Isaia

8 KUA pehe mai a Iehova kia au, Kia uta e koe e maka tohi laulahi, mo e tohi ai ke he tofi he tagata, Ko Maheli-sala-hasa-pasa,

2 Ti ta mai e au e tau tagata talahau fakamoli, ko Uria ko e ekepoa, mo Sakaria ko e tama a Iperekia.

3 Ti fina age au ke he perofeta fifine, kua fatu a ia, ti fanau ai e ia e tama tane; ti pehe mai a Iehova kia au, Kia ui ai e koe hana higoa ko Maheli-sala-hasa-pasa.

4 Ko e mena nakaila iloa he tama ke ui, Haku matua tane na e, mo e Haku a matua fifine na e, to uta kehe ai e koloa a Tamaseko, ti fofo ai he tau, a Samaria ki mua he patuiki a Asuria.

5 Kua liu vagahau mai foki a Iehova kia au, kua pehe mai,

6 Ha kua tiaki he motu nai e vai ko Siloa kua tafe fakatekiteki, mo e fiafia kia Resina mo e tama a Remalia;

7 Ko e mena ia, Kitiala, to tamai ai he Iki ki luga ia lautolu e vai he vailele malolo mo e lahi, ko e patuiki i Asuria haia, mo e hana lilifu oti; to hake a ia ke he hana tau hala vai oti, to lofia foki hana tau kauvai oti.

8 To tafe atu ia ki Iuta, ti puā ai, ti fina atu ai, to hoko hake ni ke he ua; ko e folafola ai he hana tau tapakau foki ke puke ai e laulahi he hāu a motu, Emanuela na e!

9 Ko mutolu ko e tau motu na e, kia kau fakalataha a mutolu, ka to ulu ki lalo a mutolu; kia fakateliga mai a mutolu ko e tau mena mamao oti he lalolagi; kia pipi e mutolu a mutolu, ka to ulu ki lalo a mutolu; kia pipi e mutolu a mutolu, ka to ulu ki lalo a mutolu.

10 Kia pulega a mutolu, ka to fakahui ni; kia vagahau e mutolu e kupu ka e nakai ni mau; ha kua ha ha ia mautolu e Atua.

11 Ha ko e mena kua pehe mai a Iehova kia au mo e lima malolo, ne hataki mai foki e ia kia au, neke fano au ke he puhala he motu nai kua pehe mai,

12 Ua pehe atu a mutolu, Ko e fakafualoto ke he tau mena oti kua talahau ai e motu nai ko e fakafualoto; ti aua neke matakutaku a mutolu ke he tau mena kua matakutaku ai a lautolu, ti aua neke vivivivi ai a mutolu.

13 Ka ko Iehova Sapaota, kia tapu a ia kia mutolu, ko ia ni ke matakutaku ai a mutolu, ko ia foki ke vivivivi ai a mutolu.

14 To eke foki a ia mo faituga; ka to eke mo maka ke tauveli ai, mo kaumaka ke tupetupe ai ke he tau magafaoa ne ua a Isaraela; to eke mo matahele mo hele foki kia lautolu kua nonofo i Ierusalema.

15 Ti tupetupe ai a lautolu tokologa, mo e veveli ai a lautolu, ti mafatifati ai a lautolu, mo e tauhele ai a lautolu, mo e tapatapaki ai a lautolu.

16 Kia pipi la e talahauaga, kia fakamau fakamailoga e fakatufono ma e tau tutaki haku.

17 Kua tatali atu au kia Iehova, ko ia kua haga kehe hana fofoga mo e magafaoa a Iakopo, kua amaamanaki foki au kia ia.

18 Kitiala, ko au hanai mo e fanau kua foaki mai e Iehova kia au, ke eke mo tau fakamailoga, mo e tau mena ke ofo ai kia Isaraela, mai ia Iehova Sapaota kua haele ke he mouga ko Siona.

19 Ka pehe atu foki a lautolu kia mutolu, Kia kumi la kia lautolu ha i ai e tau agaga talahau tuai, mo e tau taulaatua ko lautolu ne fakaleokehe, mo lautolu kua gūgū, kia pehe atu a mutolu, Nakai kia kumi he motu ke he ha lautolu a Atua? Ke kumi kia kia lautolu ne mamate ha ko lautolu ne momoui?

20 Kia kumi ā mutolu ke he fakatufono mo e talahauaga; kaeke ke nakai vagahau a lautolu ke lata mo e kupu ia, kua nakai ni maama a lautolu.

21 To o atu foki a lautolu ke he motu kua matematekelea mo e hoge; ka hoge a lautolu ti ita ai a lautolu, ti kaialu ai e lautolu ke he patuiki ha lautolu mo e Atua ha lautolu, mo e hahaga hake ki luga;

22 To kitekite a lautolu ke he kelekele, kitiala, ko e matematekelea mo e pouli, ko e pouli ke mamahi ai; to vega foki a lautolu ke he pouli.