Isaia

48 KIA fanogonogo mai a ke he mena nai ko mutolu ko e magafaoa a Iakopo, ko mutolu kua ui ai ke he higoa ko Isaraela, mo e o atu ai a lautolu he tau vai a Iuta; ko lautolu ne omonuo ke he higoa a Iehova, mo e talahau atu ai e Atua a Isaraela, ka e nakai eke mo e fakamoli, mo e mahani tututonu.

2 Ha kua fakahigoa mai he maga tapu a lautolu, mo e tua a lautolu ke he Atua a Isaraela; ko e hana higoa ko Iehova Sapaota.

3 Ne talahau e au e tau mena fakamua tali mai i tuai; kua o atu e tau mena ia he gutu haku ti fakailoa atu ai; kua eke fakalutukia ai e au, ti hoko ai ni.

4 Ha kua iloa e au kua matauka a koe, mo e hau a ua ko e hokohoko lapatoa ia, mo e hau a matalē ko e apakula haia;

5 Ko e mena ia ne tala atu ai e au e tau mena ia ne aho mua; ne fakailoa atu e au kia koe ka e nakaila hoko mai; neke pehe a koe, Ne eke he tupua haku e tau mena na; ne poaki ai haku a tupua kua ta, mo e haku a tupua lapatoa.

6 Kua logona e koe; kia kitekite ā mutolu ke he tau mena oti; ka ko mutolu, nakai kia talahau e mutolu? Ke kamata mai he vaha nai kua fakailoa atu e au kia koe e tau mena fou, mo e tau mena galo foki nakai iloa e koe.

7 Kua eke la nai e tau mena ia ka e nakai eke i tuai; ti nakai logona ai e koe ato hoko ke he aho nai; neke pehe a koe, Kitiala, kua iloa e au e tau mena ia.

8 Ko e moli, nakai logona e koe; ko e moli nakai iloa e koe; ko e moli, tali mai i tuai nakai haga mai e koe hau a na teliga; ha kua iloa e au, to mahani fakavai lahi ni a koe, ne fakahigoa ai a koe, ko e fakafualoto, tali he fanau mai.

9 To fakauka ai au ha ko e haku a higoa; to taofi foki e au haku a ita kia koe ha ko e haku a fakahekeaga, neke fakaoti ai e au a koe.

10 Kitiala, kua kamakamata e au a koe, ka e nakai tuga e ario; kua fifili e au a koe ke he gutuumu ha ha i ai e matematekelea.

11 Ha ko au, ha ko au ni, to eke ai e au; ha kua maeke fefe ke holitu ai haku a higoa? Ko e haku a lilifu foki nakai ta atu ai e au ke he taha.

12 Kia fanogonogo mai ā koe kia au ma Iakopo na e, ko koe foki Isaraela na e ne ui ai e au; ko au ni a ia, ko au ni ko e fakamua, ko au foki ko e fakamui.

13 Ko e haku a lima foki ne fakave ai e lalolagi, mo e haku a lima matau ne fofola ai e lagi; kua ui au kia lautolu ti tutu mai fakalataha a lautolu.

14 Kia fakapotopoto mai a mutolu oti, ti fanogonogo mai a mutolu. Ko hai kia ia lautolu ne talahau mai e tau mena nai? Kua fakaalofa a Iehova kia ia; ti eke ai e ia hana finagalo i Papelonia, to hoko foki hana lima ki Kaletaia.

15 Ko au, ko au ni, ne vagahau atu e au; ne ui foki e au a ia; ne ta mai e au a ia, ti monuina ni hana puhala.

16 Kia fakatata mai a mutolu kia au; kia fanogonogo mai a mutolu ke he mena nai; tali mai he kamataaga nakai vagahau fakagalo ai au; tali he ha i ai e mena ia, ne ha ha i ai au; hanai foki, ko e Iki ko Iehova ne fakafano mai au, mo e hana Agaga.

17 Kua vagahau mai pehe a Iehova, ko e hau a Laveaki, ko ia ne Tapu i Isaraela, ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe.

18 Ane hagao mai a koe ke he haku tau poaki, po kua tuga ne vailele hāu a monuina; mo e tuga ne tau peau he tahi hau a tututonu;

19 Po kua eke hau a fanau ke tuga ne oneone; mo lautolu ke tutupu mai he manava hau, ke tuga na lautolu kua tutupu mai he manava hana; nakai vevehe kehe, ti nakai fakahiku ai hana higoa ki mua haku.

20 Kia o kehe a mutolu i Papelonia; kia fehola a mutolu i Kaletaia mo e leo he kalaga fiafia; kia talahau a e mutolu, kia fakailoa atu e mutolu e mena nai, kia fakahoko atu ai ke he motuaga he lalolagi; kia pehe atu a mutolu, Kau laveaki e Iehova hana fekafekau ko Iakopo.

21 Nakai fia inu a lautolu ke he tau motu nakai fai vai ne uta ai e ia a lautolu; ne fakatafe mai e ia e vai he kaumaka ma lautolu; ne ihi e ia e kaumaka, ti tafe mai ai e vai.

22 Kua pehe mai a Iehova, Nakai ni fai monuina a lautolu kua mahani kelea.