Isaia

62 TO nakai fakamate au ha ko Siona, ti nakai okioki au ha ko Ierusalema, ato fina atu ai hana tututonu tuga ne mena kikila, mo e hana fakamouiaga tuga ne hulu kua puho.

2 To kitekite e tau motu kehe ke he hau a tututonu, mo e tau patuiki oti to kitekite a lautolu ke he hau a lilifu; to ui foki a koe ke he higoa fou, ke talahau mai ai he fofoga a Iehova.

3 To eke a koe mo foufou fulufuluola ke he lima a Iehova, mo potiki he patuiki foki ke he aloalolima he hau a Atua.

4 To nakai tuai talahaua a koe Kua tiaki; ti nakai tuai talahaua hau a kelekele, Kua toka noa, ka to talahaua pehe a koe, Ha ha ia ia haku a fiafia; to talahaua pehe foki hau a kelekele, Kua fai tane a ia; ha kua fiafia a Iehova kia koe, kua fai tane foki hau a kelekele.

5 Ha ko e mena tuga e fuata kua fai hoana ke he tamāfine tote; to fai hoana pihia hau a tau tama tane kia koe; tuga ne fiafia foki e kitofaihoana ke he hana hoana, to fiafia pihia hau a Atua kia koe.

6 Ierusalema na e, kua kotofa e au e tau toko ki luga hau a tau kaupa, nakai fakamamate a lautolu ke he aho, katoa mo e po; ko mutolu kua fakamanatu atu kia Iehova, aua neke fakanonono a mutolu;

7 Ti aua neke tuku atu e mutolu kia ia, ke fakanono, ato fakamau ai e ia, ato eke foki e ia a Ierusalema mo e fakahekeaga ke he lalolagi.

8 Kua omonuo tuai e Iehova ke he hana lima matau mo e hana lima malolo, Nakai tuai ta age e au hau a tau fua saito ke kai ai e lautolu kua fai fi kia koe; ti nakai tuai inu e fanau he tau tagata kehe hau a uaina ne fakafita ai a koe;

9 Ka to kai ni e lautolu ne fakapotopoto ai, mo e fakaheke atu a lautolu kia Iehova; ko lautolu ne tatanaki mai ai, to inu ai a lautolu ke he haku a tau lotopa tapu.

10 Huhu atu a, kia huhu atu ā mutolu ke he tau pahala, kia tauteute ai e mutolu e puhala e motu, fakamolemole a, kia fakamolemole ā e mutolu e puhala tu, kia okooko ā mutolu e tau maka; kia nikiti ki luga e mutolu e matini ma e motu.

11 Kitiala, kua fakailoa atu e Iehova ke hoko atu ke he motuaga he lalolagi, Kia pehe atu ā ke he tama fifine a Siona, Kitiala, kua hoko mai hau a Fakamoui, ha ha ia ia hana taui, ti ha ha i mua hana e palepale he hana gahua.

12 To ui foki a lautolu, Ko e motu tapu; Ko lautolu ne laveaki mai e Iehova; to fakahigoa foki a koe Ko e maga kua kumi ki ai, Ko e maga nakai tiaki.