Ieremia

Ko e Tohi a Ieremia

1 KO e tau kupu a Ieremia, ko e tama a Hilikia, ko e taha he vahega he tau ekepoa, ha ha i Anatota ke he motu a Peniamina.

2 Ne hoko mai e kupu a Iehova kia ia ke he vaha a Iosia ko e tama a Amona, ko e patuiki a Iuta, ke he tau hogofulu ma tolu ne patuiki ai a ia.

3 Ne hoko mai foki ke he vaha a Iehoakima, ko e tama a Iosia, ko e patuiki a Iuta, kua hoko ke he fakaotiaga he tau hogofulu ma taha a Setekaia ko e tama a Iosia, ko e patuiki a Iuta, kua hoko foki ke he lima mahina he uta ai a Ierusalema ke he paeaaga.

4 Ne hoko mai kia au e kupu a Iehova, kua pehe mai,

5 Ne iloa e au a koe ka kua nakaila eke e au a koe ke he manava; ne fakatapu e au a koe ka kua nakaila fanau mai a koe, kua kotofa e au a koe ke eke mo perofeta ke he tau motu.

6 Ti pehe atu au, Oi te fakaalofa, ko e Iki na e Iehova, kitiala, nakai iloa e au ke vagahau, ha ko e tama tote au.

7 Ti pehe mai a Iehova kia au, Aua neke pehe mai a koe, Ko e tama tote au; ha ko e mena fano ni a koe kia lautolu oti ke fakafano atu e au a koe ki ai, ko e tau mena oti foki ke poaki atu e au kia koe to vagahau atu ai e koe.

8 Aua neke matakutaku a koe kia lautolu; ha ko e mena laveaki e au a koe, kua pihia mai a Iehova.

9 Ti fakaolo atu e Iehova hana lima, kua piki mai e ia ke he haku gutu; ti pehe mai a Iehova kia au, Kitiala, kua tuku atu e au e tau kupu ke he gutu hau.

10 Kitiala, kua kotofa e au a koe ke he aho nai ke pule ke he tau motu mo e tau kautu, kia taaki ai e koe, mo e ulu ki lalo, mo e fakaoti, mo e moumou, ke ati hake foki mo e to.

11 Ti hoko mai kia au e kupu a Iehova kua pehe mai, Ieremia na e, ko e heigoa e mena kua kitia e koe? Ti pehe atu au, Kua kitia e au e akau ko e sikati.

12 Ti pehe mai a Iehova kia au, Kua mitaki hau a kitekite; ha kua mataala au ke eke haku a tau kupu.

13 Kua hoko mai foki kia au e kupu a Iehova, ko e lagaua ia, kua pehe mai, Ko e heigoa kia e mena kua kitia e koe? Ti pehe atu au, Kua kitia e au e ulo ne ahua hake, ko e hana gutu foki kua hagao mai he fahi tokelau.

14 Ti pehe mai a Iehova kia au, Ko e fahi tokelau ke oho mai ai e kelea ki luga ha lautolu oti kua nonofo ke he motu.

15 Ha ko e mena kitiala, kua ui atu e au ke he tau magafaoa oti ni ke he tau kautu ke he fahi tokelau, kua pihia mai a Iehova; ti o mai a lautolu, ti takitaha a lautolu mo e tuku ai hana nofoaiki ke he mena ke hu atu ai ke he gutuhala a Ierusalema, ke tata age foki ke he hana tau kaupa oti kua agaagai ai, ke tata age foki ke he tau maga oti a Iuta.

16 To fakahala foki e au a lautolu ha ko e ha lautolu a tau mahani kelea oti, kua tiaki e lautolu au, mo e huhunu ai e lautolu e tau mena manogi ke he tau atua kehe, mo e fakaveveli fakafohifo ai a lautolu ke he tau mena ne eke ai he tau lima ha lautolu.

17 Ka ko koe, kia pipi e koe hau a tokupu, ti matike a koe, mo e vagahau atu kia lautolu e tau mena oti ke poaki atu ai e au kia koe; ua matakutaku a koe kia lautolu neke fakamatakutaku atu e au a koe ki mua ha lautolu.

18 Kitiala, kua eke e au a koe ke he aho nai mo pou lapatoa, mo tau pou apa kula foki ke totoko atu ai a koe ke he tau motu oti, ko e tau patuiki a Iuta, mo e hana tau iki, mo e tau ekepoa, mo e tau tagata he motu.

19 To tau a lautolu kia koe, ka e nakai kautu a lautolu kia koe; ha kua fakalataha au mo koe, ke laveaki a koe, kua pihia mai a Iehova.