Ieremia

12 IEHOVA na e, kua tututonu a koe, ka taufetoko a taua mo koe; ka to vagahau atu e au kia koe ke he hau a tau fakafiliaga. Ko e heigoa e mena kua monuina ai e puhala he tau tagata mahani kelea, ti hao mitaki ai a lautolu oti ne mua he mahani fakavai?

2 Ne to e koe a lautolu, kua totolo foki ha lautolu a tau vaka; kua tutupu a lautolu, mo e fua mai ai a lautolu; kua tata a koe ke he tau gutu ha lautolu, ka e mamao mo e tau manatu ha lautolu.

3 Ka ko koe, Iehova na e, kua iloa e koe au, kua kitekite mai a koe kia au, kua kamatamata foki e koe haku a loto ha ha ia koe; kia vevehe kehe e koe a lautolu tuga ne tau mamoe ke tamate, kia fakatapu e koe a lautolu ma e aho ke kelipopo ai.

4 Ato a fe kia ke tagi ai e motu oti, mo e fifigo e vao mui he tau fonua oti ha ko e mahani kelea ha lautolu oti ne nonofo ai? Kua fakaoti ai e tau manu huifa mo e tau manu lele; ha kua pehe age a lautolu, Nakai kitia e ia ha tautolu a fakahikuaga.

5 Kaeke kua tafepoi a mutolu mo e tau tagata ne tafepoi he kelekele, ti nakai fahia ai a koe, po ke poitufi fefe a koe mo e solofanua? ti pete he nofo a koe mo e nakai matakutaku ke he motu mafola, ka ko e heigoa e mena ke eke e koe ke he fulufuluola a Ioritana?

6 Ha ko e tau matakainaga hau mo e magafaoa he hau a tau matua, kua fakavai e lautolu a koe; kua ui ni e lautolu mo e leo lahi ki tua hau; ka e aua neke tua a koe kia lautolu, pete he vagahau fakamitaki a lautolu kia koe.

7 Kua toka e au haku a fale, kua tiaki e au haku a tufaaga; kua tuku atu e au e fakahele he haku loto ke he tau lima ha lautolu kua fai fi kia ia.

8 Kua eke haku a tufaaga kia au ke tuga e leona ke he vao; kua leo lahi mai a ia kia au ko e mena ia kua fakavihia e au a ia.

9 Kua eke kia haku a tufaaga kia au ke tuga ne manu lele favale, kilakila? kua fai fi kia kia ia e tau manu lele favale oti kua agaagai kia ia? o ā mutolu, kia fakapotopoto mai ā e tau mena momoui oti he vao, mo e ta mai a lautolu ke kai ai.

10 Kua fakaoti he tau leveki mamoe tokologa haku a uluvine, kua taholi e lautolu haku a tufaaga, ko e haku a tufaaga fulufuluola kua eke e lautolu mo tutakale kua moumou.

11 Kua eke ai e lautolu mo mena kua moumou, kua tagi a ia kia au ha kua eke a ia mo mena kua moumou; kua moumou e motu oti ka e nakai fai tagata kua manamanatu ki ai.

12 Kua o hake e tau tagata moumou ke he tau mouga oti nakai tu ai ha akau ke he tutakale; kua kai ai he pelu a Iehova ke kamata mai he taha potu he motu ke hoko atu ke he taha potu he motu; nakai ni monuina ha tagata taha.

13 Ne gana saito e lautolu ka e helehele mai ai e lautolu e tau akau talatala; ne fakamamahi e lautolu a lautolu ka e nakai aoga ia kia lautolu; ti mā a mutolu he tau mena ne moua e mutolu, ha ko e ita lahi a Iehova.

14 Kua vagahau mai pehe a Iehova ke he tau tagata mahani kelea oti kua katofia mo au, ko lautolu ne piki atu ke he tufaaga ne ta atu e au ke he haku a motu ko Isaraela, Kitiala, to taaki e au a lautolu mai he kelekele ha lautolu, to taaki foki e au e magafaoa a Iuta mai loto ia lautolu.

15 Ka mole he taaki e au a lautolu, ti liu fakaalofa hofihofi au kia lautolu, mo e liuaki mai e au a lautolu, takitaha ke he hana tufaaga, mo e takitaha ke he hana motu.

16 Kaeke foki ke ako fakamakutu e lautolu e tau puhala he haku a motu, ke omonuo ai a lautolu ke he haku higoa, ke pehe, Kua moui a Iehova, tuga ne fakaako e lautolu haku a motu ke omonuo kia Paala; ti ati hake ai a lautolu i loto he motu haku.

17 Ka ko e mena kaeke ke nakai fanogonogo mai a lautolu ti taaki e au e motu ia, to taaki mo e moumou ai, kua pihia mai a Iehova.