Isaia

52 ALA ā, kia ala a; kia tapulu ai a koe ke he hau a malolo, Siona na e, Ierusalema na e, kia tapulu ai a koe ke he hau a tau tapulu fulufuluola, ko e maga kua fakatapu; ha ko e mena nakai tuai hu atu kia koe a ia kua nakai peritome, mo ia kua kelea.

2 Kia lulululu e koe a koe mai he efuefu; Ierusalema na e, kia matike a koe, ti nofo a koe ke he hau a nofoaiki; kia vevete e koe e tau liliaga mai he ua hau, ko koe ne fofo he tau, ko e tama fifine a Siona na e.

3 Ha kua vagahau mai pehe a Iehova, Ne fakafua atu a mutolu, ti nakai tuai mai; to fakafua mai foki a mutolu, ka e nakai ta age ai e tau ario.

4 Ha kua vagahau mai pehe e Iki ko Iehova, Ne o hifo fakamua haku a motu ki Aikupito ke api ai; ti favale teao a Asuria kia lautolu.

5 Kua pehe mai a Iehova, ti heigoa kia haku a mena ki hinei ainei? ha kua uta noa haku a motu; ko lautolu ne pule kia lautolu kua fakatutu ni a lautolu, kua talahau mai e Iehova, ti vihiatia mau ni ke he aho oti haku a higoa.

6 Ko e mena ia ke iloa ai he motu haku haku a higoa; ko e mena ia ke iloa ai ke he aho ia ni, ko au ne pehe atu, Kitiala, ko au hanai!

7 Kua fulufuluola lahi ni ki luga he tau mouga e tau hui hana kua talahau mai e tala mitaki, ko ia kua ogo mai e monuina, kua talahau mai e tala mitaki; kua fakailoa mai e fakamouiaga; kua pehe mai kia Siona, Kua pule hau a Atua.

8 Ko e leo he hau a tau tagata toko, kua leo lalahi a lautolu, kua kalaga fakalataha a lautolu; ha ko e mena to feono aki ni a lautolu ka liuaki mai e Iehova a Siona.

9 Kia kalaga fiafia fakalataha a mutolu ko e tau mena malŏlŏ i Ierusalema; ha kua fakamafana e Iehova hana motu, kua laveaki e ia a Ierusalema.

10 Kua toka kehe e Iehova e tapulu he hana lima tapu ki mua he tau motu oti; ti kitia he tau kala oti he lalolagi e fakamouiaga he Atua ha tautolu.

11 O kehe a, kia o kehe ā mutolu, kia o atu a mutolu he mena na; aua neke pipiki atu a mutolu ke he mena kelea; kia o atu ā mutolu mai loto ia ia; kia meā a mutolu, ko mutolu kua toto e tau kapiniu a Iehova.

12 Ha ko e mena nakai o atu fakatepetepe a mutolu, ti nakai o atu a mutolu mo e fehola; ha ko e mena to haele ai a Iehova ki mua ha mutolu; to eke foki e Atua a Isaraela mo muiaki kau ha mutolu.

13 Kitiala, to mahani iloilo haku a Fekafekau to homo atu a ia, mo fakaheke ki ai, mo e tokoluga ue atu a ia.

14 Tuga ne ofo e tau tagata tokologa kia koe, kua maona pihia hana fofoga ke mua ke he tau mata he tau tagata, mo e hana tino ke mua ke he tau tino he tau tagata;

15 To pīpī ni pihia e ia e tau motu loga; kua ponoti he tau patuiki ha lautolu a tau gutu ha ko ia; ha kua kitia e lautolu e tau mena nakai talatala atu kia lautolu, kua iloa foki e lautolu e tau mena nakai logona ai e lautolu.