toki; ne taute ai ke he tau malala; ti eke ai e ia ke he tau hamala; ti gahua ai e ia ke he hana tau lima malolo; ne fia kai a ia ti nakai malolo a ia, ne fia inu magavai a ia ti lolelole a ia.

13 Ko e tufuga eke akau ne fakatoka ai e ia e fua, ti tohi ai e ia ke he peni, ti eke aki ke he tau tofi, ti tohi ai e ia ke he fua takai fakaveliveli, ti eke ai e ia ke tuga ne tino he tagata, ke tuga ne fulufuluola he tagata, ke nofo ai ke he fale.

14 Kua hahala ai e ia e tau arasi māna kua ta mai e ia e tiresa mo e aluna, ti fakamao ai māna e tau akau he kavei; ne to e ia e orene, ti tupu lahi a ia ha ko e uha;

15 Ti eke ia mo gaafi he tagata, ti uta ai e ia falu a mena ke mūmū ai a ia; ti huhunu ai e ia ke tao aki e tau areto; ti eke ai e ia e atua mo e hufeilo ki ai; ti eke ai e ia e tupua kua ta; mo e fakaveli fakafohifo ki ai a ia.

16 Ko e taha e veveheaga he akau kua huhunu ai e ia ke he afi; ko e hana veveheaga ia kua kai ai e ia e maga kakano; ne tunu ai e ia e mena ke tunu, ti makona ai a ia; kua mūmū ai a ia, ti pehe age a ia, Hahaia? kua mafana au, kua kitia e au e afi.

17 Ko e mena foki ne toe ne eke aki e ia e atua, ko e hana tupua kua ta; ti fakaveli fakafohifo a ia ki ai, mo e hufeilo ki ai a ia; ti liogi a ia ki ai kua pehe age, Kia laveaki mai e koe au, ha ko e haku atua a koe.

18 Nakai iloa e lautolu, ti nakai logona ai e lautolu, ha kua ufiufi e ia ha lautolu a tau mata neke kitia e lautolu, mo e ha lautolu a tau loto neke manamanatu ai e lautolu.

19 Nakai manamanatu e ia, to nakai fai iloilo a ia, to nakai loto matala a ia ke pehe age a ia, Ko e taha veveheaga he akau ne huhunu ai e au ke he afi, ne tao areto foki e au ke he hana tau malala kaka; ne tunu ai e au e maga kakano, mo e kai ai e au; to eke kia e au e mena ne toe mo mena fakalialia? ke fakaveli fakafohifo kia au ke he potu akau?

20 Kua eke ai e ia e tau efuefu afi mo mena kai hana, kua fakavai e loto, ti fakahehe e ia a ia; ti nakai maeke ke laveaki e ia a ia, ti nakai pehe a ia, Nakai kia ko e pikopiko ke he haku a lima matua?

21 Kia manatu e koe ke he tau mena nai Iakopo na e; ko Isaraela foki ha ko e haku a fekafekau a koe; ne eke e au a koe ko e haku a fekafekau a koe; Isaraela na e, nakai nimo a koe ia au.

22 Kua holoholo kehe e au tuga ne aolagi uli hau a tau holifono, mo e hau a tau hala tuga ne aolagi; liu mai ā koe kia au ha kua laveaki mai e au a koe.

23 Ko e lagi na e kia lologo ā koe, ha kua eke e Iehova e tau mena ia; kia kalaga atu ā mutolu ko e tau mena tokolalo he lalolagi; ko e tau mouga na e kia leo lahi ā mutolu, mo e kalaga fiafia; ko koe ko e kavei mo e tau akau oti ha ha i ai; ha kua laveaki mai e Iehova a Iakopo, to fakaheke ai a ia ia Isaraela.

24 Kua talahau mai pehe a Iehova ko ia ne laveaki a koe, ko ia foki ne fakatupu ai a koe ke he manava; ko au ko Iehova ne eke e tau mena oti; ne fofola e au hoko au ni e lagi; ko au ni hoko au ne fofola ai e lalolagi;

25 Ko ia ne moumou ai e tau fakamailoga he tau tagata pikopiko; ti fakagoagoa ai e ia e tau taulaatua; kua fakaliliu ki tua e ia e tau tagata pulotu, ti eke e ia ha lautolu a iloilo mo mena goagoa;

26 Kua fakamau ai e ia e kupu he hana fekafekau, ti fakahoko e ia e pule he hana tau fekau; kua pehe age a ia ki Ierusalema to kakai ai a ia; kua pehe foki a ia ke he tau maga a Iuta to ati ai ni a mutolu, to fakatu foki e au hana tau mena ne malŏlŏ.

27 Kua pehe atu a ia ke he tau mena hokulo, Kia pakupaku ā; to fakamaha foki e au hau a tau vailele.

28 Kua pehe atu a ia kia Kuresa, ko e haku a leveki mamoe a ia; to fakahoko ai e ia e tau mena oti kua loto au ki ai; kua pehe atu foki a ia ki Ierusalema, to ati ai ni a koe; kua pehe atu foki a ia ke he faituga, To eke ai ni hau a tau fakaveaga.