Ieremia

16 TI hoko mai e kupu a Iehova kia au, kua pehe mai,

2 Aua neke fai hoana a koe, ti aua neke ha i ai kia koe e tau tama tane po ke tau tama fifine ke he mena nai.

3 Ha kua vagahau mai pehe a Iehova ke he tau tama tane mo e tau tama fifine ne fanau ai ke he mena nai, mo e ha lautolu a tau matua fifine ne fanau ai a lautolu, mo e ha lautolu a tau matua tane ne fanau ai a lautolu ke he motu nai;

4 To mamate a lautolu he tau gagao ke mamate ai; ti nakai tagi tatuki ai ha ko lautolu; ti nakai tanu a lautolu; to eke a lautolu mo otaota ke he fuga kelekele; to fakaoti a lautolu ke he pelu, mo e hoge, to eke foki ha lautolu a tau tino mamate mo mena kai ma e tau manu lele he pulagi mo e tau manu he vao.

5 Ha kua vagahau mai pehe a Iehova, Aua neke hu atu a koe ke he fale kua tagi aue ai e tau tagata, ti ua fano a koe ke tagi tatuki ai, ti ua tagi a koe ha ko lautolu; ha kua uta kehe e au haku a monuina he motu nai, ko e fakaalofa, mo e fakaalofa hofihofi, kua pihia mai a Iehova.

6 To mamate e tau iki katoa mo e tau lalo tagata ke he motu nai; to nakai tanu a lautolu, ti nakai tagi tatuki he tau tagata ha ko lautolu, ti nakai helehele e lautolu ha lautolu a kakano ha ko lautolu, ti nakai hifi puga e lautolu ha lautolu a tau ulu ha ko lautolu;

7 To nakai tofitofi he tau tagata e tau mena kai ko e tagi ha ko lautolu ke eke mo fakamafana kia lautolu ha ko lautolu ne mamate; ti nakai ta age he tau tagata kia lautolu e kapiniu he fakamafanaaga ke inu ha ko e tau matua tane ha lautolu, po ke tau matua fifine ha lautolu.

8 To nakai hu foki a koe ke he fale kua eke ai e galue, ke nonofo a mutolu mo lautolu, ke kai mena ai mo e inu.

9 Ha kua vagahau mai pehe a Iehova Sapaota, ko e Atua a Isaraela, Kitiala, to fakahiku ai e au e leo fiafia, mo e leo he olioli, ko e leo he kitofaihoana, mo e leo he kitofaitane, mai he mena nai ki mua ha mutolu, ha kua momoui agaia a mutolu.

10 Ka oti he fakakite atu e koe e tau kupu oti ia ke he motu nai, ti pehe mai a lautolu kia koe, Ko e heigoa e mena kua talahau mai ai e Iehova e malaia lahi oti nai kia mautolu? po ke heigoa kia ha mautolu a mahani kelea? po ke heigoa ha mautolu a hala kua hala ai a mautolu kia Iehova ha mautolu a Atua?

11 Ti pehe atu a koe kia lautolu, Kua pehe mai a Iehova, Ha kua tiaki he tau matua ha mutolu au, mo e mumui atu ke he tau atua kehe, mo e fekafekau ki ai, mo e fakaveveli fakafohifo kia lautolu, ka kua, tiaki e lautolu au mo e nakai taofi e lautolu haku a tau fakatufono.

12 Ka e eke e mutolu e tau mahani kua mua he kelea ke he mahani he tau matua ha mutolu; kua takitaha e tagata mo e fano ke lata mo e mao he hana loto kelea; ti nakai fanogonogo mai ai a mutolu kia au.

13 Ko e mena ia ke vega ai e au a mutolu he motu nai ke he motu kua nakai iloa e mutolu; ko mutolu, po ke tau matua ha mutolu; ti fekafekau ai a mutolu ke he mena ia ke he tau atua kehe ke he aho mo e po; ha ko e mena nakai fakaalofa atu au kia mutolu.

14 Kua pehe mai a Iehova, Ko e mena ia, kitiala, to hoko mai e tau aho, ke nakai pehe age ai e tau tagata, Kua moui a Iehova ne ta hake e fanau a Isaraela mai he motu ko Aikupito;

15 Ka e pehe, Kua moui a Iehova ne ta hake e fanau a Isaraela mai he motu ke he fahi tokelau, mo e tau motu oti ne vega e ia a lautolu ki ai; ha ko e mena to liuaki mai e au a lautolu ke he motu ha lautolu, ne foaki atu ai e au ke he tau matua ha lautolu.

16 Kua pehe mai a Iehova, Kitiala, to fakafano atu e au ke he tau tagata takafaga tokologa, ti takafaga atu a lautolu kia lautolu; kua mole ia to fakafano atu e au e tau tagata tutuli manu tokologa, ti tutuli e lautolu a lautolu mai he atu mouga oti, mo e tau mouga oti, mo e tau maihi he tau kaumaka.

17 Ha kua kitekite au ke he ha lautolu a tau puhala oti; nakai galo a lautolu ki mua haku, nakai ufia foki ia au ha lautolu a mahani kelea.

18 Ti fakamua, to taui lagaua atu e au ha lautolu a tau mahani kelea, mo e ha lautolu a tau hala; ha kua fakakelea e lautolu haku a motu, kua fakapuke e lautolu haku a tufaaga ke he tau tino he ha lautolu a tau mena vihiatia, mo e ha lautolu a tau mena fakalialia.

19 Iehova na e, ko e haku a malolo, mo e haku a kolo, mo e haku a taue ke he tau aho matematekelea, to o mai kia koe e tau motu mai he tau kala he lalolagi, mo e pehe mai a lautolu, Ko e moli kua eke mo tufaaga he tau matua ha mautolu e tau mena pikopiko, mo e tau mena fakateaga, mo e tau mena nakai aoga.

20 To eke kia he tagata e tau atua māna, ka e nakai ko e tau atua a lautolu?

21 Ko e mena ia to fakailoa atu e au kia lautolu, ko e lagataha nai ni, to fakailoa atu e au kia lautolu haku a lima mo e haku a malolo; ti iloa ai e lautolu ko Iehova ko e haku a higoa haia.